1 Enzu umbafo meka yi o kpa mi ɔfɔ uwu iso isomo kwuyengwu mi yi mbala yi, kwuyengwu mi yi mbala yi mo ba mi ka kwupwu la ekpasu. Imi ba mi kpa yi ɛshɛku mu ɛnyi iyi Okrasi uwu e yi egbo mɛzhi mbala ari iyeshi te, mi gyite la mi za yi te Imi mi kwu onzu u wo ovyo mo mu kwuyengwu bɔkɔ ki kpolesu. 2 Enzu umbafo o zɔ te kinzu ki wo apula kyamate enzu umba kwudu tayi, kwuwo ngwɔlɛ gba mi bomo mi so mbo iso la ekpasu, shɔɔkɔ la lu shi mi kaa la mi wo yi tayi tete mo. 3 Kinzu ki yi mu kwudu kwɔlɛ kego, ba ki wo kyamate enzu umba kwudu mo. 4 Ewulo iyi ewa nzu i yi kyamate iyi kwudu mo. Ewulo iyi ewa nzu ingyi mbaa Ukpo, i yi ekpasu iyi i shɛkɛ kizɛ ingyi agewa umba Ukpo ma. 5 Iso iyi lɔmbwu mbala iso iyinayina iyi bɔkɔ i se iso iyi Ukpo mo ki shiriyimo, akwɛyi ki kyo ki yi egbo iyi enzu ma kaa lo lomo la Okrasi. 6 kwuyengwu bɔkɔ ki mbwalu iso wu lɛɛbi, akwɛyi ki yi ɛnwu ma kaa la ki tu enzu umba bɔkɔ o towo iso wu mo.

7 Lunyi lu yese kwudu ungwu kiya bi. Gba onzu e yitu ngboro te uwu akwu uwu Okrasti, uwu le yitu te kinzu ki kwu umba Okrasti tete. 8 Moo imi mafyi mi akwa mi kiya ingyi lovya mo, gba mi kwu ɛnwu kwuwongu idomo iyi bɔkɔ Ɔkwu e shi nzu, idomo ɛlɛ akwu kwuwongu kaa la ki mbo yi mo, Akwu te kaa la ki shiriyimo mo. 9 La lu ma te mi ye yi mu iyi ilomo mu kwupwu ungwu bɔkɔ mi ka mi ka yi le mo. 10 Enzu umbafo yi o zɔ te, <<Iso iyi bɔkɔ Ɔpɔlu a ka mu epu wu iyɔlu, i gba i yi ekpasu, ɔbulɛ ŋa gba e yi mbala enzu, e yi umwɔ mo, iso wu ba o to yi la ɔlu mo.>> 11 Enzu mbamba tayi lo yitu te, apula iyi bɔkɔ ki ka mu epu nzu kwuyengwu bɔkɔ ki yi mbala yi mo awu, inyi gba ki zɔ yi le kwuyengwu bɔkɔ ki yi mbala yi. 12 Kinzu ki do te ki manda ɛnwu nzu mbala enzu umba bɔkɔ o pwɔ ɛnwu mba ma awu mo. Enzu umba bɔkɔ o mala esu, akwɛyi o manda ɛnwu mba mbala esu akwu erendo. 13 Kinzu ba ki kwu ɛnwu iyi ɛduma iwomo mekeka iyi enzu umba bɔkɔ akwu enzu umba Ukpo mo mo, ɛnwu ikwumo nzu akwu mu ɛduma iyi Ukpo e shi nzu ekpasu te la ki wo mekeka yi. 14 Kinzu gba ki kwu enzu umba bɔkɔ ki ka yi la ilɔ iyesheshi iyi Okrasi keyi la uwewe le, kwuwo kwɔlɛ ɛnwu ikwumo iyi bɔkɔ ki yi mu ikwumo mekeka yi ele akwu pwa. 15 Kinzu ba ki kwu ɛnwu mu ɛduma iyi bɔkɔ enzu umbafo o wo mo. Eyi ifulomo nzu i yi te, ta bɔkɔ ikwu idu lu fulo yi i le mu ibulɔma, ɛduma nzu mekeka yi ba ii kyomo tete. 16 Akwɛyi kinzu ki zɛ ilɔ iyesheshi iyi Okrasi mu ɛzhi iyifo iyi bɔkɔ akwu ɛzhi yi mo, moo ki gyi te la ki kwu ɛnwu mu ɛduma iyi bɔkɔ enzu umbafo o wo mu ɛzhi iyi bɔkɔ akwu iyamba mo. 17 Kwokpo ungwu Ukpo kwu zɔ te, <<Gba onzu e kwu ɛnwu, de ba le kwu ɛnwu mu Ɔkwu.>> 18 Moo akwu onzu uwu bɔkɔ a pwɔ ɛnwu wu ma gba o nyama la wu le mo. Onzu uwu bɔkɔ Ukpo a pwɔ wu ma gba o nyama la wu le.