1 Nde nseda aku mani damuwa nja yayiwa e yi, kede e keyi kara e yi te anya anikari de mani womba Mirikisi ba, yaa yi kyawu de e keyi te anya nsu shiriya de womba Mirikisi ba? 2 Ku shina nkye nsubiya Mirikisi na sua yi durinya shiriya bo? Se nde kwa yi durinya shiriya, ku deta de kwa yi shiriya worosu mbom piri piri bo? 3 Ku shina nkye Mua yi meleku Mirikisi shiriya bo? Belente mbode mani durinya! 4 Nkayomu, nde ku mani yiri damuwa mu nja nkiaku, mina sa de kwa la nkiaku te anya worede shina Mirikisi ba de su yi ku shiriya! 5 Ni pala yomuna de ku zi kumnya. Nseda ma a siki aku de yaa yi nsubiya Yesu shiriya bo? 6 Sede yii kyawu, de yayiwa e keyi kara yayiwa yi nsubiya Yesu te anya worede su ma nsubiya Yesu ba!

7 Gaskye nde ku keyi kara nkiaku ku shushe nkiaku naka. E pi de ku yi kadishiya de su shushe ku bo? Mina sa de kwa bila de su shushe ku ba? 8 Sede, oku nkiaku ku shushe ntani, nja ku yi mbo mu ni yayuwa ku. 9 Ku shina nkye mungu ntani sua yuru a solota gizi Mirikisi ba? Kede nseda shishirigye ku ba: ko nsu ali nungwe ko kwana ni mata nseda, ko nsubiya boka ko mase kilaki ko menza nsu kwana nja nkiasu, 10 ko nsu bolowa ko nsu kyashi ko nsu bugu ngiya, ko nsu basi ntani a bayi, ko nsu kwa yi keikei ntani nsori, guru asu sua yuru a solota gizi Mirikisi ba. 11 Worosu a siki aku yomuna kuma a beyi. Sede Mirikisi wonkye dege lepi ku, kuma ntani de su la munka ba Mirikisi; kwa sa ku de ku ma kyakya nja Mirikisi sobon seni Obagizi amu Yesu Kiristi nja Aworo Mirikisi amu.

12 <<Guru mbo ni yeda nshi.>> Sede ba guru mbo na ema ni anpani anya na ba. <<Guru mbo ni yeda nshi.>> Sede Nama bunwa ni mbodaa ba. 13 <<Mirikisi yi mbosi sobon siki, e kwa yi siki sobon mbosi>> Sede Mirikisi yaa alaka su guru. Nki amu e mani ali nungwe aba, sede su yi nki amu sobon Obagizi la nja Obagizi sobon ni nki la. 14 Mirikisi dege Obagizi yiri kumsha, Mirikisi yaa kwa dege mu du. 15 Ku shina nkye nki aku ma ganga nki Kiristi na. Na yi la ganga nki ni Kiristi ngama nja nki mase kilaki? Sam na yi ba! 16 Ku shina nkye guru nsude kwana nja mase kilaki e ma nki daa nja shi bo? Sobon e ma rubuta a siki takada beta Mirikisi nkye, <<Guru asu bi sua ma nki daa.>> 17 Sede nsude yada kiya yi nja Obagizi e ma daa nja Obagizi a siki aworo. 18 Ku yi gudu bila ali nungwe. Guru worosu su lepi de nsebeki yaa yi e ma nki aba, sede nsude yi ali nungwe e bebeta nki yi naka. 19 Ku shina nkye nkiku e ma anya zunwa Aworo nsuseki, Aworo de Mirikisi ba ku? Ku shina nkye nki aku ema na ku aba; 20 Mirikisi see ku, nkayomu ku bowuta Mirikisi ni nki ku.