1 Lunyi enzu umba Ogalatiya erendo mbɔlɛ! Lu wo la ba lu nyama enzu o kyoro yi mo te? Lunyi umba bɔkɔ o ba yi eza marimari iyi lukwu undu Ɔzhizɔsi Okrasi mu kwuwɛyi ungwu lukwu! 2 Mi gyi te la mi yo yi kwuyo kwukpɛnyi kwɔlɛ: Bɔkɔ lu na Kwundu uwu Ukpo awu akwu mu Ɛrama iyi Omosisi imbwaluma naa akwu mu inyama yi mu iso iyi Ɔzhizɔsi ŋa? 3 Lalu kwu erendo mo nɛ! Lunyi umba bɔkɔ lu na Kwundu uwu Ukpo; kekelele lu gyi te la lu mbwa luzɛ yi ma mu ekpasu yi re? 4 Lalu nyama te inyashi iyi lu ma le lakwu iyi umbwa mo, mo imi mi shi egbo te inyashi ɛlɛ akwu iyeshi! 5 Tabɔkɔ Ukpo e shi yi kwundu wu te le wo ɛduma iyi amɛ mekeka yi awu akwu kwuwongu ɛrama iyi Omosisi imbwaluma naa akwu kwuwongu ikwu idu fulo yi mu iso iyi Ɔzhizɔsi ŋa?

6 Kwokpo ungwu Ukpo kwu so te, <<Aburamu e kwu idu e fulo mu Ukpo, akwɛyi Ukpo a ya wu te onzu ototo.>> 7 Lunyi la lu yitu te, enzu umba bɔkɔ o kwidu o fulo mu Ukpo gba akwu ɛmɛ umba Aburamu le. 8 O ka mu kwokpo ungwu Ukpo te, Ukpo a ma keyi mekekyi te Ukpo e shi enzu umba bɔkɔ akwu Azhu mo te lo kwu enzu umba ototo kwuwongu ikwu idu fulo mu Ɔzhizɔsi. Akwɛyi kwokpo ungwu Ukpo kwu tanu iyi ilɔ iyesheshi la Aburamu te: <<I zɛ ma ŋa gba Ukpo e shi enzu lɛɛbi esheshi le.>> 9 Kwuwo kwɔlɛ, enzu umba bɔkɔ o kwidu o fulo mu Ɔzhizɔsi, umba o ma esheshi kyaa mbala Aburamu uwu bɔkɔ a kwidu e fulo awu.

10 Enzu umba bɔkɔ o gyikpɔɔ te lo mbwalu ɛrama iyi Omosisi, Ukpo e lo mbo inyashi, moo kwokpo ungwu Ukpo kwu zɔ te, <<Onzu uwunawuna uwu bɔkɔ a mbwalu ɛrama iyi Omosisi lɛɛbi mo, Ukpo e lo wu inyashi.>>

11 Ɛlɛ i zɔ pepee te, Ukpo aa ma ɔsɛkɛnɛ uwu onzu mu ɛrama iyi Omosisi imbwaluma mo, moo kwokpo ungwu Ukpo kwu zɔ te, <<Onzu ototo uwu bɔkɔ e kwidu e fulo mu Ɔzhizɔsi gba e yi kwunyɔ le.>> 12 Ikwidufulo mu Ukpo i yi kya mbala ɛrama iyi Omosisi imbwaluma mo, kyamate bɔkɔ kwokpo ungwu Ukpo kwu zɔ te, <<Onzu uwu bɔkɔ a mbwalu ɛrama iyi Omosisi lɛɛbi, onzu awu tayi gba ee yi kwunyɔ le.>>

13 Ɔzhizɔsi Okrasi a wa nzu ma mu inyashi iyi bɔkɔ i fa te Ukpo e lo enzu umba bɔkɔ o lomo la ɛrama iyi Omosisi mo, akwɛyi a na lukwu nzu e kpomo, moo ɛrama iyi Omosisi i zɔ te, <<Onzu uwu bɔkɔ o bɔ wu iba mu kwuwɛyi, i zɔ te onzu awu Ukpo a ta wu kenzu ungira.>> 14 Okrasi e wo ɛlɛ te kaa wa mbwalu wu umba bɔkɔ akwu Azhu mo lo kyo lo fya esheshi iyi bɔkɔ Ukpo a zɔ te ee wo la Aburamu awu, kaa la ki fya Kwundu uwu Ukpo uwu bɔkɔ Ukpo e so te ee shi nzu awu kwuwongu idu kwufulo nzu mu Okrasi Ɔzhizɔsi.

