1 Takada butu anya ni Bulusu yaamanki Yesu Kiristi nja yeda ni Mirikisi, nja yayiwa amu Timoti,

Te anya nsubiya Yesu de ma a siki Korenti guru ni ntani Mirikisi de su ma a kesa ni Akaya

2 Aniyeri nja selema ni Mirikisi Adaamu, nja Obagizi Yesu Kiristi e ma nja ku guru.

3 Yobo te anya Mirikisi nja Adaa ni Obagizi mu Yesu Kiristi, Adaa mu nsu toseyi nja Mirikisi de beyi guru takuwa. 4 Mirikisi de e ma ba mu takuwa a siki guru Genbeki mu, sobon de mu ba worede su ma a siki Genbeki takuwa, ni yiri takuwa de mu samu anya Mirikisi. 5 Sobon yiri Genbeki de Kiristi sha a kiya amu, yomu la a siki Kiristi la mua samu takuwa teke. 6 Nde mua sha Genbeki, e ma sobon takuwa ku nja sila aku la. Nde mu yi takuwa e ma sobon ni oku la, yiri de Genbeki ku sa ku kuma nsu kadishiya yiri de omu ma mu sha Genbeki. 7 Sa dishiya amu de mu manshi anya aku e mani sori, sobon mu shina yiri Genbeki de kuma sha yiri de mu sha du, yomu la oku kwa samu yiri takuwa de omu ma mu samu.

8 Yayuwa, mua so de kuman rishi shina ba, ni Genbeki de mu sha a kesa ni Asiya. mu zi nki soseyi, ari mu butu dishiya nkye mua mani leyi gagaba. 9 Ari ema kankye su yi mu tala ni muntu. Ema yomu na sobon kede mu la dishiya ja kiya mu ba sede anya Mirikisi, de yaa dege worede su muntu. 10 Mirikisi butu mu shika mumungu muntu, mu shina Mirikisi yaa butu mu shika mungu mbo. Anya Mirikisi na mu sa dishiya amu yaa kuma sigeba ni butu mu shika guru mumungu mbo, 11 Yiride kwa sua mu to a siki lepa aku. Ntani nyowa sua gbede Mirikisi a kiya amu sobon aniyeri de su yi mu nshi ni keleba lepa nyowa.

12 Kuzukam mbode sa mua dege dolo e shiya ma tunani dishiya amu beyi sheeda nkye omu mu yi zunwa seeki a durinya ni dishiya daa, musama a siki zunwa mu nja ku, mu yi yomu na ni gaskye yiri ali ni Mirikisi, Mu yi mbomu a siki simi ni durinya mu na ba sede a siki aniyeri ni Mirikisi. 13 Sobon mu rubuta ku mbodaa mbom na ba sede mbo de kwa yi yaa karanta ko shina. Ni sa dishiya nkye ku shina yomu. 14 Yiri de ku rigye shina mu guru ba, kwa te shina mu kyakyawu a nana de Obagizi Yesu yaa zo, ari kwa dukwa geba akyiyamu yiri de omu ma mua dukwa geba nku.

15 Sobon ni yeda de ku manshi a kiya na, ni ma yi shiri de ni para zo anya aku de ku samu anabirika son bi. 16 Ni yi shiri de ni biya anya aku nde na te a Makidoniya nja nde ni dege a Makidoniya ma kuma biya anya aku, de ku sua ni nto a siki tepiya na de na ta Yawudiya. 17 De ni shiriya mbomu, kuma geni ni shina mbode na yi bo? ko ni yi de ni jima durinya la sobon nde ni pala nkye <<EE>> ko ni nkye <<Ayi>>?

18 Sede mu tabata nkye Mirikisi ma nsu aminshi la, manki amu de zo anya aku ba e ma ni <<Ee>> ko <<Yi>> na ba. 19 Sobon Yaa ni Mirikisi, Yesu Kiristi, de e ni nja selasi nja Timoti, de mu beyi manki e yi ba ku e man <<Ee>> nja <<Yi,>> na ba sede a siki e yi kowon kwanki e ma <<Ee na.>> 20 Sobon guru anikowori de Mirikisi yi, e ma<<Ee >> a siki Kiristi. Nja te anya Yesu mua pala nkye <<e ma yomu>> ta anya mu mua ba Mirikisi dereja. 21 Kuzukam Mirikisi na e yi mu nja ku de ku sakisi nsori a siki Kiristi. Mirikisi e shiya la zabi mu, 22 Mirikisi samu alama nkye muma na yi la, nja e sa Aworo e yi a dishiya amu, de e ma tabata mu mbode mua keleba a geba.

23 Mirikisi ma sheeda na nde na pala yaruwa na de mbode sa ni de ni kuma te A korenti a kwanki ni gagaba, de kede ni yi anwashi nja ku. 24 Ba e ma kankye mua nana ku yiko a kiya beigaskye na ba, sede mua yi anki nja ku sobon de ku yi perisiki, sobon a siki beigaskye la ku sakisi nsori.