1 Eni ni ma nsu yenshi na bo? Ni ma yaamanki ni Yesu na bo? Ni geni Obagizi amu Yesu bo? Oku kuma delili ni anki na a siki Obagizi na bo? 2 Nde ni ma yaamanki na anya worosu ba, ni ma yaamanki na anya ku! Sobon oku na kuma sheeda ni anki ni yaamanki na a siki Obagizi.

3 Ni da mu na ni ma tengele kiya na a geba worede su ma sua bila de su yi ni shiriya. 4 Mu mani sori de sua ba mu si ni sha bo? 5 Mu mani dama de mua yi tepiya nja mata nsubiya Yesu bo, yiri de ririgye yayamanki nja yayuwa ni Obagizi, nja Kepasi su ma yi bo? 6 Ko Eni nja Banaba na kowe e kamata de mu yi anki ni si nkiamu? 7 Waa yi anki shoja de yaa biya kiya yi? Waa yi bikiya inebi de yaa suku yaya yi ba? Waa kone saan de yaa sha nono yi ba? 8 Ni ma pala da mu kowon na? Ba doka Musa ma pala yomu bo? 9 Ema a rubuta a siki Doka Musa nkye, <<Kede ku nana saa de yaa yi noma si mbosi kwanki de yaa kwa yi keikei bikiya.>> Saa na kin Mirikisi ma damu nsu? 10 Ba sobon omu na doka Musa mayi beta bo? Ee, ema sobon omu na su rubuta, ema dole de nsu bikiya nja nsu tala yi keikei bikiya su sa dishiya a keikei bikiya na sua samu lobo asu. 11 Nde mu nyukwa saba ni Aworo Mirikisi a siki dishiya aku, ema mbodaa na nde ku ba mu mbosi mu si nja keikei sa nki de ma kankye keikei bikiya de mua nweyi? 12 Ari nde worosu mani dama yomu, omu mu pi su dama ni yi yomu bo?

sede mu yi ampani ni dama mu ba. Nzun yomu, mu kadishiya amomoko zo ni mbode ya nana anki ni nabari kyakyawu ni Kiristi. 13 Ku shina bo nsu anki a siki Laki Mirikisi anya ni na su ma samu mbosi asu bo? nsu anki anya beyi sedeka kuma su ma samu lobo asu a siki mbode su munka sedeka anya beyi sedeka na bo? 14 Yomu na kuma Obagizi pala nkye nsu anki beyi manki nabari kyakyawu sua samu mbosi asu anya ni anki nabari kyakyawu de su ma yi na.

15 Sede ni yi ampani ni mbodaa dege siki dama mu ba. Ni kuma rubuta ku da mu de ku yi mbodaa ba ni na ba. Yaa pi ni kyawu de ni muntu nja de kwa nana ni dege dolo a siki da mu. 16 Nzun de ni ma yi anki ni beyi nabari kyakyawu mu, e ma ni mbode na dege dolo naba, ema ni dole na de ni beyi nabari kyakyawu mu. Gbotuma na nde ni yi anki beyi nabari kyakyawu mu ba! 17 Su nkye ni so dishiya na ni ma yi anki mu, da su ba ni nani wuta ni anki de ni ma yi; sede ba ni so dishiya na ni ma yi anki mu ba, sobon Mirikisi ba ni amana na. 18 Mina ma nani wuta na? Nani wuta na e shiya ma, ni beyi manki ni nabari kyakyawu kyawuta, kuma mma nana sori na anya ni beyi manki nabari kyakyawu mu ba.

19 Ko de ni ma bunwa nseda na ba , nzun yomu Ni la kiya na ni ma bunwa konwawa, ni yi yomu na de ni keyi ntani nyowa zo nsu anya Yesu. 20 Kwanki de Ni ma a siki Yawudawa Ni la kiya na ma kankye nseminji Yawudawa de ni keyi Yawudawa zo nsu anya ni Yesu. Anya ni worede doka Musa mani sori a kiya asu Ni la kiya na ma kankye nsude doka Musa man sori a kiya yi, ko de doka Musa mani sori a kiya na ba, Ni yi yomu na de ni keyi worede doka Musa mani sori a kiya asu zo nsu anya Yesu. 21 Anya ni ntani de su ma doka ba Ni la kiya na ma kankye nseminji de ma Yawudawa ba, ba ni nkye doka ni Mirikisi e ma a kiya na ba sede doka Kiristi na ema a kiya na, Ni yi yomu na de Ni keyi zo worede ma Yawudawa de su ma doka zo anya ni Yesu la. 22 Anya ni worede su man sori a siki Yesu ba Ni la kiya na man sori ba, sobon de Ni keyi worede su man sori ba zo nsu anya ni Yesu. Ni ma mbo guru anya guru ntani sobon de ni sila ni worosu su asu. 23 Ni yi guru mbo mu sobon manki nabari kyakyawu, de Ni ma ni lobo na a siki anabirika yi.

24 Ku shina bo a siki nsu gudu a pili tatarigye, guru nsu gudu su mayi kokori de su bishe nkiasu, sede nsedakaka na yaa shakiya de e keleba nani wuta yi bo? Sobon yomu se Ku yi gudu yiride kwa samu nani wuta. 25 Worede su ma yi gudu tatarigye su mayi shiri na kyakyawu. Su ma yi yomu na de su keleba lende de yaa bebeta; sede omu mu mayi gudu amu de mu keleba nani wuta de yaa ma ari gbogbo na. 26 Sobon yomu gudu na mani wopi na ba; topula na ma kankye mma buga akusuka na ba. 27 Sede ni ma poro nki na, ni la yi ema bunwa na sobon de kede a beyi de ni gye worosu manki Mirikisi, Eni nkiya na nlesa nani wuta ni tatarigye de ni yi.