1 Ni zi nabari nkye ali nungwe mumungu ma a siki ku, yiride ko a siki nsu biya boka sua yi ba: nse minzi yaa kwana nja mata ni adaa e yi. 2 Ari kwa dege dolo! e kamata de ku yi beki siki, de ku butu nsude e yi mbo mu a siki aku bo? 3 Kode nkye Ni ma nja ku anya ni ba, Ni ma nja ku a siki Aworo Mirikisi. Ni rigye yi nsude yi mbo mu shiriya, kankye Ni ma anya ni nja ku. 4 Nde na ku tala a siki seni Obagizi Yesu, Ni ma anya ni nja ku a siki Aworo Mirikisi, nja sori Obagizi amu Yesu Kiristi, 5 ku la yiri nse mu ba obiri, de e bebeta yi nki nsu yi lepi, sobon de e samu sila ni aworo yi a nana ni shiriya Obagizi amu Yesu Kiristi.

6 Dolo de kwa yi e man kyawu ba. Ku shina bo nkye darigaza piri yaa dama deleki nyowa ba? 7 Ku butu darigaza wuri de e mani lepi, de kuma sabuwa darigaza de ma lepi ba, dun yomu na ku ma. Sobon Kiristi de ma kankye timshiya ni buki nyenteri, su munka yi sedeka. 8 Nkayomu mu sigeba ni buki mu, ba darigaza wuri, darigaza ni kyeta nja mungu mbo ba, sede nja buredi de mani darigaza ba, se ni buredi aminshi nja gaskye.

9 Ni rubuta ku nshi a siki manki na kede ku yada kiya nja nsu kwana nja mata nseda ba, 10 ba Ni nkye nsu kwana nja mata ntani de su ma ni ali durinya ba, de su ma nsu mungu, ko nsu opu nja nsu kwa yi mbode ma na su ba, ko nsubiya boka, nde ema yomu na, ema dole na ku butu bila durinya gabada. 11 Sede kuzukam Na rubuta manki mu, de kede ku zunwa nja worede sua sukwa nkiasu nkye su ma nsubiya Yesu sede sua yi mumungu mbo ko opu, nsu bowuta boka, nsu kwana ni mata de ma na su ba ko nsu yi bebeki beta a kiya nseda, ko suku nama nse a beyi ko nsu sha giya ko bolowa. Yiri nsu woromu kede ku si mbosi nja su ba.

12 Mina dama ni, de Na yi worede sua biya Yesu ba shiriya? Worede su ma nsubiya Yesu de sua yi lepi na kwa yi su shiriya bo? 13 Mirikisi yaa yi worede suabiya Yesu ba shiriya. <<Ku kula obiri a siki aku.>>