1 Mbode ni mayi kokori pala e shiya ma nsu si gado nde e ma yaa dende, e ma mbom nja bunwa ba, kode nkye mbo guru ma na yi la. 2 Ema a nani ni yuwa goyi yi nja nsu kpanku yi ari e keyi kwanki de adaa yi sa. 3 Yomuna, kwanki de muma yaya dende, muma bunwa na a nani nsu sori ni solota ni durinya mu. 4 Sede kwanki yi, Mirikisi saka Yaa yi, de su yapu yi te anya ni mase, su yapu Yesu te anya doka Musa, 5 de E sila worede ma a siki doka Musa, de muma anihi yaya Mirikisi. 6 Sobon de kuma yaya Mirikisi e shiya sa Mirikisi saka Aworo ni Yaa yi a siki dishiya amu, Aworo de ma sukwa nkye, <<Abba, Adaa.>> 7 Sobon yomu, kuma bunwa na gagaba, sede ki ma yaa la; tunde ki ma yaa la, Mirikisi sa kuma yaya nsude si gado.

8 A beyi, de ku shina Mirikisi ba, kuma bunwa ni worosu su boka de te anya alita su ma mbodaa naba. 9 Sede kuzukam de ku shina Mirikisi, ko ankye Mirikisi shina ku, mina sa de kuma sakye kuma mbayi te anya mbo worede su ma ni sori ba, mbo banza na kuma? Kuma so de ku sakye ma bunwa asu na ja? 10 Kuma kiyaye kyakyawu nana nja wonta nja kwanki ni kuma shekera aku! 11 Ni yi womba sobon oku, e ma kankye Genbeki de ni sha a kiya aku e ma abanza la.

12 Ni ma yi ologba ku, yayuwa, kuma kankye e ni, sobon Eni ma ni ma kankye oku. Ku yi ni mbodaa mumungu ba. 13 Ku shina nkye, suwo de ni yi e shiya sa Ni para keyi ku nabari kyakyawu ni Kiristi na ni pari. 14 Ko de nkye suwo na de ni yi ma gwada na anya aku, nzun yomu ku yi ni nene ko siya ba. De kwa yi yomu, ku yi ni naaba kankye Ni ma meleku ni Mirikisi la anya aku, ko kankye ni ma Yesu Kiristi na nki yi. 15 Mina paru ni guru peri siki aku de ku yi? E ni na iya beyi sheeda soseyi a kiya aku, de aya paru la, de ku butu ndani aku ba ni. 16 Kuzukam ku la ni Ni ma oboki geba aku la sobon de ni ma gye ku gaskye?

17 Ntani woroni su ka ku ni nani bi bi, sede mbode ma dishiya asu kyawu ba. Mbode su ma so e shiya ma su laba ku nja mu, de guru tunani aku e juyi ta anya asu la. 18 E man kyawu de ku mani memeri, nde tunani aku e ma kyakyawu, e ma yomu kowoni nana ba se ni ma nja ku ba. 19 Oku yaya na, kuma kankye yaya dende de na sakye zi zapi yapu ku ni bi, ari Yesu Kiristi samu ayan zunwa a siki aku, 20 de ma so na Ni ma nja ku kuzukam de ni yi ku beta ni murinya kyakyawu, sobon ni da mu soseyi a kiya aku!

21 Ku gye ni, oku de kwa so de ku biya doka Musa, ku shina mbode doka Musa e ma pala? 22 Sobon e ma a rubutu nkye Abireyi e mani yaya menza bi la, daa ma yaa ni mase de ma bunwa, daa ma yaa mase sari. 23 Yaa ni Abireyi de su yapu yi anya mase bunwa su yapu a turiki de man kyawu ba; sede yaa de su yapu yi anya mase sari su yapu yi na sobon Mirikisi yi anikowori nkye sua yapu yi.

24 Mbo worosu mu su ma misali la, mata bi mu su ma kankye anikowori bi la. Anikowori daa e ma dege ogbo ni Siyona de yapu yaya de ma bunwa: E shiya ma Ajara. 25 Kuzukam Ajara e ma kankye totolo ogbo Sina a siki kesa larabawa e shiya ma misali totolo geri Wurishelima, sobon e shi nja yaya yi su ma bunwa la. 26 Sede Wurishelima de ma a bisi e ma yaya mase sari de ma ni yenshi, e shiya ma kankye amaa mu. 27 sobon e ma a rubutu nkye:

<<Ki yi peri siki, e ke mase sari de ki ma awari,

de man yaya ba;

ki wokye kuruwa,

e ke de ki taba zi zapi ni yapu ba;

sobon nyowa na ma yaya ni mase de minzi e yi bila yi

e pi nsude mani minzi.

28 Kuzukam, oku yayuwa, omu ma kankye Ishaku la, yaa de Mirikisi yi anikowori. 29 A kwanki ni yaa de su yapu yi a turiki de man kyawu ba, e sa yaa de su yapu yi te anya ni sori Aworo a geba nja e shi e ma beyi takaasi. Yomuna e ma ari kuzukam. 30 Sede mina na beta Mirikisi pala? <<Kula mase bunwa mu nja yaa yi de su butu, sobon yaa ni mase bunwa mu yaa si gado nja yaa ni mase sari mu ba.>> 31 Sobon yomuna, yayuwa, muma yaya ni mase bunwa mu na ba, sede muma yaya ni mase sari de mani yenshi.