1 Nkayomu, tunde te anya toseyi ni Mirikisi mu mani ANKI mu, mu butu dishiya ba. 2 Sede mu ki kowoni ali mumungu de ma boyi nja kumnya; mua yi munabuki ko yaruwa ni kelima Mirikisi ba. Sede mua pala gaskye a pili te yomu na kowoni nse yaa sheeda gaskye ni dishiya amu a geba Mirikisi. 3 Nde manki kyakyawu mu ma riripe, e ma riripe anya worede su yi lepi la. 4 De obiri durinya mu ripe ndani dishiya worede su beigaskye ba, sobon kede su geni asikye ni dereja manki kyakyawu ni Kiristi, de e shi ma kamani Mirikisi. 5 Sobon mua beyi manki ni kiya mu na ba, sede ni Yesu Kiristi Obagizi mu, muma kankye bunwa aku la sobon Yesu. 6 Sobon Mirikisi, de pala nkye, <<Bila de asikye e beyi asikye a siki dopuwa,>> e sa asikye yi de ba mu a siki dishiya mu de mu geni girima dereja ni kamani Mirikisi a siki Kiristi.

7 Sede muma ni mbo nani mu a siki tuni kesa de nana nkye guru totolo sori mu butu anya Mirikisi la ba anya mu nsebeki ba. 8 Mu sha Genbeki a kowoni turiki, sede mu lense dishiya ba, mu sha pama ni ANKI; Worosu su kwanki mua yi shaka, sede mu butu dishiya ba. 9 Mu geni takaasi, sede Mirikisi mosi mu ba; ntani zi mu suwo, sede mu bebeta ba. 10 Kowoni kwanki mu ma baki muntu yiri de su yi Yesu, sobon yiri zunwa de Yesu yi e pelesa a nkimu. 11 Sobon omu de mu man leyi kowoni kwanki mu ma a siki baki muntu sobon Yesu, de su geni ali e yi nkimu nsu muntu. 12 E shiya sa, muma baki muntu sobon de oku ku man leyi ni gbogbo.

13 E ma a rubutu a siki beta Mirikisi nkye: <<Ni beigaskye; sobon yomu ni yi beta.>> Ni aworo ni beigaskye yiri de omu du mu yeda sobon yomu mma pala manki Mirikisi, 14 Sobon mu shina nkye Mirikisi de dege Obagizi Yesu a kumsha yaa dege mu du yere nja ku yaa la mu te anya de e ma. 15 Guru mbom yaa ma sobon moriya ku la, de aniyeri de zo anya ku yaa jaa yowa teke de yaa ma delili de ntani sua gbede Mirikisi, sobon dereja e yi.

16 Nkayomu mu butu dishiya ba. Kode nkimu yaa bebeta, nzun yomu kowoni nana aworo amu yaa ma sabuwa. 17 Sobon Genbeki ni kwanki piri de mua sha mu yaa dede ba e shi na yaa ba dereja ni dindindin de pi guru Genbeki mu. 18 Sobon yomu ba mbode ndani mu yaa geni na mua kone ba, sede mbo de ndani geni ba. Sobon mbo de ndani ma geni yaa dede ba, mbode ndani ma geni ba e shi la yaa ma gbogbo.