1 Ugɔ a kpa mi ma te la mi ka yi kwupwu ungwu imbwama la enzu umba Ukpo umba Ozhudiya fo. 2 Moo Imi mi yitu te lunyi lu yi egbo iyi imbwama, Imi ba mi kwu ɛnwu ma yi laa enzu umba Omasedoniya, mi za mba te ɔshɔshi uwu Akaya o yi ɛnwu ma iyi imbwama ngbaa kanu, igyakpɔɔ yi i shi egbo iyi enzu gyɔɔ meka mba i yimo kaa lo wo ɛduma. 3 Kekelele, Imi ba mi lɔ ɛmɛnɛ mbɔlɛ ma kaa ɛnwu ikwumo nzu ma yi la kwu iyi idɔ mo, kaa la lu yi ɛnwu ma kyamate mi zɔ awu. 4 Moo gba enzu umbafo umba Omasedoniya o zɛ mbala mi akwɛyi o ma te lunyi lu yi ɛnwu ma mo, akwu kinzu kɛɛkyi gba lovya lu wo nzu mo le mo, lunyi tete lovya lu wo yi mo kwuwongu ki fulo egbo ma yi. 5 Akwu kwuwo ngwɔlɛ gba mi ka yi te ishoshi te ɛmɛmbɛnɛ lo to keyi la mi lo so kaa la lu yi ɛnwu ma iyi rɛshi ingyi bɔkɔ lu so lu shi mɛzhi te lu shi awu. Akwɛyi akwu rɛshi ingyi bɔkɔ lu shi mu egbo yi ikpɛnyi, moo akwu te o kpa yi mega mo.

6 Lunyi la lu lolo te: Onzu uwu bɔkɔ e so bwɛɛ, a lɔ bwɛɛ, onzu uwu bɔkɔ e so gyɔɔ ba a lɔ gyɔɔ. 7 Onzonzu la ka megbo wu kiya ingyi bɔkɔ e shi, moo lo kpa wu mega dɛ mo, kwuwongu e be shi ɛnwu wu kwungbɛ mo, moo Ukpo a gyi onzu uwu bɔkɔ e shi rɛshi la egbo ikpɛnyi. 8 Ukpo e do te e shi yi kiya ingyi bɔkɔ lu gyi lɛɛbi kaa la lu yi kiya gyɔɔ kwuyengwunaguna akwɛyi lu wo ɛduma iyesheshi. 9 Kyamate bɔkɔ kwokpo ungwu Ukpo kwu zɔ, te:

<<A ka rɛshi wu laa ayirewa;

Ototo wu e yi iyɔkpɔɔ.>>

10 Ukpo uwu bɔkɔ e koko e shi ewiri laa anegba kaa lo somo awu, ba a gba e shi mbo kiya ingyirimo kaa lo ri awu, Ukpo awu tete e shi kaa la lu yi kiya gyɔɔ, kaa la lu fya esheshi kwuwongu ototo uwu bɔkɔ lu wo awu. 11 Ukpo e shi yi esheshi wu mu ɔgwuzɛ uwunawuna kwuwongu ɛduma iyi imbwama la enzu umbafo iyi bɔkɔ lu yi mu iwomo awu akwɛyi ɛlɛ i shi enzu kaa lo gbɛlɛ Ukpo ɛnyi kwuwongu kiya ingyi bɔkɔ lu wo mbo awu.

12 Lunyi la lu lolo te gba lu shi kiya lu mbwa la enzu umba Ukpo ma awu, akwu te lu sa mba igɔ mba ma kɛɛkyi mo, kwuwongu kiya ingyi bɔkɔ lu wo awu, enzu o gbɛlɛ Ukpo ɛnyi gyɔɔ tete. 13 Mu iwomo yi iyi rɛshi ishimo ngyɛlɛ te, enzu o du Ukpo ma kwuwongu lu na iso iyi Ukpo akwɛyi lu mbwalu yi, akwɛyi lu gba lu ka apula iyi bɔkɔ lu yi yi awu ma megbo ikpɛnyi mbala enzu umba bɔkɔ o yi igɔ mbala enzu lɛɛbi. 14 Akwɛyi kwuyengwu bɔkɔ o lɛ Ukpo kwuwo yi, o zɔ te o pwu idɛnyi yi gyɔɔ, kwuwongu esheshi iyɛku iyi bɔkɔ Ukpo e shi yi awu. 15 La ki gbɛlɛ Ukpo ɛnyi kwuwongu rɛshi ingyi bɔkɔ onzu e do ngyi i zɔma mo!