1 Ɛlɛ akwu imi Ɔpɔlu onzu u zilɔ iyi ɔzhizɔsi Okrasi mu inyama iyi Ukpo, mbala umanyi nzu Otimoti.

Ki kakwupu kwɔlɛ ki ka yi lunyi enzu umba ɔshɔshi uwu Ɔkɔrɛti mbala enzu umba Ukpo lɛɛbi umba bɔkɔ o yi mu Akaya:

2 Ukpo ete nzu mbala Ɔzhizɔsi Okrasi Ɔkwu nzu le shi yi esheshi mbala idigbomo.

3 La ki du Ukpo ete wu Ɔkwu nzu Ɔzhizɔsi Okrasi ma, Ada uwu bɔkɔ a ma eyembembyi nzu, Ukpo uwu bɔkɔ e shi nzu egbo mɛzhi lɛɛbi awu. 4 Ukpo ele gba e gbo nzu idu mo mu inyashi nzu lɛɛbi, kaa umba bɔkɔ o yi mu inyashi imama awu, kinzu tete la ki gbo mbo idu mo mu idigbomo iyi bɔkɔ ki fya mbaa Ukpo awu. 5 Moo ta bɔkɔ inyashi iyi Okrasi i du nzu awu, te gba idigbomo iyi Okrasi i zɛ ma nzu le tete. 6 Akwiyi gba kinzu ki ma inyashi akwu kwuwo yi, kaa la lu fya idigbomo mbala isama le; Akwiyi gba Ukpo e gbo nzu idu mo, akwu kwuwo yi, kaa la lu fya idigbomo tete, akwɛyi lu yidu mbala idu kwɔku mu inyashi imama kyamate kinzu te. 7 Moo kinzu ki shi egbo ma yi ngiri, kyamate bɔkɔ lu ma inyashi mbala nzu awu, te gba lu fya idigbomo mbala nzu le tete.

8 Ɛmɛnɛ mi ki gyi te la lu yitu iyi inyashi iyi bɔkɔ ki ma mu ɛzhi iyi Eshiya awu. Inyashi ɛnyi i ga nzu ma, kinzu lala ki yitu te ki ŋi yi kwunyɔ fo. 9 Mu egbo nzu i yi te o ranzu o ta la lukwu kego. Ɛlɛ ba i wo te kaa la ki fulo idu mu ɛnwu nzu mo, la ki fulo idu mu Ukpo uwu bɔkɔ ee shi enzu umba bɔkɔ o kpomo kwunyɔ awu. 10 Ukpo uwu bɔkɔ a wanzu ma mu riyi ingyi lukwu undura awu, uwu gba a sa nzu ma le. Ki shi egbo mawu kpɔ te a sa nzu ma ngbɛɛ. 11 Lunyi la lu mbwa nzu ma mu Ukpo ilɛma, akwɛyi Ukpo a pwa yi, ba ee shi nzu esheshi wu, inyi ii shi enzu gyɔɔ ɔ du wu ma.

12 Kiya ingyi ki bɔma mangyi gba akwu tee: Egbo nzu i za nzu te ki zɛ luzɛ marimari mbala yi mu egbo ikpɛnyi iyi bɔkɔ i ngyi mbaa Ukpo awu. Ukpo gba e shi nzu ekpasu kaa la ki wo ɛlɛ le, moo akwu amasa iyi kwudu kwɔlɛ mo. 13 Moo kiya ingyi bɔkɔ lu wa ngyi kego bɔkɔ lu zɔngɔma ngyi ma gba ki ka ki ka yi le. Imi ba mi shi egbo tee, 14 tabɔkɔ lu du mbwa nzu izɔngɔma mo awu, kwuye ba kwu yi mu inyɔma bɔkɔ lu zɔngɔma nzu ma akwɛyi lu bɔma ma nzu, kyamate bɔkɔ ki bi bɔma ma yi mu kwɔfyi ungwu igbama ungwu Ɔzhizɔsi Ɔkwu nzu tayi.

15 Kwuwongwu mi yi egbo ɛlɛ shɛ awu, mi gyi te la mi bo munyi yi keyi dɛ ka la lu fya esheshi izhepo. 16 Mi ka te mi nyɔ kaa la mi ma yi dɛ kwuyengwu mi sheye mu Omasedoniya, mi gba mi zɛ munyi yi kpɔ mu igbama mi, kaa la mi fya imbwama munyi yi akwɛyi mi zɛ mi re mu Ozhudiya. 17 Kwuye ungwu bɔkɔ mi ka amasa ɛlɛ awu mi to yi la ɛnɛ mo, nana mi ka yi mate enzu umba bɔkɔ o yitu iyi Ukpo mo awu mo, bɔkɔ oo za ŋa te, <<Ee,Ee>> mu egbo mbo ba akwu <<Ayimo>> awu.

18 Mate bɔkɔ Ukpo akwu u wo ongbulolo awu, iso iyi ki so yi ele akwu iso iyi kwu kyoro mo. 19 Moo Ɔzhizɔsi Okrasi umɛ uwu Ukpo, uwu bɔkɔ imi mbala Osalasi mbala Otimoti ki ta yi anu wu awu, akwu onzu uwu kwukyoro mo. 20 Moo iso ribariba iyi bɔkɔ Ukpo e so e shi mɛzhi awu, kpɛkpɛyi i nyɔlɔma mu Ɔzhizɔsi Okrasi. Mu ɛnyi iyi Ɔzhizɔsi Okrasi gba ki zɔ te <<Li yi tayi>> le akwɛyi Ukpo a fya iduma. 21 Ukpo gba e shi te kinzu mbala yi la ki rima ngiri mu Ɔzhizɔsi Okrasi imbwaluma le, akwɛyi a ŋa nzu lɛwu, 22 akwɛyi e wo nzu kɛzɔ kaa la ki kwu umba wu, akwɛyi e shi kwundu wu mu egbo nzu kaa la ki yitu te iyi bɔkɔ e so e shi mɛzhi kpiri awu ee wo yi mo.

23 Ukpo akwu uzɔgɔ mi te akwu kwuwongu kaa la mi lo yi inyashi fo, gba mi gba mi zɛ mu Ɔkɔrɛti mo le. 24 Akwu te ki kpa yi mɛga mu iyi lu mbwalu mo, kinzu ba ki wo ɛduma kya mbala yi kaa la lu yi ɔnyɛ, moo akwu mu ikwu idu lu fulo yi gba lu rima ngiri le.