1 Manki dege anya na Bulusu, yamanki Kiristi Yesu te nupi Mirikisi, nja Timoti, yayiwa mu.

2 Te anya ntani Mirikisi nja nsu aminshi a siki Kiristi worede zunwa a siki Kolosiya.

Bila de Aniyeri nja selema dege anya Mirikisi Adaamu e ma nja ku.

3 Kowoni kwanki Mua gbede Mirikisi, Adaa ni Obagizi mu Yesu Kiristi, guru kwanki de mua yi lepa sobon ku, 4 sobon mu zi yiri beigaskye ku a siki Kiristi Yesu nja so de ku manshi sobon guru ntani Mirikisi. 5 De gaskye ni manki kyakyawu, para zo anya ku, ku zi Kelima a kiya sa dishiya de e ba ku. Se beigaskye nja so aku e ma a kiya mbode ku sa dishiya, de su sa ku nshi a bisi. 6 Nabari kyakyawu mu sigeba ni zo ku ni anabirika, yiride ntani durinya guru zi. nabari kyakyawu mu yaa ja ntani nyowa a siki yiri de yi anya ku tun dege nana de ku zi beta a kiya aniyeri Mirikisi ku kwa shina yiri de e ma. 7 Ku Para zi beta a kiya aniyeri Mirikisi anya Abaparasi oboki anki mu, nsude ma bunwa nsu aminshi a siki Kiristi amomokomu, 8 E shiya gye mu yiri so de Aworo Mirikisi ba ku.

9 Sobon delili mu na tun dege nana de mu zi nabari a kiya ku, mu bila yi lepa sobon ku ba nja mua ologba Mirikisi de Aworo yi e sika ku shina mbode yaa bila de ku yi, a siki guru simi nja gane de Aworo Mirikisi beyi. 10 Yomuna kwa yi zunwa yiride Obagizi yaa bila de ku yi nja de ku jimeyi. De ku yi ANKI kyakyawu, nja de ku yi girima a siki shina Mirikisi. 11 Bila de Mirikisi sa ku sakisi nsori a siki guru sori ni dereja yi de sa kuma nsu kadishiya nja ankuri. 12 A siki peri siki mu gbede Adaa mu, kowoni kwanki Mirikisi de samu muma dedeta ntani de sua si gado ni solota ni asikye. 13 Sobon e shiya sila mu dege solota ni obiri nja e kuma mu zo a solota ni Yaa yi de yaa so. 14 Ta anya Yesu la mu samu sila, woto yape ni lepi amu.

15 Yesu e shiya ma kamani Mirikisi de muma geni ba. E shiya ma Yaa pari ni Mirikisi a siki mbode yi guru. 16 Sobon te anya Yesu la Mirikisi yi guru mbode ma a siki bisi nja kisi, mbode mua geni nja nsude mua geni ba, nzun solota ko sori ko nsu solota ko yiko. Mirikisi yi guru mbo te anya e yi nja sobon e shi la. 17 Yesu ma kapi guru mbo, te anya Yesu la guru mbo mala nkiya su. 18 Kiristi nama kamkyiya ni nki, ni nsubiya yi; e shiya ma tutiri ni leyi, de ma pari nja Yaa pari de dege a kumsha, sobon de e ma ni pari a siki guru mbo. 19 Sobon e jima Mirikisi de sa guru sisika kame yi a siki Yesu. 20 Te anya Yesu la Mirikisi shiriya guru mbo, mbode ma a bisi nja kisi, Mirikisi zo selema te anya zini Yaa yi de nya a kiya gidiri yomuna e keyi guru mbo, a kisi nja a bisi zo ma na yi.

21 A kwanki de bise ku yi nyisa nja Mirikisi kuma oboki geba a siki tunani ku sobon mbo mumungu de ku yi. 22 Sede kuzukam kuma oboki Mirikisi sobon muntu nki Yesu a gidiri, de e sa ku ma nsuseki, mere lepi nja ba mbo basi a geba Mirikisi ba. 23 Se ku sigeba ni sakisi nsori, a siki beigaskye ku, kankye ntasi de ririnya yi kapa a kisi, kede ku butu leyi ku dege sa dishiya de ku manshi a kwanki de ku zi nabari kyakyawu. Nabari kyakyawu de su beyi manki yi te nja guru ntani durinya se Eni Bulusu ni ma bunwa yi.

24 Kuzukam Mma yi perisiki sobon genbeki de ni sha a kiya ku, sobon te anya genbeki mu na Na sika mbode rigye ni genbeki de Kiristi sha a siki nki yi, de ma shoshi. 25 Mirikisi zabi ni de ni ma bunwa ni nsubiya Yesu, de ba ni ANKI sobon ku. Anki ni beyi manki nabari kyakyawu. 26 Nabari manki kyakyawu mu de Mirikisi boyi sana ntani nyowa de bise, sede kuzukam Mirikisi pelesa yi a pili ba ntani yi. 27 Nupi Mirikisi eshiya de nana ntani yi mbode ma a boyi, totolo dereja de e manshi sobon guru worede shina Mirikisi ba. Mbode e ma a boyi mu e shiya ma Kiristi zunwa a siki ku, e shiya ma sadishiya ni laba lobo mu a siki dereja Mirikisi.

28 E shiya sa mua pala gye ntani guru manki a kiya Kiristi. Ni guru simi mua gila konwawa nja de mu kokoyi su de mu ja konwawa zo a geba Mirikisi de su ma dedeta a siki Kiristi. 29 Sobon yomuna Mma yi pama mmayi ANKI ni guru sori de Kiristi ba ni de e meyi ANKI a siki na.