1 Eni Bulusu ni ma yaa jaru sobon manki Obagizi Yesu, Mma ologba ku de ku yi zunwa de yi kyawu ni sukwa de su yi ku. 2 Kowoni kwanki kuma nsu la kiya ku kuma mbodaa ba nja nsu soki kiya; nja kadishiya, ku ma nsu yeda ni nkiaku a siki so. 3 Ku sakisi nsori soseyi de ku sa zunwa daa aku mu de Aworo Mirikisi ba ku te anya selema de domuna ku gabada. 4 Omu nsubiya Yesu mu ma nki daa muma Aworo daa, yomu na ku mani sadishiya daa de su sukwa ku sobon nshi, 5 Obagizi daa, beigaskye daa, tunkwasa daa; 6 Mirikisi daa Adaa ni guru ntani, de ema a bisi guru nja anya ni guru ni kuma guru mbo.

7 Sede Mirikisi ba kowoni nse kyawuta yi kyakya yowa aniyeri Kiristi. 8 Daa mu nama mbode sa Beta Mirikisi nkye:

<<A kwanki de Yesu dege ta a bisi,

e la worede su sa su a jaru te gabada nja shi

e ba ntani yi ANKI mbombom.

9 Mina ma <<nyunwa a bisi de e nyunwa>> ema nana nkye e para sonka zo a kisi la. 10 Nsude sonka ni e shiya ma nsude nyunwa te a bisi ni guru bisi, de e sika bisi ni kisi guru. 11 Yesu zabi worosu su ma yayamanki, worosu su ma anebi, worosu su ma nsu pala nabari kyakyawu ba ntani, worosu su ma pasito, nja Male nsu kokoyi ntani beta Mirikisi, 12 Kiristi yi yomu na de e gina ntani Mirikisi de su yi anki bowuta 13 de guru amu mu ma daa a siki beigaskye nja shina ni Yaa Mirikisi kuma mu ma dedeta ntani a siki Yesu, de mu yi girima keyi yiride Kiristi bila de mu keyi.

14 Nkayomu kede mu ma kankye yaya dende ba, ko mu ma kankye worede su ma jujuyi ankeli asu ni sabuwa kokoyi kankye worede su shina mbode su ma yi ba, de ntani nsu wayo su ma shirigye su ni zaki baki asu. 15 Sobon yomu, mu pala gaskye a siki so, de mu yi girima a siki guru mbode mua yi kankye Yesu de e shiya ma kamkiya nsubiya Yesu, de ma, Kiristi. 16 Sobon e shiya ma kamkiya de ka yi guru nki, de su gomu ka nkiasu anya ni ANKI kowoni jijiya, de su yi girima nja de su yi sori a siki ni so, yiride kowoni ganga nki yaa yi ANKI yi,

17 Sobon yomu mma gye ku, gila na mma yi ku a siki seni Obagizi, kede ku yi zunwa kankye worede shina Mirikisi ba, nsu tunani banza. 18 Dishiya asu shika ni mungu mbo su laba su ni leyi de Mirikisi beyi sobon lesa shina de su manshi te anya lesa zi asu. 19 Su mani rishi kumnya, su la nkya su sa ma nsu kwana nja mata ntani sua yi memeri ni yi kowoni yiri mbo rebi.

20 Oku kwa, yomuna ku kokoyi a kiya Yesu ba. 21 Ni shina ku zi nabari yi sobon kuma ntani yi na, su kokoyi ku gaskye de ma a siki Yesu. 22 Mbode su kokoyi ku, a kiya ni zunwa aku a kwanki de bise, ku butu mumungu ali aku, e shiya ma ali de ma bebeta sobon ni so mbo worede su ma shirigye ku; 23 de kuma sabuwa a siki tunani aku nja ali aku; 24 de ku la sabuwa ali de ma kankye Mirikisi de su yi a siki ni kamani yi a siki gaskye ni gangasi nja zunwa seki.

25 Nkayomu! konwawa e bila yaruwa, konse e pala gye dengeri yi nsubiya Yesu gaskye, sobon mu ma ganga nki daa na. 26 <<A siki ni anwashi aku kede ku yi lepi>> Kede anwashi aku e keyi ari nana e puari kuma yi anwashi, 27 kede ku ba obiri turiki. 28 Nsude mayi bolowa, kede e yi bolowa gagaba, sede e yi ANKI tukuru, e yi ANKI kyakyawu ni nani yi, de e mani mbode yaa sua worede su manshi ba nto.

29 Kede mumungu beta e butu a baki aku, sede ema beta de mani moriya de yaa sua ntani nto a kiya ni mbode sua bila, yomuna beta aku yaa sua worede su zi nto. 30 Kede ku bebeta Aworo Nsuseki ni Mirikisi la yi, ema alama sheeda na a kiya ku a nana sila. 31 Ku bila guru mungu dishiya, nja zapi la yi, ni anwashi, ni rikishi, yi beta mumungu a kiya yayiwa ake, nja ka yi nse a dishiya. 32 Ku yi ali kyakyawu nja ku zi toseyi nkiaku, ku yape nkiaku, yiride a siki ni Yesu Mirikisi yape ku.