1 Kinzu umba bɔkɔ ki kyo kya mu ɛduma iwomo mbala Ukpo, ki kpa yi ɛshɛku te, esheshi iyi bɔkɔ Ukpo e shi yi awu, la lu wo ɛduma ma yi. 2 Kwuwongwu kwokpo ungwu Ukpo kwu zɔ te,

<<Mi gba yi opwu ɔnuwu kwɔfyi ungwu mi gyi,

ɔnuwu kwɔfyi ungwu isama, mi mbwa yi ma.>>

Lalu pwa! ɔnɛ gba akwu kwɔfyi ungwu o na esheshi iyi Ukpo le, ɔnɛ gba akwu kwɔfyi ungwu lu fya isama mbaa Ukpo le!

3 Kinzu ki wo kiya ingyi ki shi enzu lo lɛfyi mo, kaa onzu la fya kwuyi ungwu a ma ingbomo mu ɛduma iyi Ukpo iyi bɔkɔ ki yi mu iwomo le mo. 4 Kinzu umba bɔkɔ ki wo ɛduma iyi Ukpo awu ba ki zɔ enzu te ki kwu enzu umba ongbulolo mu ɔgwuzɛ uwunawuna: mu ɔgwuzɛ uwu idu kwɔku mbala kwuye ungwu ovyo mbala mu inyashi imama mbala mu kwuye ungwu ira. 5 o kpa nzu ɛmu; o ta nzu mu ugu ugyi; o kpalashi nzu o nɛ nzu lunɛ; la ɛduma iwomo iyɛkɔkɔ, ki nyi enzu ondo mo mbala kiya ingyirimo; 6 mu iŋɔma iyi ɔsɛsɛ; mu kiya izɔngɔma gedegede; mu idu iyimo mbala esheshi iwomo la enzu; mu imbwama iyi Kwundu uwu Ukpo mbala idɛnyi ipwumo ireyi; 7 mu isomo nzu iyi ongbulolo mbala ekpasu iyi Ukpo; ki yi ototo kyamate ewulo iyi ewa zu tayi mu ungyi mu ɔzu. 8 O pwɔ nzu ma ba o zhi nzu ma; o kpa zu ari ba o du zu ma.O ya nzu te wa mulo, munɛ ba ongbulolo gba ki yi mu isomo le; 9 enzu umbafo o zɔ te o yitu nzu mo munɛ ba enzu o yitu nzu gedegede, mu kwuye ungwu bɔkɔ enzu o fulo eyi te ki kpomo, munɛ ba ki ye la reyi. o kpa nzu ɛmu ba o ngbɛ nzu ma mo; 10 Ki yi ubugyi munɛ ba ki kwu enzu umba ɔnyɛ kwuye ungwunanguna; ki kwu ayirewa, munɛ ba ki shi enzu o yi kiya ingyi kwuwo; enzu o ma nzu te ki yi kiya mo munɛ ba ki yi ingyinangyina.

11 Lunyi wa mbwalu umba Ɔkɔrɛti, kinzu ki so yi iso mu egbo ikpɛnyi, idɛnyi iyayi mu akɔ nzu ba i yi ibɔma mo. 12 Idɛnyi iya yi mu akɔ nzu i gyima mo, idɛnyi iya nzu mu akɔ yi gba i yi mu igyima le. 13 Imi mi so yi iso kyamate imi mi kwu ete yi tayi, lunyi la lu pwu idɛnyi nzu kyamate te ki pwu iya yi tayi; la lu pwu idɛnyi nzu gyɔɔ mu akɔ yi tete.

14 La lu lo mesu kya mbala enzu umba bɔkɔ akwu wa mbwalu mo mo. Moo ɔgwuzɛ uwu enzu umba ototo u zɛ kya mbala ɔgwuzɛ uwu enzu umbu ira mo! Tete ipwu i gɔ kɛlɛ mbaa ɛbɛ mo! 15 I wo te bɔkɔ Okrasi a nyama la onzu uwoyi? Kimbe ki shi ba u mbwalu a kpakya mbala u mbwalu mo? 16 Ɔtɛpu uwu Ukpo a kpakya mbala kwunu ungwu eshi mo. Moo kinzu ki yi kyamate Ɔtɛpu uwu Ukpo tayi. Mate bɔkɔ Ukpo e so mekyeki te: <<Imi mi ŋɔ mbala mba, mi gba mi gɔ mbala mba, akwɛyi mi kwu Ukpo mba, umba ba aakwu enzu mi.>>

17 <<Kwuwo kwɔlɛ, Ɔkwu a zɔ tee,

Lalu wɔma munyi mba

kaa lalu ŋɔ kɛrɛrɛ.

Lalu pwu afyi mu kiya ingyi bɔkɔ ɛrama iyi Omosisi i nyima mo,

akwɛyi Imi ba mi na yi ma.>>

18 <<Imi mii kwu eteyi,

lunyi ba luu kwu ɛmɛ mi,

te gba Ɔkwu Edego ala e so le.>>