1 Yayuwa, nde ku geni nseda yaa yi lepi, Oku de ku mani Aworo Mirikisi ku kuma nshi zo a turiki kyakyawu. Sede ku kone kiya ku, kede oku ma du ku puari a siki lepi. 2 Nde nseda ku ma a siki Genbeki, dole na ku sua yi nto a kwanki ni, ku yi yomu na kwa sika doka Yesu Kiristi. 3 Nde nseda ma geni kiya e yi kankye e ma mbodaa na kuma e ma mbodaa na ba, yaa shishirigye kiya e yi naka. 4 Sede kowoni nse e gwada anki e yi de e geni. Nde e man kyawu se e yobo kiya e yi, ba se e gwada kiya e yi nja nseda ba. 5 Sobon yomu kowoni nse e zi loni keyi yi.

6 Guru nsude su kokoyi yi beta ni Yesu Kiristi se e laba guru mbo kyakyawu de e man nshi nja nsude kokoyi yi.

7 Kede ku shishirigye kiya ku: Sua taba nana Mirikisi wayo ba. Mbode nsebeki nunkwa e shina yaa nweyi. 8 Yayuwa nsude nunkwa mbode nki yaa bila, yaa butu mbode ma muntu; nsude nunkwa mbode yi Aworo Mirikisi kyawu, yaa mani leyi ni gbogbo dege anya ni Aworo Mirikisi. 9 Sobon yomu kede mu geji ni yi mbo kyakyawu ba, sobon kwanki yaa zo de mua tala mbode mu yi nde mu bila mbo kyakyawu de mua yi ba. 10 Nkayomu, de mu mani kwanki mu, mu yi ntani guru mbo kyakyawu, musama worede su ma yayuwa amu a siki Yesu Kiristi.

11 Ku kone yiri totolo rubutu de Ni yi ampani ni nani na na ni rubuta ku nshi!

12 Worede sua so de su geni su kokori de su sa ku dole de ku yi yanka. Mbode sa sua yi ku yomu e shiya ma sua yi womba ni Genbeki de sua sha sobon gidiri ni Yesu. 13 Ko worede su yi su yanka su ma biya doka Musa ba, su ma so de su yi ku yanka de su dege dolo a kiya aku nkye osu na su yi ku yanka. 14 Eni na taba dege dolo ba sede dege Dolo na ema a kiya ni gidiri Obagizi Yesu Kiristi, te anya muntu yi a kiya gidiri na ali durinya mu muntu bila ni, Eni kuma ni butu nani na a siki mbo durinya mu guru. 15 Ko su yi ni yanka ko su yi yanka ba ema mbodaa anya na ba; totolo mbo e shiya ma sabuwa yapu de manshi a siki Yesu. 16 Ni yi lepa de selema nja gangasi Mirikisi e ma nja guru worede su ma biya doka mu, osu la su ma Izireyila ni Mirikisi.

17 A karishe, kede nseda e sa ni a siki ngala a kiya ni mbodaa, sobon alama pita de Ni manshi nki na e nana Ni ma bunwa Yesu la.

18 Yayuwa. Aniyeri ni Obagizi mu Yesu Kiristi e ma nja aworo ku, E ma yomu.