1 Ku sakisi nsori ku so yayuwa ku nja ku yi memeri kyawuta ni Aworo nsuseki, musama kyawuta ni beyi manki Mirikisi. 2 Sobon nsude yaa yi beta ni arishiya mbombom e mayi beta nja ntani na ba sede nja Mirikisi la. Nseda ma zi mbode e ma pala ba; sobon e ma pala mbode su ma a boyi ni sori Aworo Mirikisi la. 3 Sede nsude e ma pala mbode yaa paru a geba, e meyi ntani na beta de e ja su sori, nja ja su sori guyam, nja ba ntani takuwa dishiya. 4 Guru nsude e mayi beta ni arishiya mbombom e ma sua nki e yi na to, sede guru nsude e ma beyi manki Mirikisi e ma sua nsubiya Yesu la to. 5 Ni bila de guru aku ku yi beta ni arishiya mbombom, sede Ni pi bila de ku beyi manki Mirikisi na. nsu beyi manki Mirikisi e pi nsude mayi beta ni arishiya mbombom, sede nde nseda ema pala maana yi gye ntani nsubiya Yesu de e gina su.

6 Kuzukam, yayuwa na, nde Ni zo ni ma yi ku beta ni arishiya mbombom, ampani mina ni ma ba ku, sede nde mba Ni zo ku ni worosu su pelesa dege anya Mirikisi ko shina ko beyi manki Mirikisi ko kokoyi dege beta Mirikisi bo? 7 Yomuna ema nja mbo worede su man leyi ba kankye nsu tapire nja kakaki, nde worede su ma wula tapire nja worede su ma buga kakaki ni su wula su kyakya ba yaya worede su ma zi sua gane mbode su ma wula? 8 Nde nsu wula koho ni yanki wula kyakya ba, waa yaa yi shiri yanki? 9 Yomuna. Nde ku yi beta ni arishiya daa mbom de ntani shina ba, yaya na ntani sua shina mbode kuma pala? Beta de ku yi e mani ampani ba naka. 10 Mu mani arishiya beta mbombom a durinya mu, sede guru asu su ma ni maana. 11 Sede nde Ni ma gane beta de nseda e ma pala ba, Ni ma bakwe naka nja nsude e meyi beta ni, e shi ma e kwa ma bakwe anya na. 12 Yomuna Ni ma gye ku. Tunde ku mayi memeri kyawuta ni Aworo nsuseki, ku sakisi nsori a siki kyawuta ni Aworo nsuseki de ku sua nsubiya Yesu nto.

13 Sobon yomu guru nsude yaa yi beta Mirikisi ni arishiya de ntani sua gane ba e yi lepa de Mirikisi e beyi kyawuta ni Aworo de e pala maana mbode e pala. 14 Nde Ni yi lepa ni arishiya daa mbom de ntani shina ba, aworo na na yi lepa, sede dishiya shina mbode mma pala ba. 15 Mina na yi? Na yi lepa ni aworo na, sede na kwa yi lepa ndishiya na du; Na yi wonka ni yobo Mirikisi ni aworo na, sede Na kwa yi wonka yobo Mirikisi ni dishiya na du. 16 Nde ki ma yobo Mirikisi ni aworo ke na kin, yaya na worede su ma zi mbode ka pala ba sua nkye, <<E ma yomu>> a kiya gbede de ka yi, tunde e shina mbode ka pala ba? 17 Kode nkye lepa ke ni gbede Mirikisi e ma e kyawu, sede worede su ma zi ke samu sua nto ba.

18 Ni gbede Mirikisi de Ni mayi beta ni arishiya mbombom pi ku guru. 19 Sede a siki tala ni nsubiya Yesu Ni pi so de ni pala kelima beta biyari ni dishiya na de ni kokoyi ntani nja de na pala kelima dupu gom ni arishiya mbombom de ntani gane ba.

