1 Kinzu ki yitu te, gba o ngbɛ ɛnwu nzu ɛlɛ iyi bɔkɔ i yi kyamate kwunu tayi awu ma, Ukpo ee shi nzu kwɔgba ungwoshi ungwu bɔkɔ e mbo mu afyi wu ungwu bɔkɔ ki ŋɔ iyɔkpɔɔ, kwɔgba kwɔlɛ akwu onzu gba e mbo le mo. 2 Moo mu ɛnwu ɛlɛ ki koko ki bɛma te ɔnuna Ukpo e be shi nzu ɛnwu iyoshi kyamate o kpo nzu ekpayi mu ɛnwu tayi. 3 Kwuye ungwu Ukpo e be shi nzu ɛnwu iyoshi, ki ŋɔ la uzhi uwidɔ mo. 4 Moo kwuyengwu bɔkɔ ki yi mu ɛnwu iyi kwudu kwɔlɛ kyamate kwunu awu, ki bɛma ba ki koko ki ma inyashi kwuwongu ki gyi te la ki lafya la ɛnwu iyi kwudu kwɔlɛ mo, kinzu ba ki gyi te Ukpo le shi nzu ɛnwu iyoshi kaa ɛnwu nzu iyi lukwu ɛlɛ lo shi yi kwunyɔ ungwɔkpɔ. 5 Akwu Ukpo mu afyi wu gba e wo nzu le kwuwongu kaa le shi nzu kwunyɔ ungwepo, akwɛyi e shi nzu kwundu Ɔkɛrikɛri kaa li zɔ te uwu ee wo iyi bɔkɔ a zɔ te ee wo ɔnuwu kwɔnyi kwɔlɛ awu.

6 Kwuwo kwɔlɛ, kinzu ki shi egbo ki gba ki nyama te, ta bɔkɔ ki degbo mu ɛnwu nzu ɛlɛ, kinzu ki ndama shaaru mbala Ukpo. 7 Moo luzɛ nzu akwu mu ikwu idu lu fulo, akwu mu iyi bɔkɔ ki ye yi mu imama le mo. 8 Imi mi so yi kpɔ te, kinzu ki shi egbo iyɛkɔkɔ te, i she nzu i ka le gba ki lafya la ɛnwu nzu iyi kwudu kwɔlɛ kaa la ki yi mbala Edego-ala Ɔkwu nzu moshi. 9 Kwuwo kwɔlɛ, akwiyi gba ki yi mu ɛnwu nzu iyi kwudu kwɔlɛ naa akwu ma yi mo, igyima nzu gba akwu te la ki wo iyi bɔkɔ i she wu. 10 Moo kpɛkpɛnzu kii gyirima mu idu iyi Okrasi mbaa ombu ifumo, kaa uwewe la na rigbɛ ingyi kiya ingyi bɔkɔ uwu e wo, iyi bɔkɔ e wo iyeshi naa iyira mu ɛnwu ɛlɛ.

11 Kwuwongwu kinzu ki wiyi iyi Ukpo awu, gba i shi ki za la enzu te lo nyama la ongbulolo le. Ukpo e yi ewo iyi bɔkɔ kinzu ki yi, lunyi tete lu yitu ewo iyi bɔkɔ ki yi mu akɔ yi. 12 Kinzu ki gyi te la ki gba la ki pwɔ ɛnzu ma munyi yi mo, kinzu ba ki gyi te la ki wo ɔgwuzɛ uwu bɔkɔ lu fya lu kwu ɛnwu manzu, kaa lunyi la lu yi opwu uwu igbama la enzu umba bɔkɔ o kwɛnwu mu apula iyi kwudu kwɔlɛ moo akwu iyi bɔkɔ i yi mu egbo mbo mo. 13 Gba akwu kyamate rishi gba ki yi mu ikpomo le, akwu kwuwo ungwu Ukpo. Gba akwu mu iyitu nzu, de ba ki yi mu iwomo kwuwo yi. 14 Moo akwu kwuwo ungwu idɛnyi iyi Ɔzhizɔsi Okrasi gba i shi ki wo iyi bɔkɔ ki yi mu iwomo le, kwuwongu ki yitu te ɔzɛnyi e kpomo kwuwongu enzu lɛɛbi, inyi i zɔ te enzu lɛɛbi o kpomo. 15 Onzu ele e kpomo kwuwongu enzu lɛɛbi, kaa enzu umba o ye la reyi lo zɛ luzɛ undu bɔkɔ ɛnwu mba i gyi kɛɛkyi fo, luzɛ mba lakwu undu lu she la Ɔzhizɔsi uwu bɔkɔ e kpomo, a gba la iyimo kwuwo mbo awu.

16 Kwuwo kwɔlɛ, i na mu ɔnɛ i sheye keyi, kinzu ki yese onzu mate bɔkɔ kwudu kwɔlɛ kwu yese fo. Moo kinzu mekyeki te gba ki yese Okrasi le, kekelele kinzu ki yese wu tayi fo. 17 Kwuwo kwɔlɛ, gba onzu akwu uwu Okrasi, onzu awu akwu onzu uwepo ŋa; apula iyeki i ka-a, iyepo ba i bo-o! 18 Ɛlɛ kpɛkpɛyi i ngyi mbaa Ukpo uwu bɔkɔ e lo nzu mesu mbala wu kwuwongu bɔkɔ ki nyama la Ɔzhizɔsi awu. 19 Iyi bɔkɔ mi yi mu isomo gba i yi te, Ukpo e yi mu ɔgwuzɛ iwomo kaa enzu lɛɛbi lo gba lo lomesu mbala wu kwuwongu ɛduma iyi bɔkɔ Okrasi e wo. Kwuwo kwɔlɛ, Ukpo e yi mbo ombu uwu ingbomo fo akwɛyi e shi nzu ɛduma iyi ilɔ izɛma iyi ilomesu mbala wu. 20 Kekelele, kinzu ki kwu ashikada umba Ɔzhizɔsi Okrasi, iso gba i yi te, Ukpo e yi mu enzu igagyima kwuwongu ilɔ wu iyi bɔkɔ ki yi mu izɛma le. Ki kpa yi ɛshɛku kwuwongu Ɔzhizɔsi Okrasi te, la lu nyama kaa la lu lomesu mbala Ukpo. 21 Ɔzhizɔsi Okrasi e ngbomo ɔnu uwunawuna mo, Ukpo ba e wo wu onzu uwu ingbomo kwuwo nzu lɛɛbi, kaa kwuwongu imɛza nzu mbala Ɔzhizɔsi akwɛyi kii kwu enzu umba bɔkɔ Ukpo a na nzu.