1 Nde ni meyi beta ni arishiya ni ntani nyowa nja arishiya meleku, nde niman so ni yayiwa na a dishiya na ba, ni ma kankye gureji nsu kala de mani ampani ba ko ganga nsu yowa kala kowon. 2 Kode nkye ni ma ni kyawuta ni pala mbode yaa paru a geba nja ni ma gane guru mbo Mirikisi de ma a boyi nja guru shina, nde ni ma ni beigaskye de na yi yaa butu totolo dunsi, sede nde niman so ni yayiwa na a dishiya ba, guru mbo worosu mu ma mbodaa na ba. 3 Ko na la mbode ni manshi guru ba potoruwa ni kuma beyi nki na de su shuwuta e yi. Nde niman so ni yayiwa na ba, ba ni nnani wuta anya Mirikisi ba.

4 Nsu so e mani kadishiya, e ma nsu kiriki, e ma zi anwashi keikei yayiwa e yi ba, yaa ma nsu dege dolo ba, yaa ma nsu bwala kiya e yi. 5 E ma dege kiya ba, e ma nsu so kiya e yi na ba, e mayi seberi anwashi ba, e ma keyi yayiwa e yi a dishiya ba. 6 so ya perisiki ni mungu mbo ba sede perisiki ni gaskye la. 7 Nsu so e mayi kadishiya a siki guru mbo, e ma beigaskye a siki guru mbo, e ma nsu sa dishiya, e ma nsu sori dishiya a siki guru mbo.

8 So yaa taba yaa ba. Kyawuta ni pala mbode yaa paru a geba, e ma yaa; kyawuta ni yi beta ni arishiya mbombom, sua beta; shina ni durinya mu guru sua bise. 9 sobon shina amu e kasa yomu na kuma pala mbode yaa paru a geba amu e kasa, 10 sede kwanki de Yesu zo shina amu yaa sika, mbode e ma sisika ba yaa beta. 11 Kwanki de ni ma yaa dende, Ni mayi beta kankye yaa dende, Ni mayi tunani kankye yaa dende, Ni ma gane mbo kankye yiride yaa dende ma gane mbo. Sede a kwanki de Ni yi girima Ni bila yiri wasa de yaya dende su mayi. 12 Kuzukam mua geni sede e ma kankye mua geni a siki mudubi, mua geni sere ba; kwanki e ma zo de mua geni sere sere. Kuzukam shina na e ma sisika na ba; a kwanki de Yesu zo shina na yaama sisika yiride Mirikisi shina mu muma sisika na.

13 Kuzukam mbo wuku na su ma: beigaskye, sa dishiya nja so. Sede totolo a siki asu e shiya ma so.