1 La lu ma te kinzu ki gyi te la ki pwɔ ɛnwu nzu ma mo, ugɔ ba a kpa nzu kaa lo kakwupu ungwu izɔma lo ka yi nana kwupu lakwu wɔ munyi nzu kyamate umbafo tayi mo. 2 Lunyi lu yi kyamate kwupu ungwu bɔkɔ o ka ngwu ma mu egbo nzu tayi, enzu umbanambana oo wa akwɛyi ɔ zɔngɔma yi ma. 3 Lunyi lunyi kyamate kwupu ungwu bɔkɔ Okrasi a ka bɔkɔ a lɔ nzu ma tayi, akwu mu embyi umba keshi gba o ka le mo, o ra la Kwundu uwu Ukpo uwu bɔkɔ e yi la reyi gba o ka le, ba akwu te o ka yi mu kwɔbɛ mo, mu egbo iyi enzu gba o ka yi le.

4 Kinzu ki so ɛlɛ kwuwongu ki kwu idu lu fulo mu Ukpo meka iyi Ɔzhizɔsi Okrasi. 5 Akwu te ki yi ekpasu iyi kiya kinyinyi iwomo la ɛnzu le mo, ekpasu nzu i wɔ mbaa Ukpo. 6 E shi nzu ekpasu kaa la ki wo ɛduma iyi kenzu igyirima ungepo, moo akwu ɛrama iyi Omosisi iyi bɔkɔ o ka yi ma awu mo, akwu iyi Kwundu; Ɛrama i bo la lukwu, Kwundu ba e shi onzu kwunyɔ.

7 Kwuye ungwu bɔkɔ o shi Omosisi ɛrama iyi o ka yi mu kwoki kwu pɛtɛkɛ awu, i bo la inzumbɛku iyi Ukpo, ilemo yi eyi iyi Omosisi iyi bɔkɔ iyi mu isɛma-a lala enzu umba Izirɛ o yese yi ego mo, 8 ɛduma iyi bɔkɔ Kwundu uwu Ukpo gba e to keyi yi le, i yi inzumbɛku i ka le moo? 9 Ɛduma iyi ɛrama iyi Omosisi iyi bɔkɔ i bo la lukwu lala i yi inzumbɛku, i bi gyi ɛduma iyi bɔkɔ i bo la isama! 10 Tabɔkɔ iyi i ka inzumbɛku ma i bo, inzumbɛku iyekyi ɛnyi i kama. 11 Moo gba iyi bɔkɔ i sɛma le i yi inzumbɛku te, iyi bɔkɔ i sɛma mo i ka inzumbɛku le mo?

12 Kwuwongwu ki yi eyi ifulomo ɛlɛ te awu, gba ki wiyi mo le. 13 Kinzu ki yi kyamate Omosisi mo, uwu bɔkɔ a wɛ kiya meyi kaa ɛmɛ umba Izirɛ lo ma eyi wu iyi bɔkɔ iyi mu i sɛma awu mo. 14 Ta ɔnɛ te egbo mbo i yi ipwu kpɔ, moo kwuyengwu bɔkɔ o wa ekpo iyi kenzu igyirima ungekyi, o zɔngɔma yi ma mo. Moo mu Okrasi gba eyi i wuma le. 15 Ta ɔnɛ te gba o wa ɛrama iyi Omosisi ma, o zɔngɔma yi ma mo, moo kiya ki wɛ mu egbo mbo i degbo kpɔ. 16 Enzu umba bɔkɔ o gba o mbwalu Ukpo ɔnɛ te ba ipwu i pyama mu egbo mbo. 17 Moo Ukpo akwu Kwundu, munamuna bɔkɔ Kwundu uwu Ukpo e yi, a wa la enzu mo mu rinye. 18 Akwɛyi kinzu umba bɔkɔ eyi nzu i yi mu ipwu fo le, ki zɔ inzumbɛku iyi Ɔkwu ma ŋa, kinzu umba bɔkɔ Ukpo e wo nzu kyamate ɛnwu wu te awu, mu inzumbɛku iyɛku iyi bɔkɔ i ngyi mba Ɔkwu uwu bɔkɔ akwu Kwundu awu.