1 Mma bila de ku shina yiri pama ANKI de mu yi a kiya ku nja ntani Lodokiya, nja guru worede su taba geni ndani na ba. 2 so na e shiya ma de su samu sori guyam nja de su yada kiya su a siki so, de su mani tebeshi ni gane de mani gaskye. A turiki yomuna sua shina mbode ma boyi anya Mirikisi, de ma Kiristi nkiyeyi, 3 Yesu e shiya ma mukuli de bure guru mbo nani de boyi te anya simi nja shina Mirikisi. 4 Ni gye ku mbo mu la de kede nseda shishirigye ku, ni kokoyi ni yaruwa, du yiri kyawu de e ma. 5 Kode nkye ni ma nja ku a siki nki ba, nzun yomu Ni ma nja ku a siki aworo, nja mmayi peri siki de ngenku yi tepiya yere nja yiri sakisi nsori a beigaskye ku de ku ma nshi a siki Kiristi.

6 Tunde ku keleba Kiristi Yesu de ma Obagizi aku, ku sigeba nzunwa a siki yi. 7 Ku sakisi nsori a siki Yesu, ku sa dishiya ku nja shi, sakisi nsori a siki beigaskye aku, yiride su kokoyi ku. Se ku sigeba ni gbede Mirikisi ni peri siki.

8 Ku kone kede nseda e ja ankeli aku te anya shina ni simi ntani durinya mu, de ma kokoyi ni shina butu te anya alaada ni nsebeki nja te yiko ni aworo ni durinya mu, e butu anya ni Kiristi naba. 9 Sobon a siki Kiristi la zunwa guru kamani ni Mirikisi a siki nki nsebeki. 10 Yomuna a siki Mirikisi kuma sisika a siki Yesu. E shiya ma totolo a siki kowoni solota nja yiko. 11 A siki zumunshi ku nja Kiristi la kuma su yi ku yanka, ba yiri yanka nani nsebeki naba, sede yanka de su yi te anya Kiristi, de e butu ku dege yiko ni ali nsebeki. 12 De su yi ku tunkwasa, su bishina ku nja Kiristi, a siki tunkwasa la mu dege nja Yesu te anya beigaskye ni sori Mirikisi, de dege Yesu a kumsha.

13 A kwanki a beyi kuma mumuntu la a siki nki ku ni lepi sobon kuma worede shina Mirikisi ba. Sede kuzukam Mirikisi sa ku man leyi a siki Kiristi. Mirikisi yape guru lepi mu; 14 Mirikisi shire lepi ni watala doka nja kayida de mu ki biya de sakisi yaa yi geba mu, sede Mirikisi la e yi bila turiki de mala e yi ni kusa gidiri ni Kiristi. 15 A kiya gidiri, Kiristi butu nki yi dege sori nja yiko ni nsu tolense; a kiya ntani, e ba su kumnya a pili te anya turiki shakiya.

16 Nka yomu kede ku bila nseda e nene ku a kiya mbode kwa si ko sha, ko a kiya nana seki ko buki ni sabuwa wonta ko nana asibi. 17 Guru mbo worosu mu e ma kuruwa ni mbode yaa paru a geba, Sede Kiristi e shiya ma anihi mbo ni. 18 Kede ku bila nseda de yaa bwala kiya ni yaruwa nja bowuta meleku nja yaruwa nkye yaa geni Pelesa de nana ku samu mbo kyakyawu anya Mirikisi. yiri worosu mu su nya ku yaruwa a kiya mbode su geni, sede beta su man mbode butu dege dishiya nsebeki la. 19 Yiri ntani mu mala nja Kiristi ba, de ma kamkyiya ni nki. Kiristi yaa keyi guru nsu biya yi, de ma nki yi, de gomu te anya ganga nki nja ajijiya, de yaa yi girima yiride Mirikisi sa yi de yi girima.

20 Tunde arinya ku ni nsebeki muntu nja Kiristi, su butu ku dege sori yiko ni aworo de mani durinya mu. mina sa, de ku tuku ma yi zunwa kankye ntani durinya mu? Mina ku tuku biya doka ni durinya. 21 Yiri doka de yaa nkye, <<kede nani ku keyi mbo mu,>> <<Kede ku suku mbo ni,>> <<Kede ku kpa nsu mu>>? 22 Guru mbo worosu mu su ma ni ampani ba nde mu yi ampani nshi; su ma doka nja kokoyi ni nsebeki la. 23 Yiri kayida mu e ma alama ni simi a siki bowuta Meleku de su ma yi, nja bwala kiya ni yaruwa, nja ba nkisu Genbeki; sede su ma ni sori nana so ni mbo ni durinya.