1 Mma ologba ku de ku kadishiya nja Odundu na de mmayi; sede ku kadishiya nja ni. 2 Mmayi kishi aku kishi sobon so ni Mirikisi de e mayi a kiya ku. Ni shiriya ku amere nja Kiristi, na so de ni la ku ba yi ba dola kankye okeshe ba Yesu. 3 Sede mmayi womba kede yiri mbode paru nja Awawu e paru nja ku mesi shirigye yi ni wayo e yi, kede oku ma dishiya ku e tari bila sisika beyi kiya nja aminshi a siki Kiristi. 4 Sobon nde nseda zo ku ni manki Yesu daa mbom ba Yesu nsude mu keyi ku manki e yi ba, ko nde ku keleba aworo daa mbom de ma daa de ku keleba anya mu ba, ko e ma manki daa mbom nja nsude ku keleba anya mu, kode nkye e ma mbo mu nja nsude mu kokoyi ku. 5 Sede worede oku kwa sukwa <<Toree yayamanki>> su pi ni mbodaa ba. 6 Kode nkye su kokoyi ni yiride na yi beta ba, sede ni man shina mbo. Mu nana ku mbo worosu mu a kowoni turiki. 7 Ni yi lepi aka de ni bwala kiya na de su dege ku te a totolo meseyi te anya beyi manki Mirikisi kyakyawu te anya ku kyawuta? 8 E ma kankye ni keleba gyolo anya worosu su nsubiya Yesu nsori de ni yi ku ANKI. 9 A kwanki de ni ma nja ku ni lesa mbodaa ba, ni mani mbode na yi ni gyolo nzun yomu ni dama ku ba, sede yayuwa de su butu dege Makidoniya na su ba ni guru mbode mma so. Ni ja ku loni a kwanki ni ba, Na kuma sigeba ni yi yomu. 10 Sobon gaskye ni Kiristi de ma a siki na, ba nseda a siki kesa ni Akaya de yaa nana ni dukwa geba. 11 Mina sa de ni pala yomu? Sobon ni ma so ku ba na? Mirikisi shina mma so ku! 12 Na sigeba ni yi mbode ni mayi a siki ku ni ki keleba gyolo anya ku, sobon de worede sua dukwa geba nkye su mayi ANKI kyakya yiride mua yi. 13 Sobon yiri ntani woroni su ma yayamanki gaskye naba, nsu ANKI yaruwa la, su la kiya su ma kankye yayamanki ni Kiristi. 14 E ma mbo mamanki naba sobon obiri nkiya yi e ma la nki e yi ma kankye meleku ni asikye. 15 Sobon yomu e ma mbo mamanki naba nde yayamanki obiri juyi kiya su kankye yayamanki ni gangasi, a karishe sua samu nani wuta asu kyakya ni ANKI su.

16 Mma sakye pala jaja: Kede nseda e geni kankye ni ma Odundu. Sede nde ku mayi tunani yomuna, ku keleba ni kankye Odundu yiri de ku mayi tunani, de ni samu mbo dukwa geba piri. 17 Yiri dukwa geba mu de ni mayi, ba nkye Obagizi na sani mayi beta mu ba, sede a siki beta mu mma dukwa geba kankye Odundu la. 18 Tunde ntani worosu su sua dukwa geba kankye yiride ntani durinya sua yi, bila de e ni ma ni yi yomu. 19 Oku de ku man wayo soseyi, ari de kwa yi peri siki de ku zi beta nsu Odundu. 20 Nde nseda sa ku ma bunwa Ku ma beyi girima, ko nde e keleba ku mbode e ma na ku ko e more ku ko e nana ku sori ko e yi ku mari a pisika. 21 E ni yaa ma ni mbo kumnya nde ni pala nkye muma nsori ni yi mbo worosu mu ba! nde nseda yi sori dishiya e dukwa geba a kiya mbodaa, e ni ma na yi sori dishiya de ni yi yomu, anya mu de mmayi beta kankye Odundu la. 22 Nde su ma ntani Ibireniyawa la, e ni ma du ni ma Ibireniyawa la. Nde su ma geni kankye su ma ntani Izireyila la, yomuna e ni ma du. Nde su ma zuriya ni Abireyi la e ni ma ni ma zuriya ni Abireyi la. 23 Nde su ma nsu ANKI Kiristi la, ni pi su. Mmayi beta kankye nsude kiya e yi tari, ni pi su kokori soseyi, ni yi ANKI pi konwawa, ni ma jaru kowoni kwanki, ni sha dukwa nyowa, ni geni muntu a kowoni kwanki. 24 Sen biyari ni ma keleba ambere talatin ni tera a nani Yawudawa. 25 Sen wuku ni sha dukwa a nani ntani Roma, su ribi ni ndunsi sen daa, sen wuku kwanto wokye ni ma a siki e yi, ni yi dederi nja nana a siki ni totolo riki, 26 A siki tepiya na a kowoni kwanki. Ni gomu ni aseri a siki riki ni gomu nja bolowa, a siki aseri anya ntani na, ni sha Genbeki anya yayuwa na Yawudawa, ni kwa sha wuya soseyi a nani worede su ma Yawudawa ba, ni yuru a Genbeki a siki totolo geri, ni sha wuya a siki sanwa, ni geni aseri a siki totolo riki nja ni yuru a siki aseri nja yayuwa nsu yaruwa. 27 Ni yi ANKI soseyi, ni sha wuya A kowoni kwanki ni iya kwana ba; ni zi nyunwa nja kishi riki, a kwanki nyowa ni lesa mbosi; ni sha yari a kwanki nyowa, ni lesa keyi sa nki. 28 Boni worosu mbo bombom de su ma paru nja ni, nzun yomu ni man sori kula ni ntani nsubiya Yesu. 29 Nde nseda a siki nsubiya Yesu lesa sori, na zi kankye eni la ni lesa sori, nde nseda puari a siki lepi, na zi beki siki soseyi. 30 Nde e ma dole na de ni dukwa geba, na dukwa geba ni mbode nana lesa sori na. 31 Mirikisi Adaa ni Obagizi Yesu, nsude deta yobo ni gbogbo shina nkye ni ma pala yaruwa naba. 32 A siki kesa ni Dimasiku gomuna de ma kisi seleki Aretas e sa nsu kpanku kopa ni totolo geri de su ka ni. 33 Sede su la ni sa a siki obubu su biya ni te taga ni golonwa totolo geri ni sila a nani seleki.