1 E ni Bulusu nkiya na, mma ologba ku, e ni de su ma nkye <<Ni ma ni soki kiya sobon Kiristi>> nde ni te ma nja ku ndani ni ndani, sede <<Ba puari geba>> nde ni ma nja ku ba! 2 Mma yi ologba ku kede ku sa ni nnana ku sori nde ni te zo sobon ni shina na yi yaa nana worede de su ma tunani nkye mbo de mua yi e ma ni yiri durinya mu la. 3 Kode nkye mua zunwa a siki durinya la, sede yanki mu e ma yiri de durinya sua yi na ba. 4 Keyi yanki mu de mua yi yanki nshi e ma keyi yanki durinya mu na ba sede mua yi ampani ni keyi yanki Mirikisi na de mu juru tunani yaruwa ni dishiya ntani. 5 Mua juru kowoni yiri musu de e ma nana ntani shina Mirikisi, mua kuma ni kowoni tunani dishiya nse beki de su biya doka ni Kiristi. 6 Nja muma shiri de mu ba nsu lesa zi poro, nde ku beyi girima te nja Kiristi.

7 Ku kone mbo de e ma paru a sisika aku maana. Nde nse da ku nkye e ma ni Kiristi la, bila de nse ni e shina nkye omu ma du mu ma ni Kiristi la. 8 Ko nde mma dukwa geba a kiya sori de Obagizi ba mu de mu gina ku, ba de mu juru ku na ba, e ni taba zi kumnya a kiya sori mu ba. 9 E ni ma bila de ni ba ku womba a takada de ni rubuta ku nshi na ba. 10 Sobon worosu su aku su pala nkye. <<A siki takada Bulusu e ma nana sori nja wuya, sede nde e ma nja mu, e ma nsu beta soseyi na ba nja beta e yi ma mbo da na ba.>> 11 Yiri ntani mu su shina nkye yiri de mu rubuta a siki takada mu a kwanki de mu ma nja su ba, yomuna mua yi nde muma nja ku.

12 Waa ma omu! mu deta de mu la kiya mu kankye ntani de su ma la kiya su su pi konwawa ba. Ntani worede mu su ma gonta kiya su nja nkyasu, su ma Odundu la. 13 Sede omu mua dukwa geba pi yiride e kamata ba sede mua dukwa geba a kiya yanka de Mirikisi ba mu, yanka de yada nzun oku. 14 Oku ma ku ma a siki yanka mu de Mirikisi ba ni, Sobon yomu mu bise bikiya ni yiri ba de ni te ari anya ku sobon manki kyakyawu ni Kiristi. 15 Dukwa geba amu e pi yiri de e kamata mu yi ba, e kuma ma te anya ANKI worosu su de su yi naba. Sede sa dishiya mu e shiya ma de, beigaskye aku e sigeba, yomuna ANKI amu a siki ku yaa ja yowa soseyi. 16 De mu beyi manki nabari kyakyawu a worosu su kesa de su ma a geba nku. Ba sobon de mu bila de mu yi seni te anya ANKI de worosu su rigye yi a kesa daa ba.

17 Sede, Yiri de beta Mirikisi pala nkye, <<Du nsude yaa dukwa geba e yi, e dukwa geba sobon ni Obagizi.>> 18 Sobon ba nsude e ma yobo kiya yi la sua yeda nshi ba, sede nsude Obagizi yobo yi.