1 Butu anya Bulusu nja Timoti, bunwa ni Kiristi Yesu,

Te anya guru nsu oboki ANKI de ma Pilibi, nja nsu kamkiya nsubiya Yesu nja nsu yidima yi.

2 Aniyeri nja selema ni Mirikisi Adaa mu, nja Obagizi Yesu Kiristi.

3 Na gbede Mirikisi naa guru kwanki de ni turunwa nku. 4 A siki guru lepa naa a kiya ku guru, mma yi ku lepa ni perisiki. 5 Sobon yiride ku sua nto kwa yi nshi a siki anki beyi nabari kyakyawu dege nana ni pari ari kuzukam, 6 Na sadishiya a kiya mbo mu, e shi nsu de para yanki kyakyawu a siki aku ari kwanki ni Kiristi Yesu

7 Sobon ema dede na de ni yi tunani a kiya guru aku! Sobon ku ma a siki dishiya na. Sobon guraku ku samu lobo ku dege a siki aniyeri de Mirikisi yi ni, a kwanki de ni ma a jaru nja su butu ni tengele nabari kyakyawu de ni tabata nshi. 8 Mirikisi yaa sheeda ni yiride ni ma nku guru a dishiya na nja yiri so de Yesu yi.

9 Lepa de mma yi ku shi na ema so aku ema ni gaskye de yaa si geba a siki aku nja shina nyowa, 10 Sobon kwa yi yaa zabi mbo kyakyawu nja yaa ma sere bayi mbo basi ba ari yaa te nana ni Yesu, 11 Ku sika ni yaya gangasi de yaa butu a anya Yesu Kiristi de mu beyi girima nja yobo Mirikisi.

12 Kuzukam na bila de ku shina, yayuwa nkye, mbode yaa paru nja ni su ma ni ampani a siki yanki nabari kyakyawu. 13 Ari e zo ma, ashina ni guru shoja ni pada nja guru ntani nkye domuna de su yi ni ema sobon Kiristi na. 14 Sobon domuna naa, e sa yayuwa nyowa a siki Obagizi su saa sori dishiya de sua pala beta ni Mirikisi ba womba ni dishiya daa.

15 Ema gaskye nkye worosu su sua beyi manki ni Kiristi butu a siki anwashi nja beki siki, worosu su butu a siki ni anya kyakyawu na. 16 Butu a beyi su yi yomu a siki so, su shina nkye su sa ni anya mu sobon nabari kyakyawu na. 17 Woroni su beyi manki ni kiristi a siki son kiya, ba ni dishiya daa ba, sua so de su sa ni a siki waala a siki domuna de ni ma a siki e yi. 18 Ema mbo daa na ba! Mbo kyakyawu na ma a kowoni turuki, ko ema ni nupi yaruwa ko ni nupi gaskye. Su ma beyi manki a kiya Kiristi na. Sobon yomuna mma yi peri siki.

Ee, na sigeba ni yi peri siki, 19 Ni shina nkye a siki lepa aku nja sua nto ni Aworo ni Yesu kiristi, mbo de e paru nja ni e juyi ya ma sila. 20 Ni shina kuma sadishiya nkye a kowoni turiki mma zi kumnya ba, sede mma samu sori dishiya a kuzukam nja kowoni kwanki na ba Kiristi girima a nki naa ko ni man leyi ko ni muntu. 21 Anya naa, de ni man leyi e shiya e ma Kiristi de ni muntu e ma riba na. 22 Sede nde na yi zunwa a siki nki, nsum ema yaya ni yanki na aka. Sede mina na zabi? ni shina ba! 23 Ni rikishe a kiya mbo bii mu: mma sa dishiya de ni bila durinya nja ni te zunwa nja Kiristi, e shi na e ma kyakyawu nnyisa; 24 Sede e pi kyawu anya aku de ni. a siki nki 25 Tunde ni mani tabeshi ni mbo mu, ni shina nkye na zunwa nja ku guru. De ku ja girima nja perisiki a siki beigaskye, 26 Sobon a siki zunwa naa nja ku jaja peri siki aku a siki Kiristi Yesu yaa si geba sobon ni. 27 Du mbo de paru, ku biya ni kiya aku yiri de ku samu nabari kyakyawu ni Kiristi. Se, ko ni zo geni ku ko ni zi yaa ma kowe ba a kiya ku a beyi de ni bila ku, mma shina nkye ku sakisi nsori a siki ni Aworo daa, kwa yi kankye nse daa na sobon beigaskye aku ni nabari kyakyawu 28 Ku taba zi womba a kowoni turuki a kiya worede sua geba nja ku ba. Nsum na e ma alama anya asu de su zo juru su, sede oku kwa samu leyi anya ni Mirikisi. 29 Se oku su ba ku dama a siki Kiristi ba sobon beigaskye na kowe ba, amana de ku Genbeki sobon shi, 30 Tunde oku ma kwa yi pama yiri daa de e ni na sha, nja kuzukam ki zi ni tukuna sha.