1 Ɛmɛmbɛnɛ mi, ki gyi te la lu yitu iyi esheshi iyi bɔkɔ Ukpo e shi ɔshɔshi uwu kwuse ungwu Omasedoniya. 2 O pwa mba ma, o lo mbo inyashi mu ɛgwuzɛ ikikɔ ikikɔ, la rewa mba mbala inyashi mba, tetete ɛlɛ i nyi mba rɛshi iwomo laa ɔnyɛ mu egbo ikpɛnyi mo. 3 Moo mi so yi te o shi kiya ingyi bɔkɔ o yi ngyi lɛɛbi, ingyi bɔkɔ o shi le lala ri ka ingyi bɔkɔ enzu o fulo eyi mo. O shi ɛlɛ lɛɛbi mu egbo mbo ikpɛnyi. 4 O kpa nzu ɛshɛku te la ki shi mbo kapa kaa umba tete lo lo kwuwo mu ɛduma ɛlɛ, iyi imbwama laa wa mbwalu umba kwuse ungwu Ozhudiya ma. 5 Ɛlɛ i ka nzu meyi, moo i yi kwonze o to ɛnwu mba o shi Ɔkwu keyi dɛ akwɛyi mu inyama iyi Ukpo o ra la ɛnwu mba o shi nzu tete. 6 Akwu kwuwo kwɔlɛ gba ki za la Ɔtayitɔ te le so wu mu ɛduma iyi rɛshi inama mbaa wa mbwalu, moo uwu gba e ye la ɛduma ɛnyi iwomo le. 7 Kyamate bɔkɔ lu wo marimari mu ikwu idu lu fulo, mu iso isomo, mu ilukwu, mu igyakpɔɔ mbala mu idɛnyi iyanzu awu, la lu kyakpɔ kaa la lu wo marimari mu rɛshi iwomo tete.

8 Imi mi ye yi mu ɔkpa itama mo, imi mi gyi te la mi zɔ yi te umbafo gyɔɔ o yi mu igyakpɔɔ te umba tete lo mbwama, ɛlɛ gba i zɔ te idɛnyi yi akwu mu egbo ikpɛnyi naa akwu mu egbo ikpɛnyi mo ŋa. 9 Moo lunyi lu yitu iyi esheshi iyi Ɔkwu nzu Ɔzhizɔsi Okrasi. U wu akwu onzu uwu bɔkɔ e yi kiya ingyinaingyina moshi ɔbulɛ ŋa kwuwo nzu a vindɔ ɔyirewa kaa kwuwongu rewa wu kaa la fya kiya ingyinaingyina mbaa Ukpo.

10 Kwuwo kwɔlɛ mi ta yi amasa te: Ishoshi kaa la lu mbwa ɛduma iyi bɔkɔ lu ye kanu awu ma, akwu kwuwongu bɔkɔ lu kwu enzu umba kwonze mu ishimo le kɛɛkyi mo, ikyo kwuwongu lu yi yi mu egbo yi te lu wo tayi le. 11 Kekelele lunyi la lu mbwa ɛduma iyi bɔkɔ lu ye awu ma, kaa li zɔ igyikpɔɔ yi mu ɛduma ɛnyi imbwama. 12 Gba onzu e yi egbo iyi bɔkɔ e shi rɛshi, Ukpo a na rɛshi ngyɛngyi ma kwuwongu e shi mu kiya ingyi bɔkɔ e yi ngyi mu egbo ikpɛnyi, moo akwu mu kiya ingyi bɔkɔ e yi ngyi mo mo.

13 Mi ye mu isomo te lalu fulo ɛnwu yi ewulo kaa la lu gyi iyi enzu umbafo ma mo. Imi mi gyi te ewulo yi la lu ka yi ma kyakya. 14 Mu kwuye kwɔlɛ apula yi iyi bɔkɔ lu yi yi gyɔɔ awu la lu ka yi ma mbala enzu umba bɔkɔ o yi igɔ, akwɛyi kwuyengwu bɔkɔ lunyi lu yi igɔ umba tete o ka iyi bɔkɔ umba o yi yi gyɔɔ awu ma mbala yi. Mu iwomo ɛlɛ te i shi onzonzu a fya kiya kyakya. 15 Kyamate bɔkɔ kwokpo ungwu Ukpo kwu so te: <<Onzu uwu bɔkɔ a kpala ɛlu gyɔɔ e yi ngyi gyɔɔ mo, onzu uwu bɔkɔ a kpala ɛlu bwɛɛ ba e yi ngyi bwɛɛ mo.>>

16 Mi gbɛlɛ Ukpo ɛnyi kwuwongu egbo iyi Ɔtayitɔ mbala iya mi, i yi kya mbaa imbwama iya yi. 17 Ki za wu te le so munyi yi akwɛyi a nyama, uwu mafyi wu i yi mu egbo wu kaa le so munyi yi keyi dɛ. 18 Ki lɔ umɛnɛ uwufo uwu bɔkɔ ɛshɔshi lɛɛbi i lo wu mo kwuwongu ɛduma iyi anu itama wu awu kaa la zɛ mbala wu. 19 Akwu ɛnyi kɛɛkyi mo, ɛshɔshi lɛɛbi ba i ŋa wu kaa la zɛ mbala nzu kwuyengwu bɔkɔ ki re laa rɛshi ingyi bɔkɔ o shi awu kaa li inzumbɛku iyi Ukpo kaa li zɔ te ki yi egbo iyi imbwama. 20 Ki gyi te la ki wo bɛtɛ kaa enzu lo pe nzu ari kwuyengwu rɛshi ngyɛngyi ikama mo. 21 Moo iya nzu gba akwu te la ki wo ingyi bɔkɔ ki shoshi, lakwu mbaa Ɔkwu nzu kɛɛkyi mo, lakwu mbaa enzu tete.

22 Kwuwo kwɔlɛ, ki lɔ umanyi nzu ma kaa la zɛ mbala mba. Ki pwa wu ma kwuye riba riba akwɛyi ki ma te e yi egbo iyi imbwama. Kekelele ba e fulo eyi ma yi, inyi gba i kyo wu ekpasu ma kaa la mbwama mu ɛduma ɛlɛ. 23 Ɔtayitɔ akwu onzu u kpa mi lɛnwu mbala u wo ɛduma mbala mi meka yi, ɛmɛnɛ umbafo mbamba umba bɔkɔ o sheyimo mbala wu awu ba o rikwunzu ungwu ɛshɔshi kaa enzu lo du Okrasi ma kwuwongu ɛduma mba. 24 Kwuwo kwɔlɛ, la lu zɔ mba idɛnyi yi kaa ɛshɔshi lɛɛbi lo nyama la yi kaa lo yitu te ɛnwu iyi bɔkɔ ki kwu ma yi ele akwu iyesheshi.