1 Yayuwa, Ni ma so ku turunwa mbode paru nja nsu adaatolo amu guru asu su yi tepiya a kisi gidagida guru asu kuma su yi tepiya a siki totolo riki . 2 Guru asu su yi su tunkwasa a siki ni gidagida nja a siki ni totolo riki de su ma yayagizi ni Musa. 3 Guru asu su si mbosi ni aworo Mirikisi, 4 su sha riki mu ni aworo Mirikisi; su sha dege riki ni aworo de butu dege dunsi mayi tepiya nja su, dunsi mu ema Kiristi la. 5 Nzun yomu worosu asu jima Mirikisi ba; Mirikisi sa su muntu a siki denka.

6 Da mu ema misali la de kede mu sa dishiya amu a siki mbo mumungu yiri de nsu adaatolo amu su yi. 7 Kede kuma nsu biya boka, yiri de worosu asu ma su yi; kankye yiri de ema a rubutu a siki beta Mirikisi nkye: <<Ntani su zunwa su si mbosi su sha riki a beyi yomu su dege a bisi su yi wasa nja kwana nja nkiasu.>> 8 Kede mu yi zunwa ali nungwe nja nkiamu yiride worosu asu su yi, ari ntani dupu ashiri ni wuku su muntu a nana daa. 9 Kede mu gwada Obagizi, yiride worosu yi, ari mesi kisa worosu asu. 10 Kede mu yi mungu beta, yiride worosu asu su yi, ari meleku ni muntu zo kisa su.

11 Guru mbo woromu su paru nja nsu adaatolo amu de ema mu misali na, su kuma rubuta yi de ja mu kuni na, omu de muma a kwanki ni karishe. 12 Sobon yomu nde ki ma geni nta ki sakisi nsori na, ki kone kede ki puari! 13 Ba gwada de san ku de su taba yi ntani yiri yi ba. Mirikisi ema nsu aminshi la; yaa taba bila de su yi ku gwada de pi sori aku ba. Sede a kwanki de gwada zo yaa sua ku nto de kede ku puari ba yaa ba ku anya sila.

14 Sobon yomu, oku yayuwa na de ni ma so, ku gudu dege bowuta boka ni adaatolo aku. 15 Na yi beta nja ntani de man kiya la; ku yi kiya ku shiriya de ku geni mbode ni pala. 16 A kwanki de mua sha a siki koshiya de mua gbede Mirikisi a kiya yi, e shiya sa muma daa a siki zini Kiristi bo? Buredi de mua sua suku e shiya sa mu ma daa a siki nki Kiristi bo? 17 Sobon gwala buredi daa kaka, omu, de muma ntani nyowa, muma nki daa na, sobon guru amu suku buredi daa na.

18 Ku kone ntani Izireyila: Su suku nama de Pirisi su beyi sedeka a kiya anya beyi sedeka ba Mirikisi, su ma daa nja worede su suku anya beyi sedeka de Pirisi e beyi a kiya ni dunsi Mirikisi bo? 19 Mina ni ma yi nupi, mbode su beyi sedeka ba boka na e ma mbodaa, ko boka nkiya e yi na ema mbodaa? 20 Yi, sede ntani de su ma ba boka sedeka su ma bowuta arizeni la, su ma bowuta Mirikisi na ba, na bila de ku bowuta boka de su ma bowuta yi ba. 21 E yi kyawu de ku sha dege koshiya ni Obagizi nja de ku kwa sha a siki ni koshiya arizeni ba; e kwa yi kyawu de ku si mbosi a teburu Obagizi nja de ku kwa si a teburu ni arizeni ba. 22 Nde mu yi yomu mua bila de Mirikisi yi anwashi nja mu la? Mu yi sori pi Mirikisi la?

23 <<Guru mbo su yeda mu de mu yi>> Sede ba guru mbo na mani moriya anya mu ba. <<Guru mbo su yeda mu de mu yi>> Sede ba guru mbo na yaa sa mu mani sori a siki Mirikisi ba. 24 Kede ki yi kiya ke kin mbo kyakyawu, sede ki bila mbode yaa yi yayuwa ake guru kyawu.

25 Ku suku guru yiri nama de su ma la see abije kede ku minya ba, sobon de kede dishiya ku e basi sobon anya de nama ni e butu. 26 Beta Mirikisi nkye, <<Durinya nja mbode ma a siki yi guru e ma ni Obagizi la.>>

27 Nde nsude shina Mirikisi ba sukwa ku ta a gizi yi de ku si mbosi, nde ku yeda ku te, si guru mbode e ba ku kede ku minya yi ko woni yiri mbosi na ba, sobon kede dishiya ku e bashi ni anya de mbosi e butu. 28 Sede nde nseda gye ku nkye, <<Su la nama ni beyi sedeka ba boka,>> Kede ki suku, sobon ni nsude gye ku nja de dishiya ku e ma sere ba lepi, 29 Ni mayi nupi a kiya dishiya ni nsude pala gye ku na, ba na ku ba. Kode nseda a siki aku yaa yi yaa pala nkye, <<Mina sa tunani dishiya nseda yaa nana ni yi mbode ni bila de de ni yi? 30 Nde ni gbede Mirikisi tuku ni samu lobo na siki mbosi, mina sa de sua basi ni sobon ni mbosi nde ni gbede Mirikisi tuku na ni si?

31 Sobon yomu, guru mbode kwa yi ko kwa si ko kwa sha, ku yi guru sobon yobo seni Mirikisi. 32 Kede kuma delili de kwa sa nseda e yi lepi, ko Yawudawa, ko worede su ma Yawudawa ba ko ntani nsubiya Mirikisi, 33 Ku kokoyi mbode ni ma yi, a siki guru mbode ni ma yi. Mma yi kokori de ni geni ni jima kowoni nse a kowoni turiki, Sobon Ni ma bila mbode yaa sua ni to na ba sede mbode yaa sua ntani to nyowa, ni yi zunwa yomu na de ntani nyowa su samu sila.