1 Ɛmɛza mi, ta bɔkɔ ki yi iso iyi bɔkɔ Ukpo e so e shi mɛzhi la nzu le, la ki lafya la apula iyinayina iyi bɔkɔ i zhi ɛnwu nzu mbala kwundu nzu ɛnyinyi. La ki wo ɛduma iyi bɔkɔ ii shi ki kwu enzu umba ɔkɛrikɛri umba bɔkɔ o yi iyi iyi Ukpo.

2 La lu pwu idɛnyi nzu mu akɔ yi iyɛkɔkɔ. Kinzu ki ngbomo la onzu uwufo mo mo, kinzu ki shi onzu uwufo a tama mo, kinzu ki kyoro onzu uwufo mo te le shi nzu eduwo mo. 3 Iso iyi mi so yi ele, akwu te mi gyi te la mi za yi te lunyi lu wo iyira le mo; kinzu ki so yi keyi dɛɛ te ki pwu idɛnyi yi mu akɔ nzu gyɔɔ, ki za yi te kinzu ki lu yi afyima gbee mo. 4 Imi mi shi egbo ma yi te lu wo ongbulolo kwuwongu mi kwu ɛnwu ma yi. Mu inyashi lɛɛbi iyi bɔkɔ ki yi mu imama le, ɛnwu mi i ka mi ma gyɔɔ ba mi yi ɔnyɛ uwakwu mu akɔ mi.

5 Moo kwuyengwu bɔkɔ ki bo mu Omasedoniya awu, ɛnwu i gbo nzu mo mo, kinzu ki ma inyashi mu ɛgwuzɛ ikikɔ ikikɔ: Iyi kwonze agewa nzu o towo nzu mo, iyopo iyi i nyɔlɔ nzu ma. 6 Ukpo uwu a ka enzu umba bɔkɔ ɛnwu mba imuma ɛnwu ma awu ba a ka nzu ɛnwu ma kwuye ungwu bɔkɔ Ɔtayitɔ e bo munyi nzu, 7 akwu ibomo wu kɛɛkyi mo, ɛnwu ɛɛkɔ iyi bɔkɔ a fya munyi yi awu, ɛlɛ i kyo i ka nzu ɛnwu ma tete. A za nzu te lu yi mu eyi ifulomo te kaa la lu ma mi, a za nzu te egbo yi i fomo gyɔɔ kwuwongu apula iyi bɔkɔ lu wo mu afyi iyi kembo awu, e so nzu te lu gyi rɛnu mi gyɔɔ, ɛlɛ i shi ɔnyɛ mi uwu kekelele a ka le.

8 Akwiyi gba kwupu ungwu mi ka yi awu kwu wo yi ubu ofya, Imi mi shi ɛmi kwungbɛ mo. Tetete imi mi shi ɛmi kwungbɛ bwɛɛ kwuwongu kwupu ungwu mi ka yi ele, moo mi yitu te kwu wo yi ubwu ofya iyi kwuye bwɛɛ. 9 Imi kekelele mi yi ubwu uruwu, akwu kwuwogu te mi shi yi lu wo ubwu ofya le mo, akwu kwuwongu ubwu ofya yi ele e shi yi lu ta mɛzhi. Ubwu ofya uwu lu wo awu, akwu mu igyima iyi Ukpo, kwuwo kwɔlɛ kinzu ki wo yi kiya ingyi ubwu ofya mo ndii. 10 Moo ubugyi uwu bɔkɔ akwu mu inyama iyi Ukpo, ee shi enzu o gba la luzɛ undepo izɛma undu lu bo la isama, kwuwo kwɔlɛ, ɛngbɛ ishimo mu ɛlɛ te i yi mo. Enzu umba kwudu kwɔlɛ o wo ubugyi uwu bɔkɔ i ka mba la lukwu. 11 Lunyi la lu yese esheshi iyi bɔkɔ ubwu ofya uwu bɔkɔ lu wo mu inyama iyi Ukpo a ka yi : Lu bɔ kwushi mu ongbulolo imbwaluma, lu zɔ enzu te lu kwu enzu umba ira mo, lu wo amba kwuwongu ingbomo iyi bɔkɔ lu ngbo, la iyi iyi bɔkɔ lu wo, la iwomo iyi lu gyi te la lu ma mi, la igyakpɔɔ iyi lu gyi te la lu mbwalu iso mi, akwɛyi enzu umba bɔkɔ o ngbomo lu zɔ mba rɛnu. Mu ɔgwuzɛ uwunawuna lu zɔ ɛnwu yi te lu yi ɔsɛkɛnɛ mu ombu ɔlɛ. 12 Kwuwo kwɔlɛ, kwupu ungwu mi ka yi awu, akwu kwuwongu onzu uwu bɔkɔ e ngbomo awu mo naa kwuwongu onzu uwu bɔkɔ o ngbo wu mo awu mo, imi mi ka yi kwupu kwɔngu kaa la lu zɔngɔma yi ma gedegede mu idu iyi Ukpo te lunyi lu mbwa nzu ma gyɔɔ. 13 Iwomo ɛlɛ i ka nzu ɛnwu ma.

A kwu ɛlɛ kɛɛkyi mo, ɔnyɛ nzu akwu uwakwu kwuwongu Ɔtayitɔ e yi mu ɔnyɛ kwuwongu lunyi lu ka wu ɛnwu ma akwɛyi egbo wu i shi mɛzhi. 14 Moo kenze mi kwu ɛnwu ma yi mu idu wu akwɛyi lunyi ba lu lo mi lovya mo. Iso iyi bɔkɔ mi so yi lɛɛbi awu te gba i yi le, kwuwo kwɔlɛ ɛnwu iyi ki kwu kwuwo yi la Ɔtayitɔ awu, akwu kyaa. 15 Kekelele, e pwu idɛnyi yi a ka le ŋa gba e lolo te lunyi lɛɛbi lu lomo la iso wu, ta bɔkɔ l u na wu mu ewo epo mbala ilomo. 16 Imi mi yi ɔnyɛ kwuwongu mi shi egbo te lu do iyinayina lɛɛbi iwomo ɔnyɛnyɛ.