1 Mua yobo kiya amu na jaja ba? Ko mua bila takada yobo dege anya aku la, ko butu a anya ku kankye yiri de worosu su ntani sua yi na? 2 Sede oku nkiya ku kuma kankye takada amu la, de su rubuta a dishiya mu, de konwawa e geni nja de konwawa e karanta. 3 Ku ma kankye takada na de Kiristi rubuta, de ema nani wuta ni anki amu, su rubuta ni nani naba sede ni Aworo Mirikisi nsu leyi, ba a kiya dunsi na su rubuta yi ba sede a dishiya ni nsebeki.

4 Mu pala yomu la sobon sa dishiya de mu ma nshi a siki Mirikisi te anya Kiristi. 5 Mu shina nkye muma sori ni yi anki mu nkiyamu ba, sede Mirikisi la ba mu sori de mua yi anki mu. 6 Mirikisi e shiya sa mu muma bunwa anki ni sabuwa anikowori, ba ni takada ba sede ni Aworo; sobon doka mu de su rubuta e zon muntu, sede Aworo de yaa beyi leyi.

7 Kuzukam nde anki kokoyi doka Musa de zo ni muntu, nsude su rubuta e yi a siki dunsi, zo ni dereja, de kede yaya Izireyila su kone pisika Musa tiriri ba sobon dereja yi, ko de dereja ni ema nsu bise la, 8 ba anki Aworo la e pi ma ni dereja bo? 9 Nde anki kokoyi doka Musa de sa ntani su ma nsu lepi mani dereja yomu, yomuna du anki ni sabuwa anikowori de zo ni gangasi ni Mirikisi e pi dereja! 10 Sobon seda wuri anikowori ema ni dereja kuzukam gagaba nde su te gonta yi nja sabuwa anikowori. 11 Nde doka Musa de dereja yi yaa bise zo ni dereja yomu, sabuwa anikowori Mirikisi yaa zo ni dereja totolo de pi!

12 Sobon yomu, tunde mu man sa dishiya mu, mu puari geba ba. 13 Muma kankye Musa na ba, de ripe pisika e yi ni woriki de kede yaya Izireyila su kone dereja asikye de yaa bise. 14 Sede dishiya asu ki zi, ari kuzukam dopuwa ripe dishiya asu a du kwanki de su te karanta anikowori ni wuri. su butu dopuwa ni ba, sobon te anya Kiristi la kin sua samu asikye yi. 15 Ari kuzukam kwanki de su karanta takada doka Musa, ni ripe dishiya asu su shina gaskye ba. 16 Sede nsude juyi te anya Obagizi, Mirikisi yaa bure ni a pisika yi. 17 Kuzukam Obagizi la e ma Aworo, anya de Aworo ni Mirikisi zunwa, anya ni ntani sua samu yenshi. 18 Guru amu, de mua geni sereyi, muma kamani dereja Obagizi, su juyi mu ma kankye kamani de yaa ja yowa a siki dereja, de butu anya ni Obagizi, de ema Aworo.