1 E ni Bulusu, yamanki, dege anya ntani ko nsebeki na ba, sede Mirikisi na sukwa ni, te anya Yesu Kiristi nja Mirikisi Adaa mu, de dege yi a kumsha, 2 nja guru yayuwa de su ma nja ni Bulusu,

Ta anya nsubiya Yesu de su ma nja Ni a Galatiya sua gesheku:

3 Aniyeri nja selema butu dege anya Mirikisi Adaa amu nja Obagizi Yesu Kiristi, 4 de beyi kiya yi sobon lepi amu de e sila mu dege mungu kwanki mu, ni nupi Mirikisi nja Adaa mu, 5 nsude girima ni gbogbo ma nja shi. Emayomu.

6 Eni Bulusu ni yi mamanki de dandani ku juyi bila Mirikisi de sukwa ku te anya aniyeri ni Yesu Kiristi de ku juyi biya manki daa mbom, 7 de ema manki Kiristi na ba. E nana kankye worosu ntani sua bila de su sa ku de kuma dundundu nja sua yi kokori de su nana manki Kiristi. 8 Sede nde omu ko meleku Mirikisi dege bisi beyi manki daa mbom de pi daa de omu mu gye ku, bila de nse ni e ma lalasheshe nsebeki! 9 Yiride mu rigye gye ku, kuzukam Na sakye gye ku: Nde nseda yaa gye ku manki de e pi daa de ku keleba, ku bila de nse ni e ma lalasheshe!

10 Kuzukam Na so yeda ni ntani naba ko yeda ni Mirikisi la? Ko Na so de Ni jima ntani na? Nde Na bila de njima ntani na, Na ma bunwa Kiristi ba.

11 Na so de ku shina, yayuwa, manki ni Kiristi de ni keyi ku nshi e ma mbode butu anya nsebeki naba. 12 Ni keleba manki mu anya nsebeki na ba, ko nsebeki na kokoyi ni ba; sede, Ni keleba te anya ni bure ndani dege anya Yesu Kiristi.

13 Ku zi yiride ni yi zunwa na a siki alada Yawudawa, yiride ni ma ba nsubiya Yesu takaasi, nja ni ma yi kokori de ni bebeta nsubiya Yesu. 14 Yiride ku shina nkye a siki adini Yawudawa, Ni pi ntani nyowa de muma sana daa nja ni ma ni kishi alada ni nsu adaatolo mu. 15 Sede Mirikisi, de zabi ni sa a keteri kapi de su yapu ni nja de e sukwa ni a siki aniyeri e yi, e jima Mirikisi 16 de pelesa Yaa yi Yesu de ni beyi manki kyakyawu ba worede su ma Yawudawa ba, Ni bila showura anya nseda ba, 17 Ni ta Wurishelima de ni geni worede su ma yayamanki kapi e ni naba, sede dandani Ni te a kesa Larabawa se ni kwa kuma ta Dimasiku. 18 Se a beyi shekera wuku, Ni te a Wurishelima ni san Biturusu ni yi nana gom sha biyari nja shi. 19 Ni geni nseda a siki yayamanki ba, se Yakubu, yayiwa ni Obagizi. 20 Mbode mma rubuta ku nshi mu e ma gaskye na ari a geba Mirikisi e ma yaruwa naba. 21 Dege a beyi Ni ta kesa Suriya nja Kilikiya. 22 Sede nsubiya Yesu de su ma Yawudiya su shina ni ba. 23 Sede su zi nkye: <<Nseminji de adaa e ma ba nsubiya Yesu takaasi kuzukam e ma nsu beyi manki beigaskye de e ma bebeta e yi adaa.>> 24 Se su yobo Mirikisi sobon ni juyi keleba Yesu.