1 Lunyi la lu shɔɔkɔ la lu yidu mbala erendo mi kyamate bɔkɔ lu yi mu iwomo-o awu. Shɔɔkɔ la lu yidu mbala mi! 2 Imi mi wo rise kwuwo yi le kyamate bɔkɔ Ukpo e wo rise kwuwo yi tayi. Imi mi masa yi mbala umesheko uwu bɔkɔ e de yi ɔnzɔnu dɛ mo, uwu bɔkɔ mi shi anu wu la ɔnzɔnu uwufo uwu o ya wu te Ɔzhizɔsi Okrasi tayi. 3 Iyi mi ba i yi te enzu umbafo o to yi egbo mo akwɛyi lu mbwalu ɔgwuzɛ ongbulolo uwu Okrasi la egbo ikpɛnyi fo kyamate bɔkɔ ɔkwu e kyoro Ivu ma mu amasa tayi. 4 Moo kwuyengwunanguna bɔkɔ ugboga e bo munyi yi laa iso iyi Ɔzhizɔsi owa uwu bɔkɔ akwu uwu kinzu ki so yi iso wu awu mo, lu na yi lasaasa; tatayi lu na kwundu ungufo ungwu bɔkɔ kwu yi kyaa mbala Kwundu uwu Ukpo mo mbala iso iyesheshi iyi bɔkɔ i zɛ kyaa mbala iyi bɔkɔ lu na munyi nzu awu mo! 5 Imi mi nyama te enzu mbɔlɛ umba bɔkɔ o ya ɛmba te <<wa zɛ ilɔ umbakwu>> awu, o ka mi ma mo! 6 Igbomo mi bamba mu iso isomo mo, tetete mi yi iyitu; kinzu ba ki zɔ yi ɛlɛ lɛɛbi-e mu ɛgwuzɛ ikikɔ ikikɔ.

7 Imi mi ngbomo re bɔkɔ mi gba la ɛmi mɛzhi mu anu itama iyi iso iyesheshi iyi Ukpo ɛlɛ rɛshi kaka kaa la lu so kadu? 8 Kwuyengu mi yi mu ɛduma iwomo mbala yi awu, ɛshɔshi iyifo gba i shi mi eduwo le. I yi kyamate mi mi wumba ɛlɔ te kaa la mi mbwa yi ma.

9 Kwuyengu mi yi mbala yi ba mi yi ugɔ uwu eduwo, mi nyama tee la mi fulo yi ɔlu mo; ɛmɛnɛ umba bɔkɔ o ngyi mu Omasedoniya, o ka mi laa kiya ingyinangyina ingyi mi yi ugɔ ngyi lɛɛbi. Mate mi wo mekyi awu, tegba mi wo le iyɔkpɔɔ: mi nyama tee la mi fulo yi ɔlu mo. 10 Laa ongbulolo uwu Okrasi uwu bɔkɔ e yi ma mi ele, mi so yi tee onzu uwunawuna mu ɛzhi iyi Akaya lɛɛbi e do tee a nyi mi ɛnwukumo mi ɛlɛ mo. 11 Akwu kwuwongu mi gyi yi mo gba mi so ɛlɛ le? Ukpo e yitu tee mi gyi yi!

12 Iyi bɔkɔ mi yi mu iwomo le gba mi so wu mu iwomo le, kaa mu iwomo mi ɛlɛ, <<wa zɛ ilɔ>> umbafo mbamba lo fya kapa kaa lo kwɛnwu tee o yi mu ɛduma iwomo mate kinzu tete. 13 Enzu mbamba tayi akwu wa zɛ ilɔ umba ongbulolo mo-akwu wazilɔ umba angba, umba bɔkɔ o mwilo mekeka iyi ɛduma mba akwɛyi o wo kyamate umba akwu wa zɛ ilɔ shɛ umba Okrasi tayi. 14 Ɛlɛ akwu kiya ingyi kenzu iyama mo! Moo onzu uwoyi mafyi wu tete e wo mate uwu akwu ɔlɔgbulɔ uwu ɛbɛ tayi. 15 Kwuwongwu ɔlɛ la kwanzu kiya ingyi kenzu iyama mo gba ɛmɛgba wu o wo mate umba akwu ɛmɛgba umba ototo tayi. Ɔnuwu kwɔnyi kwɔlɛ, ɔ lɔ kiya ingyi o so awu.

