1 A beyi shekera gom sha wuru Ni kwa sakye kuma ta Wurishelima, a kwanki ni nja Banaba. Ni la Taru te nja ni du. 2 Mirikisi nana ni nshi a siki bure ndani nkye Ni te. De ni ka yi anya ni Ni gom nja toree nsubiya Yesu ni nana su yiride Ni ma pala manki nabari kyakyawu ba worede su ma Yawudawa ba. Sede Ni yi a boyi a geba toree nsubiya Yesu, a siki womba sobon kede anki Na de na yi e ma kokowe ba. 3 Ko Taru oboki tepiya na, de ma nja ni, Ni keyi dole de su yii yanka ba, kode e ma nseminji Hellas na. 4 Beta mu dege sobon worosu yayuwa nsu yaruwa de su butu, worosu mu yuru a sisika mu a boyi sua bila de su shina yenshi de mu manshi a siki Yesu Kiristi nja de su sa mu ma bunwa. 5 Sede mu bila su ko piri ba, sobon gaskye ni manki mu e ma nja ku.

6 Sede worede su la su ma toree a beyi, su ja mbo daa a kiya beta na ba; guru mbode sua yi e nana mbodaa mbom anya na ba, Sobon Mirikisi yaa yi shiriya ni geni ndani ntani na ba, Nka yomu ntani worosu mu sua ja mbodaa a manki na ba. 7 Sede a kiya yomu su geni yiri de su ba ni yiko beyi manki ba worede su ma Yawudawa ba, yiride Biturusu yaa beyi manki ba Yawudawa. 8 Sede Mirikisi de yaa yi ANKI a siki dishiya Biturusu de e sayi ma yamanki ba Yawudawa, yaa yi ANKI nja ni de ni ma yamanki ba worede su ma Yawudawa ba. 9 Yakubu, nja Biturusu nja Yaaya, su ma tolense, su shina nkye Mirikisi ba ni aniyi anki; se su sha nani nja Banaba worede su sa nsubiya Yesu sakisi, de su geni aniyeri de Mirikisi ba ni. Su yeda de mu te anya worede su ma Yawudawa ba, se osu sua ta anya Yawudawa. 10 Mbode su gye mu de mu yi e shina mu turunwa ni potoruwa, da mu e shina ma mbode Na yi memeri de ni yi.

11 A kwanki de Biturusu zo Antakiya, Ni yi geba ni mbode yi, sobon mbode e yi e ma kyakya ba. 12 Kapi worosu su ntani su zo anya Yakubu, Biturusu yaa si mbosi nja worede su ma Yawudawa ba. Sede de ntani ni keyi ayan, e para ja kiya e yi mbayi bila worede su ma Yawudawa ba sobon yaa yi womba worede su ma ni keshi worede su yi su yanka. 13 Yomu na worosu su Yawudawa nsubiya Yesu hada kiya nja Biturusu su yi munabuki, sobon munabuki asu su ja Banaba de yi mbode su yi.

14 De Ni geni sua yi zunwa dede yiride manki gaskye Kiristi pala ba, Ni gye Biturusu a geba ntani guru nkye, <<Ki ma Yawudawa na, sede ki ma yi zunwa kankye worede su ma Yawudawa ba. Yaya ari kuzukam ki ka worede su ma Yawudawa ba de su biya alada ni Yawudawa?

15 <<Omu de su yapu mu ma Yawudawa <Ba ntani de su ma Yawudawa ba nsu lepi> 16 Ku shina nkye nsebeki yaa samu zunwa ni mere lepi anya Mirikisi, te anya biya doka Musa na ba, sede anya beigaskye a siki Kiristi Yesu. Yomuna omu du, mu sa beigaskye amu a siki Kiristi Yesu de mu yi zunwa mere lepi a siki Beigaskye anya Kiristi ba sobon biya doka Musa ba, sobon anya biya doka Musa yaa sa nse daa yaa yi zunwa mere lepi ba.

17 <<Nde, mua bila zunwa mere lepi a siki Kiristi, e nana kankye omu nkiya mu mu ma nsu lepi naka, da mu ma kankye Kiristi yaa goyi beyi lepi naka? Yi e ma yomu na ba! 18 Nde Ni sakye gina mbode Ni juru, e nana nkye Ni ma nsu watala doka naka. 19 Sobon te anya doka Musa Ni muntu a siki doka de Ni man leyi anya Mirikisi. 20 Su gidiri Ni nja Kiristi kuzukam ba E ni na Ni man la yi gagaba, Sede Kiristi de ma zunwa a siki Na. La yi de Ni man shi a siki nki na, E ni mayi zunwa beigaskye a siki Yaa ni Mirikisi, de so ni nja beyi kiya e yi ba ni. 21 E ni nki aniyeri ni Mirikisi ba, sobon nde gangasi anya Mirikisi sua samu te anya doka Musa na, muntu ni Kiristi e ma baza naka>>