1 Inyɔma mi munyi yi akwu kwuzhi ungwɔla gba kwu ŋɔ le. Kyamate bɔkɔ iso iyi Ukpo i so, <<Gba izɔgɔ iyi azɔgɔ wepo nana wala i zɛ kya mbala esu, iso ɛnyi i rima.>> 2 Kwuye ungwu mi ka munyi yi izhi ungwopo awu, mi tu yi mo dɛ-ɛ. Mi gba mi so yi kpɔ kwuye kwɔlɛ bɔkɔ mi yi mbala yi fo le te: Gba mi gba mi bo akwɛyi mi du onzu uwufo mu ingbomo kpɔ, mi ŋi ma inyashi iyi onzu awu tayi fo, 3 moo lu zɔ te lu gyi te la lu ma kɛzɔ unga bɔkɔ ka zɔ te Ɔzhizɔsi Okrasi gba e yi mu iso isomo mami le. Ɔzhizɔsi akwu usuwa mo, moo ekpasu wu i yi mu izɔma munyi yi. 4 Moo kwuwongu bɔkɔ inyɛma iyi ekpasu iyi onzu gba i yi mbala wu le kwuye kwɔngu awu, akwɛyi o kpa wu mu kwuwɛyi, ɔ ngbɛ wu ma. Tetete e yi lakwunyɔ ŋa moo Edego-ala a zɔ ekpasu wu akwɛyi e yi wu mo mu kwuvɔ. Tatayi, kinzu umba bɔkɔ ki yi mbala wu awu, ki yi ekpasu mo tete.Tetete mu ekpasu iyi Ukpo, kinzu tete ki ri mawu akwɛyi ki wo yi ɛduma.

5 Lalu yese ɛnwu yi ma kaa lu ma shii lu yi mu luzɛ undu ikwu idu lu fulo; La lu mondo ɛnwu yi ma. Lunyi lu yitu te Ɔzhizɔsi Okrasi e yi ma yi mo? Naa lu kwu wa mbwalu ngboro mo ŋa? 6 Imi mi shi egbo te, lu ma te kinzu ki kwu wa zɛ ilɔ umba Ukpo kego. 7 Kinzu ki lɛ Ukpo te la mbwa yi ma kaa la lu wo kiya ingyira mo. Ɛlɛ ki so te kaa enzu lo ma te ɛduma nzu i she la Ukpo marimari le mo. Ki gyi te gba enzu o ma nzu te ki fɔma lala, lunyi de la lu zɛ luzɛ undesheshi mbaa Ukpo. 8 Moo kinzu ki wo kiya ingyi bɔkɔ ki zɛ kya mbala ototo mo mo, ototo gba ki ri ma wu le iyɔkpɔɔ. 9 Kwuye ungwunanguna bɔkɔ ki kpɔfɔ lunyi ba lu yi ekpasu ki mwɔnyɛ. Ki gba ki lɛ Ukpo te la lu nyɔlɔ ma. 10 Ɛlɛ gba i shi mi ka yi ɛlɛ le, kaa kwuye ungwu mi bi nyɔ munyi yi awu, mi ra la ekpasu iyi Ukpo e shi mi awu akwɛyi mi kpa yi ɛyi zhazha fo, moo ekpasu iyi bɔkɔ Ukpo e shi mi, a kwiyi kaa lo mbo yi mo le, moo akwu kaa lo shiri yi mo mo.

11 Ɛmɛnɛ mi, iso mi imbwambwa gba i yi te, la lu mwɔnyɛ. Lalu nɔngɔ luzɛ yi ma. Lalu mbwalu iso iyi mi so yi. Egbo yi lakwu ikpɛnyi, lalu ŋɔ moloto. Edego-ala, u kpo lukwu undu enzu, u shi iŋɔma iyi oloto, le yi mbala yi.

12 Lalu gbɛlɛ esu ɛnyi, la lu kpa esu idu. Wambwalu umba bɔkɔ o yi mbala mi munɛ lɛɛbi o ye yi mu ɛnyi igbɛlɛma.

13 Esheshi iyi Ɔkwu nzu Ɔzhizɔsi Okrasi, mbala idɛnyi iyi Edego-ala mbala iŋɔma kya mbala esu iyi Kwundu uwu Ukpo li yi mbala yi lɛɛbi.