1 Nsum nama zo na ni wuku de mma zo anya ku. <<Ema dole na su zi sheeda beta a baki ntani bi ko wuku>> Yiride ema a rubuta a siki beta Mirikisi. 2 Zo Na ni bi anya ku ni jaa worede su yi mungu mbo kuni nja ririgye ntani guru su bila yi mungu mbo. Kuzukam mma sakye pala jaja ko de ni ma nja ku anya ni ba: Sobon nde ni kuma mbeyi Na bila worede su ma yi lepi ko mungu mbo ba. 3 Tunde kwa bila de ni nana ku nkye Kiristi yaa yi beta te anya na. Kiristi lesa sori a siki ku ba, sede e nana sori yi a siki ku. 4 Kode su gidiri Kiristi te anya rishi sori, nzun yomu e man leyi te anya sori Mirikisi. Kode nkye, muma ntani mere sori la a siki Kiristi, nzun yomu te anya sori Mirikisi mua man leyi nja shi sobon anki de muma yi a siki aku. 5 Ku gonta kiya ku de ku geni ko kuma biya Yesu Kiristi a siki aminshi; ku gonta kiya ku. Ko ku shina nkye Yesu Kiristi ema a siki ku bo? Nde ku te shina ba, kwa puari a siki gwada. 6 Ni beigaskye kwa shina nkye mu ma yayamanki Mirikisi ni gaskye. 7 Kuzukam mua yi lepa te nja Mirikisi de kede ku yi mbo mumungu ba. Ba nkye mu ma yi kokori de mu la kiya mu kankye mu shakiya ni gwada na ba sede de ku yi mbode ema kyakya kode nkye ntani sua geni kankye mua yi yaa yi kyakya ba. 8 Sobon mua taba yi mbode yaa yi geba nja gaskye ba, sede mua biya gaskye. 9 Mua yi perisiki du kwanki de mu lesa sori nde oku ku man sori; lepa amu e shina de ku ma sisika. 10 Mbode sa ni rubuta mbo mu naka a kwanki de ni ma nja ku ba, sobon nde ni zo kede ni yi ku beta nsori, sori de Obagizi ba ni de ni gina ku, ba de njuru ku ba.

11 A karishe, yayuwa na se na daa. ku yi kokori de ku yi zunwa de ma kyakya, ku zi ologba de mma yi ku nshi, ku yeda ni nkiaku, ku yi zunwa selema. Yomuna Mirikisi ni selema nja so yaa ma nja ku.

12 Ku geshe nkiaku ni gesuwa nsuseki. 13 Guru nsubiya Mirikisi sua geshe ku.

14 Aniyeri Obagizi Yesu Kiristi, nja so ni Mirikisi, nja zumunshi ni Aworo Nsuseki ema nja ku guru. Emayomu.