1 Dege anya Bulusu, yamanki Yesu Kiristi te anya nupi Mirikisi,

Te anya ntani Mirikisi de su ma zunwa Apisa, nsu aminshi de ma a siki Yesu Kiristi:

2 Aniyeri nja selema dege anya Mirikisi Adaa mu nja Obagizi Yesu Kiristi ema nja ku.

3 Bilade mu yobo Mirikisi nja Adaa ni Obagizi mu Yesu Kiristi! sobon zumunshi mu nja Yesu e samu anabirika a siki solota bisi ni ko yiri anabirika a siki Kiristi. 4 Mirikisi zabi mu de muma na yi te anya zumunshi nja Kiristi kapi de su yi durinya, sobon de muman nsuseki nja de muma mere lepi a geba Mirikisi. sobon so de e mayi mu 5 Mirikisi e rigye zabi mu de Muma yaya goyi yi a siki Yesu Kiristi, nsum nama nupi nja zi dadi yi. 6 Mirikisi yi yomu la de mu yobo dereja girima yi sobon aniyeri de e ba mu kyawuta teke ta anya Yaa yi de yaa so soseyi. 7 Sobon a siki Kiristi la mu samu yenshi te anya zini yi, na mu samu yape lepi mu, te anya yowa ni aniyeri Mirikisi, 8 de e ba mu teke! nja guru simi nja shina beta yi. 9 Mirikisi sa mu shina mbode e shiriya a boyi ni nupi yi de ema nshi, e shiriya de e sika yi te anya Kiristi, 10 Nupi Mirikisi nama, nde kwanki yi, yaa tala guru mbo te anya yiko Kiristi, kowoni mbode ma siki bisi nja a kisi, de Kiristi ema kamkiya.

11 Guru mbo ema yiride Mirikisi shiriya nja de nupi; Mirikisi zabi mu de muma ntani yi te anya zumunshi nja Kiristi sobon nupi yi, ema yomu na sobon mbode e shiriya dege pari naka. 12 Sobon Mirikisi zabi omu Yawudawa na, de mu para sadishiya anya Kiristi, mu yobo dereja girima Mirikisi. 13 Oku de kuma Yawudawa ba te anya Kiristi ku zi kelima ni manki gaskye, nabari kyakyawu ni sila. Akwanki de ku beigaskye nja Kiristi, Mirikisi ba ku Aworo Nsuseki yiride e yi ku anikowori nkye yaa yi, ema kankye alama sheeda nkye kuma na yi na. 14 Aworo Nsuseki nama mu tabeshi de Mirikisi yaa ba mu gado de e yi mu anikowori, de yaama namu kwanki de Mirikisi yaa sila worede su ma na yi. Nsum ma ni yobo dereja yi.

15 Sobon delili mu la, tunde Ni zi beta a kiya beigaskye ku a siki Obagizi Yesu nja so aku de kuma yi guru ntani Mirikisi. 16 Ni bila gbede Mirikisi sobon oku ba, du kwanki de mma yi lepa. 17 Ni ologba Mirikisi ni Obagizi amu Yesu Kiristi, Adaa nsu girima, de e ba ku Aworo, de yaa ba ku simi nja bure ndani, sobon de ku shina Mirikisi. 18 Ni yi lepa de ndani dishiya aku e mani asikye de ku shina ko mina ma sadishiya de e sukwa ku a kiya yi, nja yowa ni dereja girima gado mu sobon nsubiya Mirikisi. 19 Mma yi lepa de ku shina woni yiri totolo sori na de Mirikisi man shi, sori yi e pi geba shina de yaa yi ANKI a siki amu, 20 ni sori mu na Mirikisi dege kiristi dege muntu e beyi anya zunwa nsu dereja a nani dama yi a bisi. 21 Anya ni Kiristi yaa yi solota a kiya guru sori bisi nja yiko, nsu solota, e man seni de pi kowoni yiri seni de sua beyi, ba a siki durinya mu kin ba ari kwanki nsu zo. 22 Mirikisi sa guru mbo a nani yi nja zabi Yesu de ema tolense a kiya ni kowoni mbo sobon nsubiya yi, 23 nsubiya Yesu na su ma nki ni kiristi, a siki nsubiya Yesu e shiya ema kamkiya asu de sika kowoni mbo a turiki guru.