1 E ma dole na de ni rubuta ku nshi a kiya ANKI mu de kwa yi ntani Mirikisi nshi. 2 Sobon ni shina nkye ku man memeri de ku sua ntani nto soseyi, e ni mma dukwa geba a kiya ba ntani Makidoniya, ni gye su nkye tun shekera nsuni oku ntani Akaya kuma shiri de ku beyi, yiri beyi kiya ku e rigye sa worede su dege a bisi. 3 Sede e ni saka yayuwa mu sobon ni dukwa geba de mua yi a kiya ku mbo mu nana nkye mua yi a rikishi na ba, sede ku ma ashiri, yiri de e ni gye ku de ku ma. 4 Sobon nde nsu biya Yesu ni Makidoniya su sa ku de ku shiriya kyawuta ku ba, yaa ma mu mbo kumnya nde a paru yomu, mua sha kumnya yiri de mu dukwa geba a kiya ku, sede e ni kede na man sha kumnya ba nzun oku 5 Sobon yomu e ma ni dole la de ni saka yayuwa a geba na kapi de ni zo nja sua karikye tala kyawuta sedeka de ku yi anikowori. De e ma sedeka de ku beyi ni dishiya da, ba nsu de ku beyi ni bebeki beta ba.

6 Ku turunwa ni mbo mu, du nsu de nunkwa yiri piri yaa mani keyi bikiya piri, nja du nsu de nunkwa nyowa yaa samu keyi bikiya nyowa. 7 Kowoni nse e beyi yiri de e yi tunani a dishiya e yi de yaa beyi, kede e beyi ni anwashi ko e ma yi dole na de e beyi ba, Mirikisi yaa so nsu de beyi ni dishiya da. 8 Mirikisi yaa yi yaa ba ku anabirika nyowa pi mbo de kuma bila, sobon de a kowoni kwanki ku mani guru mbo de kuma bila ari pi mbo de ku ma bila, de ku yi anki aniyeri nshi. 9 Yiri de ema a rubuta a siki beta Mirikisi nkye,

<<Yaa ba potoruwa kyawuta ni dishiya da;

gangasi yi si geba gbogbo.>>

10 Mirikisi na ema ba nsu nunkwa yiri de yaa nunkwa e kwa beyi mbo nsi, yomu na Mirikisi yaa ba ku yiri de kwa nunkwa e shiya yaa sa yiri mu e yi girima, yomu na Mirikisi yaa sa beyi amu de mua yi ni dishiya da mu e ja ku yowa ni anki ku ni gangasi anya Mirikisi. 11 Mirikisi yaa sa ku anabirika a siki guru mbo de ku ma nsu beyi ni dishiya da a kowoni kwanki, te yomu na ntani nyowa sua gbede Mirikisi sobon sedeka aku de ku beyi te anya mu.

12 Sobon anki ku ni aniyeri de kwa yi yaa biya mbo de ntani Mirikisi sua so kede ba sede yaa sa ntani nyowa su gbede Mirikisi. 13 Sobon anki kyawuta de kuma yi, yaa sa ntani sua yobo Mirikisi sobon ni beyi girima aku nja yeda aku nja manki Kiristi, nja beyi ni dishiya da de ku yi su nshi nja ririgye ntani guru. 14 A siki lepa asu sua turunwa nku a siki dishiya asu, sobon aniyeri de baki mma yi yaa pala ba de Mirikisi yi ku nshi. 15 Mu gbede Mirikisi sobon kyawuta de e yi mu nshi de mua yi yaa pala ba.