16 La mi so yi kpɔ tee: Onzu uwunawuna le to mi tee mi kwu orondo mo. Ishi gba lu to mi tayi, ba la lu na mi mate o na orondo tayi, kaa Imi tete la mi fya kiya ingyi kwɛnwu mangyi bwɛɛ. 17 Mu iso iyi ɛnwukumo ɛlɛ, ewo iyi bɔkɔ orondo e so iso gba mi mondo le, moo akwu tayi gba Ɔkwu e so le mo. 18 Kwuwongwu enzu gyɔɔ o kwɛnwu kyamate enzu umba kwudu kwɔlɛ o kwu awu, Imi tete mi kwu. 19 Lunyi lu yi amasa gyɔɔ, akwɛyi lu nyama laa erendo la ɔnyɛ! 20 Lakwu tayi mo kɔ, onzu uwu bɔkɔ e bo te kaa le wo yi enye wu, nana kaa le kyoro yi mo akwɛyi a na yi eduwo mo, nana kaa la zhi yi ma, nana kaa le so yi afyi meyi, lu na wu ewo epo le? 21 Akwa mi kiya ingyi lovya kaa la mi nyama tee kinzu ki wiyi iyi apula ɛnyi tayi iwomo!

Kiya ingyinangyina ingyi onzu uwufo e kwɛnwu mangyi ba, Imi mi kwu tete. Imi mi so iso mate orondo tayi. 22 Umba akwu Iburu le? Imi tete mi kwu Iburu. Umba akwu ɛmɛ umba Isirɛ le? Imi tete mi kwu umɛ uwu Isirɛ. Umba ɔ wɔ mu ɛdɔ iyi Aburamu le? Imi tete mi wɔ ma yi. 23 Umba akwu ɛmɛgba umba Okrasi le? Mi so iso mate ukporishi tayi, tetete mi ka mba ma lɛɛbi mu ɛlɛ! Moo ɛduma iyi mi wo, i ka iyamba ma, moo o ta mi mu ugu ugyi izhi ngbɛ ngbɛ-ɛ, o kpa mi ikpa iyɛkɔkɔ ngbɛ-ɛ, Imi mi ma lukwu mu eyi ba mi ma-a.

24 Azhu ɔ kpa mi ikpa uwekpela la erendo izhɛlɔ; 25 Aroma o kpa mi ikpa izhɛla; kwuye kwukpɛnyi o to mi ekyi. Kwɔda ungwembyi kwu fulo mi mo izhɛla dɛ-ɛ, mi wo awa uwo ekpepo la endo mu risu dɛ-ɛ. 26 Iyɔkpɔɔ mi yi mu luzɛ. Kwuwongwu ɔlɛ, mi fye mu kumbɛ gyɔɔ mbaa risu isama, mbaa awɛlɔ, mbaa ɛmɛnɛ mi Azhu mbala enzu umba bɔkɔ akwu Azhu mo; mu ese ikikɔ ikikɔ, mu akata mbala ɛmɛza umba angba. 27 Kwuye ungufo mi kpondo mo kwuwongu ɛduma; kwuye ungufo mi to afyi gyɔɔ mi ri mo ba mi wo mo; kwuye ungufo mi yi kiya ingyirimo, nana kizɛ ingyi inɔma, nana ekpayi iyi ikpo mɛnwu iyi bɔkɔ i do mi mo mo. 28 Iyi bɔkɔ i kyo mu ɛlɛ lɛɛbi gba akwu ɔlu uwu bɔkɔ u yi mu reshi mi uwu eyi ibɔma mu ɛshɔshi lɛɛbi kwɔfyi kwɔfyi le. 29 Moo uwe bɔkɔ ekpasu i nyɛ wu ma, ba mi mbwa wu ma mo? Uwe bɔkɔ o shi wu e ngbomo, ba mi wo amba mu egbo mi mo?

30 Gba mi kwɛnwu lala, mi kwu mu apula iyi bɔkɔ i zɔ tee mi yi ekpasu iyi iwomo mo. 31 Ki du ɛnyi iyi Ukpo ma iyɔkpɔ, uwu bɔkɔ akwu ete wu Ɔkwu nzu, Ɔzhizɔsi Okrasi awu! moo e yitu te akwu angba gba mi yi mu imuma le mo.

32 Kwuye ungwu mi yi mu kwuse ungwu Ɔdamasikɔ awu, Ɔsu Aretasi a za la ogomina te le shi wa gbomo mu lunzugu undu ɔbɛ uwu kwuse munamuna kaa la fya le yi mi mo. 33 Ɛmɛza mi ba o lo mi mu kibiri ingyɛkwu akwɛyi o wa mi ma mu ɔtu uwu ɔbɛ akwɛyi mi wirima mu ewo wu.