1 Oku Odundu ntani Galatiya! Waa ripe dishiya ku? A pili Ni kokoyi ku a kiya muntu Yesu Kiristi a gidiri. 2 Na so de ni minya ku mbo daa: Ku keleba Aworo Mirikisi sobon de ku biya doka Musa na ko sobon beigaskye ni kelima beta Mirikisi de ku zi? 3 Kuma Odundu na yomu? Beyi de ku para ni Aworo Mirikisi, Kuzukam kwa so de ku karikye a siki nki ni kokori ni kiya ku? 4 Ku sha Genbeki totolo awopi la? Nde yomu na gaskye e ma wopi la. 5 Mirikisi ba ku Aworo e yi nja yi ANKI mamanki a siki aku sobon de ku biya doka Musa la, ko sobon beigaskye ni mbode ku zi?

6 Ku kone Abireyi: <<E yeda ni Mirikisi, su kiriga yi a siki ntani gangasi anya Mirikisi.>> 7 Sobon yomu ku shina nsu beigaskye ni Mirikisi osu na su ma yaya ni Abireyi. 8 Takada ni Mirikisi pala nkye worede su ma Yawudawa ba sua yi yaa ma Mere lepi anya Mirikisi te anya beigaskye, de su rigye beyi manki kyakyawu te anya Abireyi nkye: <<Te anya ake guru ntani sua samu anabirika. 9 Sobon yomu worede man beigaskye sua samu anabirika Abireyi, nsu beigaskye.

10 Sobon guru worede su sa dishiya asu nja doka Musa, su ma a siki lalasheshe sobon e ma rubuta a siki takada beta Mirikisi nkye, <<lalasheshe nama guru nsu de sigeba ni yi mbode ma rubuta a siki takada doka Mirikisi ba.>> 11 E ma a pili nkye ba nse daa de yaa samu zunwa mere lepi anya Mirikisi a siki doka Musa, sobon beta Mirikisi pala nkye, <<nsu yi gangasi anya Mirikisi sua mani la yi te anya beigaskye.>> 12 Doka Musa ma te anya beigaskye naba; <<Sobon beta Mirikisi nkye, <<nsude sigeba ni yi mbo mu guru, e shi na yaa mani leyi.>> 13 Kiristi sila mu dege siki lalasheshe ni doka Musa e kuma ma lalasheshe sobon mu, sobon e ma rubuta a siki takada Mirikisi nkye: <<Lalasheshe na du nsude su lete yi a kiya gidiri.>> 14 Yesu Kiristi see mu sobon anabirika de Mirikisi ba Abireyi e zo anya worede su ma Yawudawa ba te anya Yesu Kiristi, sobon te anya beigaskye mua samu anikowori ni Aworo Mirikisi.

15 Yayuwa, bila de ni yi ku misali a kiya ni mbode ku saba e shi, nde ntani bi seda ba ni nsu de yaa ja mbodaa a kiya e yi ko e rigye mbodaa a kiya e yi ba. 16 Anikowori de Mirikisi ba Abireyi nja zuriya e yi. Takada Mirikisi pala nkye <Ntani zuriya nyowa ba,>> sobon e ma kankye yaa yi beta a kiya ntani nyowa naka, sede nkye <<E ma beta a kiya nse daakaka la,>> E shiya ma Kiristi. 17 Mbode ni mayi nupi e shiya ma da mu: Doka Musa mu, de zo a beyi shekera deri wuru ni talatin, yaa taba shire anikowori mu de Mirikisi e yi ba, ari de yaa ki yi. 18 Sobon nde gado mu ma te doka Musa la, e ma anikowori kuma gagaba, sede Mirikisi a siki ni aniyeriyi e ba Abireyi te anya ni anikowori de e yi.

19 Nde yomu na, mina ma nupi ni doka Musa? Mirikisi ja doka Musa sobon de e nana lepi amu kapi de Yaa ni anikowori Mirikisi yaa zo. Doka sonka butu anya Meleku Mirikisi te anya Musa, nsude sakisi a sisika ntani nja Mirikisi. 20 Sede Mirikisi nkiya e yi, e yi Abireyi anikowori ba dole na nseda e sakisi a sisika su kankye yiri ni Musa ba.

21 Nka yomuna, doka, yaa yi geba nja anikowori Mirikisi na? Yi, yomuna ba! Sede nde doka yaa beyi la yi, da mu e nana kankye mua samu gangasi Mirikisi te anya doka Musa naka. 22 Sede Takada beta Mirikisi pala nkye guru ntani durinya su ma a siki lepi, sobon mbode Mirikisi yi anikowori sua samu te turiki beigaskye a siki Yesu Kiristi, sua ba worede su yeda anya beigaskye.

23 Kapi de kwanki beigaskye mu e zo, doka domuna mu a siki lepi, ari kwanki de beigaskye pelesa. 24 Yomuna su la mu sa a nani doka Musa de e keyi mu ta anya Kiristi, de mu samu zunwa mere lepi anya Mirikisi te anya beigaskye. 25 Kuzukam de beigaskye zo, muma a domuna a siki doka gagaba.

26 Guru aku kuma yaya Mirikisi te anya beigaskye a siki Yesu Kiristi. 27 Guru aku de ku yi tunkwasa a siki Kiristi, kuma kankye Kiristi naka. 28 Ba nana bombom a sisika Yawudawa, ko worede su ma Yawudawa ba, ko sakani yaa nja bunwa, ko nseminji ko mase, guru aku kuma daa a siki Yesu Kiristi. 29 Nde kuma ni Kiristi la, to kuma yaya ni Abireyi naka, yaya nsu si gado te anya ni anikowori de Mirikisi yi Abireyi.