1 Tunde Mirikisi dege ku a kumsha nleyi yere nja Kiristi, se ku sa dishiya ku a siki mbode ma a bisi, anya de Kiristi zunwa a nani dama ni Mirikisi. 2 Ku sa tunani ku a siki mbode ma a bisi, ba mbode ma ni durinya mu ba. 3 Sobon arinya ku ni nsebeki rigye muntu wo, leyi ku e ma a boyi nja Kiristi a siki Mirikisi. 4 Nde Kiristi de ma leyi ku pelesa, oku ma du kwa pelesa nja shi a siki dereja yi.

5 Sobon yomu, se ku sa ali ku ni nsebeki e muntu, ali de mani durinya mu: ali ni nungwe, tunani mumungu, memeri nkye, dodola, memeri mumungu nja opu mbo, de ma kankye bowuta boka. 6 Sobon yiri ali worosu mu la, anwashi Mirikisi yaa puari a kiya worede su ma biya beta e yi ba. 7 A kwanki de bise, ku yi zunwa yiri ali mumungu yomu. 8 Sede kuzukam dole na ku butu kiya ku a siki guru yiri ali woromu: anwashi, zapi leyi nja ki nkiaku. Kede ku bebeta nkiaku seni, kede beta mumungu e butu a baki aku. 9 kede ku yi nkiya ku yaruwa, tunde ku rigye butu arinya nsebeki nja ankiyi 10 Nja ku sa arinya sabuwa mu, de e sigeba ma sabuwa te anya kamani Mirikisi, de e zo mu a siki shina Mirikisi. 11 Ntani nsu ali sabuwa mu, su ma nana bombom ba ko ki ma Yawudawa ko ki ma Yawudawa ba guru amu muma daa la, ko su yi ku yanka ko su yi ku yanka ba, ko ki ma Odundu ko ki ma Odundu ba muma daa la, ko ki ma bunwa ko ki ma yagizi, sede Kiristi e shiya ma guru mbo, nja asikimu guru.

12 Nka yomu, Yiride Mirikisi zabi ku de ku ma na yi, de ku ma nsuseki nja ntani de Mirikisi yaa so soseyi, se ku ripe kiya ku ni toseyi, soki kiya, bwala kiya, kuma ntani de sua dege kiya ba nja kadishiya. 13 Ku kadishiya nja nkiya ku nja ku yape guru nsude yi ku mbode de ma kyakyawu ba. Ku yape yiride Obagizi yape ku. 14 A beyi mbo worosu mu guru ku ma nsu so worosu su, sobon so yaa sa ntani de su yi zunwa gabada.

15 Bila de selema Kiristi yi solota a siki dishiya ku, tunde kuma nki daa na Mirikisi sukwa ku de ku yi zunwa selema. Ku ma nsu gbede Mirikisi kowoni nana. 16 Bila de kelima Kiristi e zunwa a siki dishiya. Kuma kokoyi nkiya ku kuma ja nkiya ku kuni a siki guru simi. Ku meyi wonka a siki zabura, nja wonka yobo Mirikisi, nja wonka aworo; ku yi wonka ni gbede a siki dishiya ku te nja Mirikisi. 17 Kowoni mbode kwa yi, a siki kelima baki ko ANKI de kwa yi, ku yi guru a siki seni Obagizi Yesu, kuma gbede Mirikisi Adaa te anya Yesu.

18 Oku mata, ku bwala kiya ku te nja menza ku, yiride yi kyawu ni nsubiya Obagizi.

19 Oku menza, ku so mata ku nja ku yi su mbode yi kyawu, kede ku yi su zapi leyi.

20 Oku yaya, ku zi kuni nsu adaa ku a siki kowoni mbo, sobon yomu jima Obagizi

21 Oku nsu adaa kede ku sa yaya ku, su yi anwashi, kede su butu dishiya.

22 Oku bunwa, ku zi kuni nsugizi ku a siki guru mbo; ba sobon geni ndani naba nja ba sobon de ku jima su naba sede ku yi nsugizi ku mbo ni dishiya daa nja ku ba Obagizi girima. 23 Ko mina de kwa yi, ku yi anki ni guru dishiya ku, kankye kwa yi anki sobon Obagizi, ba nsebeki naba, 24 Tunde ku shina nkye Obagizi yaa ba ku gado aku de ma nani wuta de yaa ba ntani yi. Sobon Kiristi la e ma Nsugizi de kwa bowuta yi. 25 Nja guru nsu yi mungu mbo lama nshi ni mumungu mbo de su yi, sobon Mirikisi yaa nana bombom ba.