1 Kwuwo ngwɔlɛ ta bɔkɔ Ukpo a ma eyembembyi nzu akwɛyi a ra la ɛduma ɛlɛ e shi nzu le, egbo nzu i pulama mo. 2 Kinzu ki lafya la ɛgwuzɛ iyi invyemo mbala iyi eseye; Ki wo kiya ingyi kwukyoro mo, ba ki yoro iso iyi Ukpo mo mu kiya ingyifo mo. Kiya ingyi ki wo gba akwu te, ki wa la ongbulolo uwu Ukpo kwudu kaa uwewe la ma yi mu egbo wu midu iyi Ukpo. 3 Ilɔ iyesheshi nzu ɛlɛ invyemo mo, mɔgɔ wu enzu mba bɔkɔ o yi mu itomo gba invye mo le. 4 Onzu uwoyi uwu bɔkɔ akwu ɔsu uwu kwushi kwɔlɛ awu, e koko eyi iyi mba bɔkɔ o mbwalu Ɔzhizɔsi ma kaa lo ma ɛbɛ iyi ilɔ iyesheshi iyi inzumbɛku iyi Okrasi uwu bɔkɔ akwu kya mbala Ukpo awu mo. 5 Moo anu iyi ki ta le akwu iyanzu mo, akwiyi Ɔzhizɔsi Okrasi uwu bɔkɔ akwu Ɔkwu le, kinzu ba ki kwu ɛmɛgba yi kwuwongu Ɔzhizɔsi. 6 Moo Ukpo uwu bɔkɔ a zɔ te, <<Ɛbɛ li wɔ meka iyi ipwu kaa li lemo,>> awu gba e shi kaa ɛbɛ wu li lemo mu egbo nzu kaa li shi nzu ɛbɛ iyi iyitu iyi inzumbɛku iyi Ukpo mu ɛduma iyi Ɔzhizɔsi Okrasi le.

7 Kinzu ba ki yi ilɔ iyesheshi iyi bɔkɔ i yi kyamate kiya ingyeshi te, iyi bɔkɔ i yi meka nzu umba ki yi kyamate kɛwu unga lo mbo te le, ɛlɛ i zɔ te ekpasu iyi i gama ɛlɛ i ngyi mbaa Ukpo moo akwu mbaa onzu mo. 8 O kpa nzu ma iyɛkɔkɔ mu kwuko ungwunanguna, ba o shɛkɛ nzu ma mo; Ki lomo zhigaa, ba ki wiyi mo; 9 O lo nzu inyashi, Ukpo ba a lu nzu afyima mo; O kpa nzu apula ba ki kpomo mo. 10 Ki koko ki yi mu kwumbɛ ungwu lukwu kwuwongu Ɔzhizɔsi , kaa kwunyɔ wu la kwu zɔ mu ɛnwu nzu tete. 11 Moo kinzu umba bɔkɔ ki yi la reyi le, o ra nzu o shi iyɔkpɔɔ kaa lo ngbɛ nzu ma kwuwongu Ɔzhizɔsi, kaa luzɛ undu Ɔzhizɔsi la lu zɔ mu luzɛ nzu tete. 12 Kwuwo ngwɔlɛ, lukwu lu yi mu ɛduma iwomo ma nzu, kwunyɔ ba kwu yi mu ɛduma iwomo meka yi.

13 Kwokpo ungwu Ukpo kwu zɔ te: << Imi mi kwu idu lu fulo mawu; Gba i shi mi siso le.>> Mu ɔgwuzɛ ɔwu gba kinzu ki shi egbo nzu akwɛyi ki siso le, 14 Moo ki yitu te Ukpo uwu bɔkɔ e yi Ɔkwu nzu Ɔzhizɔsi ma mu lukwu awu, ee yi kinzu mbala yi ma tete kyamate bɔkɔ e yi Ɔzhizɔsi ma awu akwɛyi a nya nzu midu wu. 15 Ɛlɛ lɛɛbi akwu kwuwo yi, kaa esheshi iyi Ukpo iyi bɔkɔ i yi mu ifulama mbaa enzu munamuna awu, li wo kaa enzu lo du Ukpo ma akwɛyi o gbɛlɛ wu ɛnyi gyɔɔ.

16 Kwuwo ngwɔlɛ egbo nzu imuma mo. Kwokpo ungwu ɛnwu nzu la kwu yi mu ivama tetete lala, kwundu uwu Ukpo uwu bɔkɔ e yi ma nzu le ee shi nzu ekpasu kwɔfykwɔfyi. 17 Moo inyashi iyi bɔkɔ ki yi mu imama le akwu iyɛri mu kwuye bwɛɛ byi, ɛlɛ gba ba i nya nzu la inzumbɛku iyɔkpɔɔ iyi bɔkɔ i ka inyashi ɛnyi ma lɛɛbi gyɔɔ le. 18 Kwuwo ngwɔlɛ ki shi egbo nzu mu kiya ingyi bɔkɔ eyi i mangyi mo awu, moo akwu mu kiya ingyi bɔkɔ eyi i mangyi le mo. Moo kiya ingyi bɔkɔ eyi i mangyi, aakwu ingyi kwuye bwɛɛ byi, ingyi bɔkɔ eyi i mangyi mo awu ba akwu ingyi ɔkpɔɔ.