1 Tunde Mirikisi yi mu anikowori mu, oboki na, bila de mu sa nkimu ma sere sere siki kowon mbo de yaa sa nki nja aworomu dola, de mu yi zunwa seki nja beyi girima ba Mirikisi.

2 Ku shika dishiya aku daa nja mu. Mu yi nseda lepi ba, mu shushe nseda ba, ko mu bebeta nseda ba. 3 Ni pala yomu de ni ba nseda lepi na ba; Ni pala yomu yiride ku samu anya a dishiya mu ko mu mani leyi ko mu muntu. 4 Ni mani sori dishiya anya aku soseyi; Na dukwa geba ni oku. Ni samu sori dishiya; a siki guru takaasi Ni meyi perisiki soseyi.

5 Ko kwanki de mu zo a kesa Makidoniya, mu pushe ba, sede sua dama mu guru anya de mu juyi, a woze sua bila mu nrikishi, a siki womba ma a siki amu. 6 Sede Mirikisi, de yaa ba worede su mani sori dishiya ba, e ba mu sori guyam kwanki de Taru zo, 7 ba zo e yi na kin sa ku peri siki ba sede sobon sori guyam de ku beyi. E gye mu yiri sa dishiya de ku yi a kiya na, yowa basi dishiya, mala beyi de ku yi sobon e ni, sobon yomu peri siki na e pi ni pari.

8 Ko nde nisa ku beki siki a kiya takada de ni rubuta, E dama Ni ba. Ko de e dama Ni a beyi, Ni shina takada ni e dama ku, sede ni kwanki piri na. 9 Kuzukam Ni yi peri siki, kode nkye Ni sa ku beki siki, sede sobon basi dishiya aku e sa ku juyi. Sobon beki siki aku e ma yiri de Mirikisi yaa so, sobon yomu e ma ku asara mbodaa ba anya amu a kowon turiki. 10 Beki siki yiri ni Mirikisi yaa zo juyi bila mungu mbo nja sila e ma suwo nse ba, sede beki siki ni durinya yaa zo muntu. 11 Geni mbo de beki siki Mirikisi yi a dishiya aku: e sa ku memeri yi mbo, e sa ku shina nkye ku yi mbo kyakya ba, e sa ku yi anwashi, ku yi womba, ari ku sa dishiya, ku yi sori guyam, a kowon turiki ku nana mu nkye ku mani lepi ba. 12 Ko kwanki de ni rubuta ku takada, ba a kiya nsu de yi lepi na ba ko nsu de su yi lepi, sede Ni rubuta de Mirikisi e geni yiri de ku yeda mu. 13 A siki guru mbo mu mu man sori guyam.

A siki sori guyam de ku ba mu, mua yi peri siki yiride mu geni Taru meyi perisiki nja guru aku, sobon sori guyam de ku yi. 14 Ni gye Taru nkye Na dukwa geba sobon oku, ku ba ni kumnya ba. Sede guru mbode mu gye ku e ma gaskye la, dukwa geba amu nja ku a kiya Taru e ma gaskye anya e yi. 15 So de Taru man shi a kiya guru aku e man yowa soseyi nde e turunwa ni yiride guru ku kwa beyi girima, ku keleba e yi nja womba nja beyi girima. 16 Ni yi peri siki Ni man sori dishiya nku.