1 Kuzukam a kiya ni beta ni sedeka sobon nsubiya Mirikisi: Ku yi yiride ni pala gye ntani Galatiya nkye su yi. 2 A kowoni nana ni ladi kowoni nseda ku e bila gyolo sa a kisi kyakya yiri mbode e ma samu ba se ni zo tuku de ku keleba ba. 3 Kwanki de ni zo se Ni saka ntani de ku yeda nja su ni takada yeda nja kyawuta mbode ku tala de su te nshi a Wurishelima. 4 Nde ku geni e yi kyawu de ni te nkiya na, se su sa ni te.

5 A beyi de Ni zo a kesa Makidoniya, Na zo anya ku, sede Na para te kyewe kesa Makidoniya tuku. 6 Ki la Na dede anya ku, ko na keyi meka anya ku, sobon de ku sua ni nto tepiya de na yi, guru anya de Na te. 7 Na bila de ni zo anya ku kuzukam de Ni geshe ku kin ni bishe ba; Ni ma sa dishiya de ni yi kwana bi nja ku, nde Obagizi yeda ni. 8 Sede Na sakisi a Apisa ari nana Pentikos, 9 sobon Mirikisi bure ni turiki totolo ni yii anki nsu ampani, ko de oboki geba na su ma nyowa de su ma yi geba nja ni.

10 Nde Timoti zo anya ku, ku kula nshi soseyi kede mbodaa e paru nja shi, sobon e mayi ANKI Obagizi la yiride Ni mayi. 11 Kede nseda, e nene yi. Ku selema yi lapiya de e kuma beyi zo anya na. Ni ma kone turiki de ni geni yi nja yayuwa de su yi tepiya gabada.

12 A kiya ni yayiwa mu Apolos: Ni ologba yi soseyi de e zo anya ku nja ririgye yayuwa. E so de e zo kuzum ba, sede yaa zo anya ku a kwanki de e samu dama.

13 Ku zunwa yi kpanku; ku sakisi nsori a siki beigaskye aku; kuma nsu sori dishiya; ku sakisi nsori a siki Mirikisi. 14 Ku yi guru mbode kwa yi a siki so.

15 Yayuwa ku shina ntani gizi Isitipanus na su para keleba Mirikisi a siki geri Akaya, su kuma beyi kiya su sobon anki ba ntani Mirikisi. 16 Ni mayi ologba ku, yayuwa, ku ba yiri ntani mu girima nja guru worede su ma oboki anki mu, a siki Genbeki mu. 17 Ni yi peri siki ni zo ni Isitipanus, nja Paritunatu, nja Akaikus, sobon ema ni kankye oku la ku zo. 18 Sobon su sa ni peri dishiya yiride su sa ku. Yiri ntani mu yii kyawu de ku ba su girima.

19 Nsubiya Yesu de su ma a kesa Asiya su ma geshe ku. Akila nja Biriskila nja ntani nsubiya Yesu de su ma tala a gizi su su ma geshe ku. 20 Yayuwa de su ma anya mu su ma geshe ku. Ku geshe nkyiaku a siki so yiride nsubiya Yesu sua yi.

21 Eni, Bulusu na, ni rubuta gesuwa mu nnani na.

22 Gbotuma ni guru nsude ema so Obagizi ba. kuzukam, zo Obagizi!

23 Aniyeri ni Obagizi mu Yesu ema nja ku guru.

24 Ni ma so ku guru a siki seni Yesu Kiristi. Emayomu.