1 Yayuwa, de Ni zo anya aku ni manki de Mirikisi ba ni de ka yi ku nshi Ni nana shina ko nkye Ni mani simi ba. 2 Ni yi yomu sobon kwanki de Ni ma nja ku, ni gye ku manki Yesu Kiristi e shi de su gidiri yi. 3 Pari de Ni zo anya ku ni yi sori dishiya ba, nja kakada nki sobon womba. 4 Manki na nja kokoyi na ma kelima wayo ko lelebe naba, sede ni sori Aworo Mirikisi, 5 sobon kede beigaskye aku e mani simi nsebeki ba, sede sori ni Mirikisi.

6 Nzun yomu, mu yi beta manki simi a sisika ni nsu worede su sori a siki beigaskye, sede ba simi ni nsu ntani kwanki mu ko ni toree ni kwanki mu, de e mani anpani ba. 7 Sede mu yi beta simi Mirikisi de ma a boyi, simi de Mirikisi shiriya tun kapi pari ni kwanki, sobon dereja amu. 8 Ba nseda a siki toree ni kwanki mu de gane simi mu ba, sobon nde su gane sua gidiri Obagizi nsu dereja ba. 9 Sede yomu na ema rubuta a siki takada Mirikisi nkye:

<<Ba ndani de geni,

ba kuni de zi,

ba dishiya de taba yi tunani

mbode Mirikisi shiriya ba worede su so yi.>>

10 Sede Mirikisi pelesa yi ba mu te anya Aworo nkye.

Aworo yaa sa ndani kone kowoni mbo, ko mbo Mirikisi de ma a boyi de mani wuya shina. 11 Waa shina tunani de ma siki dishiya nsebeki se aworo de ma siki nsebeki e shiya kede bo? yomuna ba nsude shina tunani dishiya Mirikisi, se Aworo Mirikisi. 12 Omu mu keleba aworo ni durinya na ba sede Aworo de butu anya Mirikisi, sobon de mu shina mbode Mirikisi ba mu kyawuta ni dishiya daa. 13 Mbo mu e shiya ma mbode mua gye ku, ba ni simi beta de nsebeki yaa kokoyi na bo sede Aworo Mirikisi, te anya pelesa gaskye manki ba worede su ma ni Aworo. 14 Nsude mani Aworo Mirikisi ba yaa yeda ni mbode butu anya Aworo Mirikisi ba, e ma kankye Odundu na anya e yi, yaa kwa shina su ba, sobon ta anya Aworo la sua shina yi. 15 Nsude mani Aworo Mirikisi shina mbo guru, sede e shi nkiya yi ba nsude yaa yi yaa de shiriya ba:

16 <<Waa shina dishiya Obagizi

de yaa yi yaa gye yi mbode yaa yi?

Sede omu mu mani dishiya yiri ni Kiristi.