20 Yayuwa na, kede ku yi tunani kankye yaya dende ba. Anya ni yi mbo mumungu kuma kankye yaya dende, sede kuma toree ntani anya tunani aku. 21 Ema a rubutu a siki doka Mirikisi nkye:

<<Na yi beta nja ntani worosu mu

te anya ntani ni arishiya bakwe

nja a baki bakwe na sua zi beta na,

sede nzun yomu sua zi beta na ba,>>

Nzi Obagizi.

22 Sobon yomu, beta ni arishiya mbombom, e ma alama na, ba ni nsubiya Yesu naba sede ni worede su shina Mirikisi ba; kyawuta ni beyi manki Mirikisi, e ma ni nsu beigaskye la, ba e ma ni worede su man rishi shina Mirikisi naba. 23 Yomuna nde ntani nsubiya Yesu su tala gabada kowoni nse mayi beta ni arishiya mbombom, se worosu su de shina mbode ku mayi ba ko mere beigaskye ba zo ma a siki aku, sua nkye ku ma nsu somiya bo? 24 Sede nde kowoni nse te beyi manki Mirikisi se nseda de shina Mirikisi ba zo ma a siki ku anya ni se mbode kua pala kpa dishiya e yi ari e juyi bila mungu mbo e yi, 25 nsude shina Mirikisi ba de ma a siki aku mbo mumungu de ma a siki dishiya e yi yaa pelesa a woze. Anya ni yaa dure a kisi e yobo Mirikisi nkye, <<Gaskye Mirikisi ma a siki aku!>>

26 Mina mua yi yayuwa? Nde ku tala gabada, konse mani wonka yobo de yaa yi a geba Mirikisi, nseda e mani kokoyi de yaa kokoyi ntani, nseda e mani beta de yaa pala gye ntani butu anya Mirikisi, nseda yaa yi beta ni arishiya mbombom, nseda yaa pelesa beta de su yi ni arishiya ni. Ku yi daa daa guru de ku sua nsubiya Yesu nto. 27 Nde worosu su sua yi beta ni arishiya daa mbom, kede e bishe ntani bi ko wuku, su kuma yi dandaa, nseda kuma e ma nsu pala maana yi. 28 Nde nsu pala maana yi ma ba nsu yi beta ni arishiya bombom ni su yi shuru a siki ntani nsubiya Yesu su yi kiya su beta nja Mirikisi. 29 Nde nsubiya Yesu su tala gabada anebi bi ko wuku sua yi beta, ririgye su yi tunani kyakyawu a kiya mbode sua pala. 30 Nde nseda keleba manki dege anya Mirikisi, nsude mayi beta dege pari ni e yi shuru de nsude keleba manki dege anya Mirikisi ni e pala mbode Mirikisi gye yi. 31 Kwa yi yaa pala mbode Mirikisi gye ku guru aku dandaa de konwawa yaa kokoyi mbode kwa pala, yaa kuma ja su sori guyam. 32 Ku shina, anebi su ma iya biya ni aworo asu. 33 Sobon Mirikisi amu ma Mirikisi ni rikishi naba sede ni selema na.

Yomuna e ma a siki guru tala ni nsubiya Yesu, 34 E yi kyawu de mata su yi beta a siki tala ni nsubiya Yesu ba. Sobon su yeda su de su yi beta ba, sede dole na su biya, yiride Doka Musa pala. 35 Nde mbodaa ma de su ma so su shina, su minya minzi asu a gizi; e ma mbo kumnya na mata su yi beta a siki tala ni nsubiya Yesu.

36 A kiya ku na beta Mirikisi para? Ko oku na kin beta Mirikisi zo anya ku? 37 Nde nseda e ma yi tunani nkye e ma anebi la ko nsu kyawuta ni aworo, se e shina nkye mbode Ni ma rubuta ku nshi mu e ma doka dege anya Mirikisi la. 38 Nde nsude ki yeda ni doka mu e shi ma Mirikisi yaa yeda nshi ba.

39 Sobon yomu yayuwa na, ku yi memeri ni pala beta de butu anya Mirikisi, kede ku nana nseda yi beta ni worosu su arishiya mbom ba. 40 Sede ku yi kowoni mbo kyakya yiride yaa sua ntani to.