1 Oku nsugizi, ku keyi bunwa ku nnani bi ku yi su mbode ma kyakyawu, ku shina nkye oku ma du kuma ni Nsugizi de ma a siki bisi.

2 Ku sigeba ni yi lepa, ku sa ndani ayiride kwa sigeba lepa, kwa gbede Mirikisi. 3 Ku yi mu lepa du, de Mirikisi e bure mu kopa de mua beyi manki, mbode ma a boyi a kiya Kiristi. Sobon nshi na Ni ma a jaru. 4 Ku yi ni lepa de ni beyi manki mu soseyi, yiride e kamata de ni yi. 5 A siki zunwa ku nja worede su ma nsubiya Yesu ba, ku yi kowoni mbo a siki simi, ku yi ampani kowoni dama de ku ma nshi kyakyawu. 6 Bila de beta baki ku e ma beta aniyeri e kuma man kyawu zi kwanki, sobon de ku shina yiride kwa keleba konwawa de minya ku ni beta kyakyawu.

7 Oboki mu Titikus, yaa gye ku guru nabari a kiya yiride ni ma anya mu. Ema yayiwa de e ni ma so soseyi la, nsu aminshi la nja oboki tepiya a siki anki ni Obagizi. 8 Ni sakye yi anya ku de e gye ku mbode ma paru nja mu nja de e ba ku sori dishiya. 9 E zo gabada nja Onisimus, yayiwa nsu aminshi de mua so soseyi, e ma daa a siki ku. Sua gye ku kowoni mbode ma paru anya mu.

10 Arisitakus de ma a jaru nja ni yaa geshe ku, yomuna Marikusu de ma yaa ni yayiwa ni adaa ni Banaba yaa geshe ku. E shina ni yi ku beta a kiya yi nkye; nde e zo ku keleba yi nnani bi. 11 Yoshuwa, de sua sukwa Yositus, e shi ma yaa geshe ku. Osu ntani wuku Woromu su ma Yawudawa de su ma yi anki nja Ni na sobon solota Mirikisi, gaskye su sua ni nto soseyi. 12 Gesuwa dege Abaparasi, de ma daa a siki ku eshi ma ema bunwa ni Yesu Kiristi, kowoni kwanki ema yi topula a siki lepa sobon ku, de ku sakisi nsori, a yiride ku soori a siki guru nupi Mirikisi, nja de ku sika mbode Mirikisi yaa bila de ku yi. 13 Eni nkyiyana Ni beyi sheeda a kiya yiride Abaparasi, meyi pama ANKI sobon oku nja ntani de su ma a Lodokiya nja Hiripola. 14 Oboki mu Luka, de ma nsu megeni, nja Demasi sua geshe ku du. 15 Ku geshe yayuwa de su ma Lodokiya, nja ku geshe Nimpa nja nsubiya Yesu de su ma tala a gizi yi. 16 A beyi de su karanta takada mu anya ku, ku tabata su karanta yi ba nsubiya Yesu de su ma tala a Lodokiya nja ku karanta takada de sua saka ku nshi dege Lodokiya.

17 Ku gye Akibu nkye: <<E tabata nkye e gama anki mu de Obagizi beyi.>>

18 E ni, Bulusu, nnani na na ni rubuta gesuwa mu, ku turunwa de ku yi ni lepa sobon de ni ma a jaru!

bila de aniyeri Mirikisi e ma nja ku.