1 E ma Sobon zunwa yenshi na Yesu butu mu. Sobon yomu ku sakisi nsori, kede ku bila nkiya ku ni loni keyi lepi a siki zunwa aku ni bunwa.

2 Ku zi beta na! E ni Bulusu, ni ma gye ku nde ku bila nkiya ku su yi ku yanka, Yesu e mani moriya anya ku ba naka. 3 Ni ma sakye turunwa ku guru nsude bila ki e yi su yi yanka ema dole la de e biya doka Musa guru. 4 Oku de kuma yi kokori de kuma nsu mere lepi anya Mirikisi te anya biya doka Musa ku rigye butu kiya ku bila Kiristi naka; ku kuma bila aniyeri ni Mirikisi naka. 5 Sede te anya ni beigaskye nja anya Aworo na muma pekye gangasi Mirikisi de mu sa dishiya. 6 Sobon a siki ni Yesu Kiristi ko su yi ke yanka ko su yi ke yanka ba e ma mbodaa na anya mu ba. Mbode mu pi kone e shiya ma beigaskye e ma nana kiya te anya so.

7 Ni pari kuma sigeba kyakyawu. Kuzukam waa nana ku de ku ki sadishiya ni gaskye? 8 Yiri zaki beki yaruwa mu e butu dege anya Mirikisi de sukwa ku na ba. 9 Yiri de su nkye, <<Darigaza piri na masa buredi ma kibu.>> 10 Sobon tala kiya mu a siki Obagizi Ni shina kwa taba keleba beta daa mbom de pi nna ba. nsude ma sa ku tututu yaa keleba poro, ko waa ma e shi. 11 Yayuwa, nde ari kuzukam ni ma beyi manki Kiristi ni yanka, mina sa de ari kuzum ni ma geni takaasi anya ntani? Nde e ma yomu la mina sa de kokoyi na a kiya muntu ni Yesu a gidiri e ma sa ntani lepi. 12 Worede sua sa ku Genbeki nja sua bila de su yi ku yanka, yaa yi su kyawu de su la kiya su beyi de su ma memeleta!

13 Oku, yayuwa na, Mirikisi sukwa ku de ku samu yenshi la. Sede kede ku yi anpani ni yenshi aku mu de ku yi zunwa ni lepi a siki nki ku; nde e ma yomu, ku bowuta nkyiaku a siki so. 14 Sobon guru doka Musa su tala e yi akelima daakaka la: <<E shiya ma ki so dengeri ake kankye kiya ke.>> 15 Nde kuma yi topula nja nkyiaku nja suku nkiya ku, ku kone, nde ku yi zunwa yomu, kwa bebeta kiya ku naka gabada.

16 Mbode Mma bila de ku shina e shiya ma, ku bila de Aworo Mirikisi e nana ku yiri de kwa yi zunwa, nde ku yi yomu kwa taba yi zunwa yiri ali nsebeki ba. 17 Sobon mumungu zunwa ni nsebeki yaa yi geba nja Aworo Mirikisi, Aworo Mirikisi yaa yi geba nja zunwa ni ali nsebeki. Guru asu sua yi geba nja nkiasu, sobon kede ku yi mbode kwa bila de ku yi ba. 18 Sede nde kuma yi zunwa a siki Aworo Mirikisi, doka Musa man sori a kiya ku ba.

19 Zunwa ni ali nsebeki e ma a pili: Osu na ma kwana nja mase ko ni minzi de su yi amere ba, nja ali nungwe sususu, kazanta nja so zunwa dadi de man kyawu ba, 20 nja bowuta boka, nja ali ni dobo nja ali geba nja nkyiaku, yi rikishi nja nkyiaku, ni kishi ni nkyiaku, nja anwashi, nja so kiya ku, ni lalaba nkyiaku, nja dege ankeli, 21 nja ali sha bugu, ni yi buki ni sha mbo yiri yiri, yiri mbo worosu mu. Ni ma ja ku kuni, kankye yiride ni ja ku kuni dege pari, nkye guru worede su ma yi yiri zunwa mu sua mani gado solota gizi Mirikisi ba.

22 Sede Aworo Nsuseki yaa samu de mu yi zunwa so, zunwa ni peri siki, zunwa ni selema, zunwa ni kadishiya, zunwa ni kiriki, ni zunwa kyakyawu nja nkyiaku, nja zunwa ni aminshi, 23 ni zunwa bwala kiya nja zunwa ka nki. yiri mbo worosu mu ba doka daa a kiya su ba. 24 Yomuna guru worede su ma ni Yesu su gidiri zunwa ni ali ni nsebeki nja mumungu mbo yiri, yiri de nki mayi memeri asu. 25 Tunde mua yi zunwa a siki Aworo Mirikisi na, bila de mu sigeba ni tepiya amu a siki Aworo Mirikisi. 26 Kede muma nsu dege dolo, ko muma nsu dege ankeli nkiya mu nja nsu kishi nkyiaku.