1 Oku yaya, ku ba adaa ku nja amaa ku girima a siki Obagizi, sobon nsum e shiya ma kyakya. 2 Daa mu e shina ma doka Musa de nkye <<Ku ba adaa aku nja amaa aku girima>> nsu mu e shiya ma doka Mirikisi ni pari de ma ni anikowori. 3 <<De ku samu zunwa lapiya nja de ku dede a durinya

4 Oku nsu adaa, kede ku yi mbode yaa sa yaya ku su yi anwashi ba; sede ku kokoyi su mbo kyakyawu nja poro su a turiki ni Obagizi.

5 Oku bunwa, ku ba nsugizi aku ni durinya girima ku nana su ali girima a siki womba Mirikisi, ni dishiya daa, yiride kwa yi kiristi nshi. 6 Ku ba su girima ba ni geni ndani ba, nta yiri worede su ma bila yobo anya ntani, sede ku ma kankye bunwa ni Kiristi, ku yi mbode Mirikisi yaa so dege dishiya aku. 7 Ku yi bowuta ni guru dishiya daa, yiride kwa bowuta Obagizi, ba nsebeki ba, 8 Ku shina nkye Obagizi yaa ba kowoni nse nani wuta ni mbo kyakyawu de e yi, ko ema bunwa ko ema bunwa ba.

9 Oku nsugizi, oku ma ku yi yomu nja bunwa aku, kede ku ba su womba ba, ku shina oku nja su guru kuma ni Obagizi bisi la, nsude yaa nana bombom ba.

10 A karishe, ku yi sori a siki Obagizi nja a siki sori yiko yi. 11 Ku sa guru keyi yanki ni Mirikisi de ku sakisi yi geba ni kowoni turiki de obiri yaa zo ku nshi. 12 Sobon topula amu ma a kiya nsebeki nsu nki nja zini na ba, sede a kiya ni mungu aworo ni bisi, nja nsu solota, a kiya yiko ni durinya, nja a kiya nsu sori dopuwa ni durinya nja a kiya aworo mumungu ni sana mu. 13 Nkayomu ku sa guru keyi yanki ni Mirikisi, sobon nde nana mumungu zo, de ku yi yaa sakisi ni sori, a beyi de ku yi kowoni mbo, ku yi yaa sakisi nsori. 14 Sobon yomu ku sakisi ni sori, gaskye ema kankye shompa de gyowe goto aku, nja golonka ema kankye gangasi ni keyi yanki, 15 de ku yi shiri ni keyi nabari kyakyawu ni selema, kankye takalami a seni aku. 16 A beyi guru mbomu, se beigaskye ema kankye manta de kwa yi yaa tele kiya aku dege kowoni papasa de obiri yaa ribi ku nshi. 17 Se ku la tangiya ni keripi de mani sila aku nja ku la obalaba ni Aworo nsuseki de e shiya ma kelima ni Mirikisi. 18 Se ku yi lepa kowoni nana a siki sori Aworo Mirikisi nja ku yi lepa yiri, yiri, ni kpanku. Ku mani nsum a dishiya aku, se kuma ashiri kowoni kwanki de ku yi nsubiya Yesu guru lepa. 19 Ku yi ni lepa du, de guru kwanki de Ni bure baki Ni beyi manki Mirikisi ba womba, de ni pelesa asiri ni nabari kyakyawu ba ntani. 20 Sobon ni nabari kyakyawu mu na Ni ma wakili kode Ni ma a jaru. Ku yi ni lepa de Ni pala nabari mu ba womba, yiride e kamata de Ni yi.

21 Tikikus, yayiwa amu nja bunwa nsu aminshi de ma a siki Obagizi, yaa gye ku mbo guru de ku shina yiride Ni ma nja mbode Ni ma yi. 22 Ni ma saka yi ta anya ku sobon ni delili mu, de ku shina yiride mu ma, de e ja ku sori guyam.

23 Yayuwa selema butu anya Mirikisi Adaa nja Obagizi Yesu Kiristi ema nja ku, ni so nja beigaskye.

24 Aniyeri ema nja guru worede su ma so Obagizi amu Yesu Kiristi nja so de yaa yaba. Ema yomu.