1 Ɛnwu ikwumo ɛlɛ te i mbwama la uwewe mo, tetete mi kwu yi. Imi mi ŋi so apula iyi Ɔkwu Ɔzhizɔsi Okrasi a zɔ mi mu ɛbɛ. 2 Lɔri luwo la londo undu lu kama le, mi yi onzu uwufo u mbwalu Okrasi uwu bɔkɔ o to wu o kawa mosho-oshi mbaa bɔkɔ Ukpo e yi le. Shi akwu ɛnwu wu gba o to yi le, nana akwu kwundu wu gba o to ngwu le, mi yitu mo, Ukpo gba e yitu le. 3 Imi mi yitu iyi onzu ele,shii akwu ɛnwu iyi onzu ele, nana kwundu wu gba o to le, mi yitu mo, Ukpo kɛɛkyi gba e yitu le, 4 iyi mi yitu gba i yi te Ukpo e to wu mo a kawa mu oparadasi. Mɔmɔ a pwa iso iyi bɔkɔ onzu uwu inyi igyi e do yi isomo mo, ba ɔ nyama te onzu le so yi mo. 5 Onzu awu tayi gba mi kwɛnwu ma wu le. Imi ba mi kwɛnwu mu ɛduma mi mo. Shii mi kwɛnwu ba mi kwu mu apula iyi i zɔ ifɔma mi. 6 Gba mi gyi te la mi kwɛnwu lala, mi wo mate orondo mo, kwuwongu mi so yi ongbulolo. Imi ba mi ŋi nyama te la mi kwɛnwu mo, moo mi gyi te enzu lo to mi la ɔlu uwu bɔkɔ u ka ɛduma iyi mi wo nana iso iyi mi so awu ma mo.

7 Kwuwongwu kaa la mi kwɛnwu mu apula iyi izele iyi Ukpo a zɔ mi mu ɛbɛ mo, o bɔ mi kiya kyamate owula uwakwu mu ɛnwu mi, o kyo ɔ lɔ ɔlɔgbulɔ uwu onzu uwoyi kaa le koko le lo mi inyashi kaa la mi kwu ɛnwu mo. 8 Imi mi kpa Ɔkwu Ɔzhizɔsi Okrasi ɛshɛku izhɛla te le to mi inyashi ɛlɛ ma. 9 Uwu ba a za mi te, <<Esheshi mi i do ŋɔ mo, moo ɛlɛ gba i zɔ ekpasu mi gedegede le.>> Kwuwo ngwɔlɛ, mi gyakpɔɔ mu ɛnwu ikwumo mu apula iyi bɔkɔ i mu mi ekpasu ma kaa ekpasu iyi Okrasi li koko li yi mbala mi iyɔkpɔɔ. 10 Akwu kwuwo ngwɔlɛ gba mi mwɔnyɛ mbala inyɛma iyi ekpasu mi, mbala ari iyi enzu ɔ kpa mi, mbala inyashi iyi enzu o lo mi kwuwongu ɛnyi iyi Okrasi le. Moo kwuyengwu ekpasu mi i fɔma gba mi fya ekpasu mbaa Ɔzhizɔsi le.

11 Lunyi lu shi mi wo ɛmi orondo. Imi mi kwu kiya kinyinyi mo, tetete i fate la lu pwɔ mi ma, moo <<wa zɛ ilɔ umba angba>> mbɔlɛ o koshi la mi mo. 12 Apula iyi bɔkɔ i zɔ te onzu ele akwu uzilɔ uwu Ukpo gba akwu: Lɔzɔ undu izele mbala apula iyi amɛ iwomo le. Ɛlɛ lɛɛbi ba mi yidu akwɛyi Ukpo e shi mi wo yi mekeka yi. 13 Mu ɔgwuzɛ uwuna bɔkɔ mi zɔ yi te lunyi lu ba ɛshɔshi iyifo mo? Nana kwuwongu bɔkɔ mi na eduwo mbaa ɛshɔshi iyifo ɛlɛ kaa la mi wo ɛduma le ŋa? Mi gyi te la mi fulo yi ɔlu mo le bi. lu ma te mi ngbo yi mo mu ɛlɛ de, ba la lu gba yi kpa mi!

14 Lunyi la lu pwa! Imi mi yi mu iwomo kaa la mi bo munyi yi izhi ungwɔla kpɔ. Gba mi bo, mi ŋi fulo yi ɔlu mo. Mi ŋi nyɔ kwuwo yi, moo akwu kwuwongu kiya ingyi kwuwo yi mo. Umbada mbala umbɛnɛ gba ifate lo shi kiya mɛzhi la ɛmɛ mba le, moo akwu ɛmɛ gba o shi kiya mɛzhi la umbete mbo mbala umbanyimba le mo. 15 Kwuwo ngwɔlɛ, i shi mi ɔnyɛ gyɔɔ kaa kiya ingyi mi yi ngyi lɛɛbi la mi ngbɛ ngyi ma kwuwo yi, mi kyo mi ra la ɛmi mi shi yi tete. Shii bɔkɔ mi kpo lukwu yi gyɔɔ te le, lunyi ba lu kpo undami bwɛɛ mo?

16 Imi mi yitu lu nyama te mi fulo yi ɔlu mo, tetete, enzu umbafo ɔ zɔ te Imi mi kwu u kyoro enzu kaa la mi na mba kiya ma. 17 Mɛmi iyi enzu umba mi lɔ mba ma munyi yi ele, onzu uwu mi lɔ wu kaa la na kiya munyi yi mu amasa e yi? 18 Mi za la Ɔtayitɔ te le so munyi yi, akwɛyi mi lɔ umanyinzu u mbwalu kaa la zɛ mbala wu. Ɔtayitɔ e ri yi ozawu re? A kwu ɔgwuzɛ ukpɛnyi gba ki mbwalu gba ki wo mbala yi le mo re?

19 Lunyi lu yi mu egbo ibyima te iso iyi ki so ngbɛɛ le, akwiyi ki gyi te la ki gbɔ enzu ma munyi yi le? Ɛmɛza mi, iso iyi ki so le, a kwiyi enzu wa mbwalu Ɔzhizɔsi Okrasi, ba akwu mu idu iyi Ukpo gba ki yi mu isomo le; Kiya ingyinangyina ingyi ki wo, ki wo te kaa la ki kyo yi ekpasu ma le. 20 Iyi mi gba i yi te kwuyengwu mi bi nyɔ munyi yi awu, igbomo mi du yi mu luzɛ undu mi gyi mo, lunyi tete igbomo lu gyi kiya ingyi mi bi wo mo. Mi wiyi te igbomo mi du yi mu itumo, mu anya iwomo iyi esu, mu amba umbira iwomo, mu ikama, mu iso iyira isomo iyi esu, mu esu ikyɛma mbala i zɔ i ka le mbala kizɛ i fo yika munamuna. 21 Imi mi wiyi te kwuyengwu mi bi nyɔ munyi yi kpɔ, lovya lu wo mi mo mu idu iyi Edego-ala uwu mi mbwalu kwuwongu luzɛ yi. Mi nyima gyɔɔ kwuwongu enzu umba bɔkɔ o ngbomo dɛ-ɛ ba o towo i ta mɛzhi, ba o degbo mu apula iyi kashi iwomo mbala iyama mbala ekweyi iyi iyama iyi o yi ma yi mekyekyi awu.