1 Iso iyi mi yi mu isomo le gba i yi te, kwuyengwu umɛ uwu bɔkɔ e ri ogu uwu ete wu, akwu umɛshɛri bɛnɛ, e yi kyamate unye te, tetete apula iyi ete wu lɛɛbi akwu iyawu. 2 kwuyengwu akwu umɛshɛri bɛnɛ, enzu gba o bɔ wu eyi mbala apula iyi ete wu le nzhii ba kwuyengwu ete wu a zɛ. 3 Tatayi, kwuyengwu ki kwu ɛmɛshɛri ki kwu enye umba kwudu kwɔlɛ. 4 Tabɔkɔ kwuyengwu Ukpo kwu kpo kya akwɛyi Ukpo a lɔ umɛ wu, okokpayi gba a mba wu le, umɛ awu o mba wu kwuyengwu ɛrama iyi Omosisi, 5 kaa la wala enzu umba bɔkɔ o yi mu ɛrama ma, kwuwongu kaa la ki kwu ɛmɛ umba Ukpo. 6 Kwuwongwu bɔkɔ lunyi lu kwu ɛmɛ wu, akwɛyi Ukpo a lɔ kwundu ungwu umɛ wu kaa lakwu ŋɔ mu egbo nzu, Kwundu uwu umɛ wu uwu e koko a yama te, <<Ada, Ada.>> 7 Kwuwo kwɔlɛ ŋɔ kwu unye fo, ŋɔ kwu umɛ ŋa. Tabɔkɔ Ukpo a ra ŋa e wo umɛ wu ele, uŋɔ ŋɔ kwu u ri ogu wu tete.

8 Kwuye ungwekyi, bɔkɔ lu yi Ukpo mo awu, lu gbo rinye la eshi. 9 Kekelele lu yitu iyi Ukpo, Ukpo ba e yitu yi ee, kimbe ki shi bɔkɔ lu gba lu mbwalu eshi iyi kwudu kwɔlɛ? Lu gyi te la lu gba la lu gbo rinye la eshi kpɔ re? 10 Kimbe ki shi bɔkɔ lu bɔ eyi mu afyi, mbala evya mbala ɔyi mbala lɔri undu o shi mu ɛrama iyi Omosisi le? 11 Ubwugyi mi gba e yi te ɛduma iyi mi wo munyi yi ele a ŋa akwu shaa.

12 Ɛmɛnɛ mi, mi kpa yi ɛshɛku te, lunyi la lu yi kyamate imi tayi, mo imi mi yi kyamate lunyi tayi tete. Lu wo mi ira ikpikpɛnyi mo. 13 Lunyi la lu lolo te kwuyengwu kwonze bɔkɔ mi zɛ yi ilɔ iyi Ɔzhizɔsi awu, mi yi okpara uwu ɛnwu mo. 14 Ofya mi u lo yi inyashi gyɔɔ, tetete lu towo mi mo mo. Lu na mi kyamate mi kwu ɔlɔgbulɔ uwu Ukpo tayi, kyamate mi kwu Ɔzhizɔsi Okrasi te. 15 Kimbe ki wo bɔkɔ kwuye kwɔngu lu yi ɔnyɛ ba kekelele lu yi ɔnyɛ fo le? Mi yitu te, lo zɔ te i womo, lu bu lu eyi yi ma lu bu shi mi kaa li zɔ te lu pwu idɛnyi mi. 16 Kwuwongwu mi so yi ongbulolo le gba mi vindɔ onzu uwoyi yi le?

17 Enzu umba o yi egbo munyi yi awu, egbo mbo akwu iyeshi mo, umba o gyi te lo ka yi ma mbala mi kaa la lu mbwa mba ma. 18 Akwu kiya ingyi esheshi gba onzu a gyi ŋɔ, gba igyima wu akwu mu egbo iyi esheshi. Lalu koko lu wo tayi moo akwu kwuyengwu mi yi mbala yi kɛɛkyi mo. 19 Ɛmɛ mi mu Okrasi, i ye mi kyamate mi yi mu kwomba iwomo kwuwo yi kpɔ nzhii ba kwuyengwu bɔkɔ lu kɔma mu Okrasi. 20 Mu igyima mi, mi gyi te kaa mi yi mbala yi kekelele akwɛyi mi siso mbala yi mu opwu uwu oloto, moo mi yi ubwu ugyi kwuwo yi.

21 Lalu so mi lunyi umba bɔkɔ lu gyi te la lu lomo la ɛrama ma awu, lu yitu iyi kiya ingyi ɛrama i so mo re? 22 Moo o ka yi ma te, Aburamu e yi ɛmɛ wepo, uwu kwonze akwu umɛ uwu oko unye, uwopo ba akwu umɛ uwu oko uwu bɔkɔ akwu unye mo. 23 Umɛ uwu Aburamu uwu oko unye awu, o mba wu mu amasa iyi onzu. Umɛ uwu bɔkɔ oko uwu akwu unye mo awu bɔkɔ a mba le akwu kenzu igyirima unga Ukpo. 24 Ɛlɛ lɛɛbi i yi iluma yi tete: Eko mbɔlɛ akwu kenzu igyirima ekpepo unga bɔkɔ Ukpo a gyiri mbala enzu wu. Aga akwu kenzu igyirima ka kpɛnyi unga bɔkɔ o wo mu lɔwa undu Osinayi, uwu gba a mba ɛmɛ umba bɔkɔ o bo kwu enye le. 25 Aga akwu kyamate lɔwa undu Osinayi mu ɛzhi iyi Arabiya, kwu masa ma mbala Ɔzhɛrusalɛ uwu ɔnɛ te, kwuwongu enzu umba Ɔzhɛrusalɛ lɛɛbi o yi mu rinye. 26 Ɔzhɛrusalɛ uwu bɔkɔ e yi moshi awu ba e yi rinye mo, kinzu gba ki kwu enzu umba kwuse kwɔngu le. 27 Moo kwokpo ungwu Ukpo kwu zɔ te,

<<Mwɔnyɛ, uŋɔ odogyi!

uŋɔ uwu bɔkɔ ŋɔ mba ɛmɛ mo, ta kpaa kaa loga gbɔrɔrɔ laa ɔnyɛ, uŋɔ uwu bɔkɔ ŋɔ di ma wɔnu umbu kwomba dɛ mo awu!

Moo oko uwu bɔkɔ ɔnu wu a luwu afyima awu a ka ɛmɛ riba laa

oko uwu bɔkɔ ɔnu wu a luwu afyima mo.>>

28 Kwuwo kwɔlɛ ɛmɛnɛ mi, lunyi lu yi kyamate Aziki te. Lunyi lu kwu ɛmɛ umba kenzu igyirima. 29 Kyamate umɛ uwu bɔkɔ o mba wu mekeka iyi amasa iyi onzu e lo umɛ uwu bɔkɔ o mba kwuwongu ɛduma iyi kwundu uwu Ukpo inyashi awu, tatayi gba i yi le kekelele. 30 Iso iyi Ukpo ba i zɔ te? I zɔ te <<Ra la oko unye awu ma mbala umɛ wu, kwuwongu umɛ uwu oko unye awu e ri ogu uwu ete wu mbala umɛ uwu oko uwu bɔkɔ akwu unye mo awu mo.>> 31 Kwuwongwu ɔlɛ ɛmɛnɛ mi, ki kwu ɛmɛ umba oko uwu bɔkɔ akwu unye awu mo. Ki kwu ɛmɛ umba oko uwu bɔkɔ akwu unye mo le.