15 Ɛmɛnɛ mi, mi gyi te la mi zɔ yi kiya ingyifo ingyi lu yitu ngyi ee kaa la lu zɔngɔma iso iyi bɔkɔ mi ye yi mu isomo ele marimari: Gba enzu wepo o nyama o siso o shi mɛzhi, onzu uwu e domo te e shiriyimo naa e kyo kiya mu kadu e yi mo. 16 Ukpo e siso te ee wo ɛlɛ la Aburamu mbala umɛ wu. Kwokpo ungwu Ukpo ku zɔ te Ukpo ee wo ɛlɛ <<La ɛmɛ wu mo>>, Kwu zɔ te Ukpo ee wo ɛlɛ, <<Laa umɛ wu,>> iso ɛlɛ o so mu reshi ingyi onzu ɛnyi kɛɛkyi, onzu ele gba akwu Okrasi le. 17 Iluma iyi iso iyi bɔkɔ mi so awu gba iyi te: Ukpo e siso e shi mɛzhi mbala Aburamu ba a zɔ te ee wo ɛduma ma yi. Ɛrama iyi Omosisi iyi bɔkɔ o bo yi mizhikembo iyi lɔri e deri endo la lɔri uwekpela awu, ɛrama ɛnyi i do iso iyi bɔkɔ Ukpo e so e shi mɛzhi mbala Aburamu awu ishirimo mo. 18 Mo Ukpo e wo esheshi la enzu kwuwongu o mbwalu ɛrama iyi Omosisi le mo, uwu e shi mbo esheshi wu kwuwongu bɔkɔ a zɔ te ee wo yi tayi le. 19 Kwuwongwu kwuwongumbe ba Ukpo e shi ɛrama iyi Omosisi? Ukpo e kyo yi kadu kaa enzu lo zɔngɔma ingbomo mba ma dɛshi Okrasi umɛ uwu Aburamu le bo, uwu bɔkɔ Ukpo e so e shi mɛzhi mbala wu. E shi alɔgbulɔ wu Ɛrama ɛlɛ te, onzu uwufo le yi kyamate onzu uwu kwudeka mba. 20 Gba rɛnu li ta lo onzu ukpɛnyi a kagyi onzu uwu kwudeka shaa fo; kwuwongu Ukpo akwu ukpɛnyi.

21 Kekelele, i zɔ te ɛrama iyi Omosisi ɛlɛ i nyama la rɛshi ingyi Ukpo mo re? Akwu tayi mo!Ɛrama iyi Omosisi i domo te i shi kwunyɔ mo. Gba li do kwunyɔ ishimo, de ba Ukpo a ba sa uwewe mo mu ɛrama. 22 Kwokpo ungwu Ukpo ba kwu zɔ te kpɛkpɛ nzu ki kwu enye umba ingbomo; ɛlɛ i wo te kaa iso iyi bɔkɔ Ukpo e so te e wo awu, e wo rɛshi ngyɛngyi la enzu umba bɔkɔ o kwidu o fulo mu Ɔzhizɔsi Okrasi. 23 Keyi dɛ kaakwuyengwu ikwu idu lu fulo lakwu bo, ɛrama iyi Omosisi i ta nzu kwɔshi kpɛ mu ugu ugyi, nzhii ba kwuyengwu bɔkɔ Ɔzhizɔsi a ba wa nzu ma. 24 Ɛrama iyi Omosisi i yi kyamate onzu uwu bɔkɔ a bɔ nzu eyi nzhii ba ibomo iyi Ɔzhizɔsi Okrasi, ɛlɛ i wo te kaa la ki yi ɔsɛkɛnɛ mu idu iyi Ukpo kwuwongu ikwu idu fulo nzu mu Ɔzhizɔsi. 25 Kekelele kwuyengwu ikwu idu lu fulo mu Ɔzhizɔsi kwu bo-o, ɛrama iyi Omosisi i yi ekpasu meka nzu fo.

26 Lunyi lɛɛbi lu kwu ɛmɛ umba Ukpo kwuwongu ikwu idu fulo yi mu Okrasi Ɔzhizɔsi, 27 mo lunyi lɛɛbi yi umba bɔkɔ o wo yi obatisima awu lu kwu wakpɛnyi mbala Ɔzhizɔsi Okrasi akwɛyi lu yi kyamate Okrasi bi ŋa. 28 Kekelele, kwusɛ kwu yi meka iyi Azhu mbala enzu umba bɔkɔ akwu Azhu mo fo, naa unye mbala onzu uwu bɔkɔ akwu unye mo, naa ɔnzɔnu mbala okokpayi mo, kwuwongu lunyi lɛɛbi lu kwu wakpɛnyi mu Ɔzhizɔsi Okrasi. 29 Gba lunyi lu kwu enzu umba Ɔzhizɔsi Okrasi, ɛlɛ i zɔ te o kyo o wa yi te lu kwu ɛdɔ iyi Aburamu akwɛyi lu kyo lu fya ogbo uwu kiya ingyi bɔkɔ Ukpo e so te ee shi Aburamu awu.