1 A kwanki de bise kuma mumuntu ntani la a siki lepi aku, 2 de ku ma a siki yi a kwanki de kwa biya turiki ni durinya nja mumungu aworo nsu solota ni durinya mu, mumungu aworo de yaa yi ANKI kuzukam a siki ni worede su ki biya doka ni Mirikisi. 3 Guru amu muma yomu la a kwanki de bise a beyi, muma biya mbode nki amu yaa bila nja biya mbode tunani dishiya amu samu de mu yi. Nta yiride worede mani durinya, dole anwashi Mirikisi yaa sonka a kiya amu. 4 Sede sobon yowa so de Mirikisi manshi anya mu, nja yowa aniyeri yi de yi mu nshi, 5 e samu mu mani leyi nja Kiristi kode muma kankye mumuntu ntani a siki lepi sede te anya aniyeri Yesu la e sila mu. 6 Se Mirikisi dege mu a bisi nja Kiristi se e ba mu anya zunwa gabada a siki solota bisi nja Yesu Kiristi, 7 Mirikisi yi yomuna de kwanki nsu zo yaa nana yowa aniyeri yi de e manshi a kiya mu, e nana mu aniyeri yi a siki Yesu Kiristi. 8 Sobon ta anya aniyeri la mu samu sila, te anya beigaskye, da mu ma yi aku naba, sede kyawuta ni Mirikisi, 9 ba sobon ni ANKI kyakyawu de mu yi naba, de kede nseda dege dolo. 10 Omu muma keikei ANKI ni Mirikisi la, de Mirikisi yi mu a siki Yesu Kiristi de mu yi ANKI de ma kyakyawu, de Mirikisi shiriya mu de mu yi, dege pari.

11 Nkayomu, ku shina nkye oku de su yapu ku ma Yawudawa ba yiride kuma a beyi de su sukwa ku <<Kuma nsu yanka naba>> se worede sukwa kiya su <<nkye nsu yanka>> de su yi su te anya nani nsebeki. 12 Ku turunwa nkye a kwanki a beyi su laba ku bila Kiristi, kuma mbodaa ba a siki ntani Izireyila kuma bakwe la a siki seda ni anikowori, ba sadishiya nja Mirikisi a siki durinya. 13 Sede kuzukam ku ma a siki Kiristi Yesu, oku de kuma nyisa Mirikisi ka yi ku zo mala nshi te anya zini Kiristi.

14 Sobon Yesu e shiya ma selema amu, e shi de sa worede su ma Yawudawa ba nja worede su ma Yawudawa su ma daa. E juru golonwa de laba su, woto geba de su ma yi nja nkyasu. 15 De Yesu muntu a kiya gidiri e watala sori ni doka Musa nja sari yi, yomu na, Yesu kuman Yawudawa nja worede ma Yawudawa ba su ma daa, nja de su ma sabuwa ntani, yomuna su samu zunwa selema nja nkiasu. 16 Yesu yi yomuna de e shiriya ntani bi mu nja Mirikisi de su ma nki daa; te anya muntu Yesu a gidiri na e nana geba de su ma yi nja nkiasu. 17 Yesu zo bayi manki nabari kyakyawu ni selema ba worede su ma Yawudawa ba, osu de su yi nyisa nja Mirikisi, nja Yawudawa, osu de su yi kusa Mirikisi. 18 Te anya Yesu la guru amu Yawudawa nja worede su ma Yawudawa ba mua yi yaa zo a geba Adaa te turiki daa a siki Aworo Mirikisi. 19 Sobon yomu, oku de kuma Yawudawa ba kuma bakwe na gagaba; kuma yaya kesa na gabada nja ntani Mirikisi ku kwa ma juriya gizi Mirikisi, 20 Oku ma, Mirikisi gina ku a kiya kutiri de yayamanki nja nsu anebi su gini, Kiristi Yesu nama dunsi nsu anpani de ka gini nkiya yi 21 Te anya Yesu na Mirikisi yada guru laki gabada, e shina ma sa laki ni de yi girima ari ema laki lepa nsuseki de Mirikisi la sa keteri ba Obagizi. 22 A siki zumunshi nja Yesu na Mirikisi gina ku nja ririgye ntani gabada de ku ma anya de Mirikisi yaa zunwa te anya Aworo yi.