1 Dole Na ndukwa geba. Kode e mani ampani mbodaa ba, na sigeba ni pala mbode Obagizi bure ni ndani de Ni geni nja de e nana ni a siki pelesa. 2 Ni shina nseminji daa de shekera gom sha wuru de bise su leyi ta a bisi ni wuku te anya sori Kiristi. Ko e ma a siki nki ko a siki aworo ni shina ba Mirikisi la shina. 3 Ni shina nseminji mu su leyi te a bisi, ko e ma a siki nki la ko e ma a siki aworo la ni shina ba, sede Mirikisi la shina, 4 su la yi te anya de Mirikisi ma. e zi mbode e ma boyi de baki yaa yi yaa pala ba, mbode nsebeki yaa yi yaa pala su ba. 5 Na dukwa geba a kiya yiri nseminji mu, sede na taba dukwa geba a kiya kiya na ba, sede a kiya mbo worede su nana lesa sori na. 6 Nde ni so de ndukwa geba, na taba ma Odundu ba, sobon na pala gaskye la. Sede na dukwa geba ba kede nseda e la ni pi yiride e ma geni ni nja yiride e zi ni mmayi beta. 7 Sobon kede ndukwa geba a kiya totolo bure ndani de Mirikisi nana ni nshi na su kiri ni suwo a nki de e ma kankye ankwanya a siki nki na, da mu e ma yamanki obiri la de e saka de e ba ni ngala de e nana ni dukwa geba. 8 Sen wuku ni ologba Obagizi de e laba ni nsuwo mu. 9 Sede Mirikisi gye ni nkye, <<Aniyeri na e deta ke, sobon te anya lesa sori ke na ntani sua geni sika sori na.>> Nkayomu na dukwa geba soseyi ni peri siki a kiya lesa sori na, sobon de sori Kiristi e zunwa nja ni. 10 Mbode sa naka, ni gane ni rishi sori na, nja basi de su ma basi ni, nja Genbeki de ni ma sha, nja takaasi de mma geni, nja wuya de su ma ba ni sobon Kiristi. Sobon a kwanki de ni lesa sori, a kwanki ni na mma man sori.

11 Ni yi Odundu, sede oku na ku sa ni de ni yi yomu. E kamata de ku yobo ni, kode ni ma mbodaa ba nzun yomu be nana nkye <<Toree yayamanki>> aku mu su pi ni ba. 12 Mbode nana nkye ni ma yamanki ni gaskye, e shiya ma anki alama, nja mbo mamanki de ni yi a siki aku ni ka dishiya osu na su nana nkye ni ma yamanki ni gaskye. 13 Te woni turiki na ni nkye kuma kyakya nja ntani nsubiya Yesu ba? ko sobon de ni nana ku de ku sua ni nto ni gyolo na? Ku yape ni lepi mu! 14 Kuzukam Ni yi shiri de ni zo anya ku ni son wuku, Na taba dama ku de ku sua ni nto ba, sobon oku na, ni ma so ba gyolo aku na mma bila ba. E yi kyawu de yaya na su la loni nsu adaa asu ba, sede nsu adaa asu na su la loni yaya asu. 15 Na yi peri siki nde ni kisa guru mbode manshi nzun beyi kiya na sobon de nsua ku nto. Nde ni so ku soseyi oku kwa rigye so de ku man shi a kiya na naka? 16 Kwa yeda nja ni, ni ma ku loni keyi ba. Sede, nseda nkye ni nana ku wayo na, ni shishirigye ku! 17 Ni shushe ku te anya ntani de ni saka su anya ku? 18 Ni ologba Taru de e te anya ku nja ni saka yayiwa mu daa nsubiya Yesu te nja shi. Ko Taru shushe ku la? Eni nja Taru aworo ndandaa na e ma biya mu bo? Turiki ndandaa na mua biya bo?. 19 Ku mayi tunani nkye mua yi kokori de mu tele kiya mu anya ku la? Mirikisi na ma sheeda mu mua yi beta kankye ntani de su ma ni Kiristi; guru mbode mu yi, yayuwa na, mua yi de mu ja ku sori guyamu la. 20 Sobon ni ma zi womba kede kwanki de ni zo Na san ku yiri de mma bila ba, oku ma ku sani yiri de kuma bila ba. Ni mayi womba sobon na san rikishi, nja kishi nja zapi leyi, nja so kiya, nja bebeta nkiya ku seni, nja guluma nkiya ku, nja dege kiya nja dege ankeli ntani. 21 Ni ma zi womba nde ni zo anya ku Mirikisi yaa sani de nzi kumnya a geba aku, ni mayi womba kede ni yi beki siki sobon ntani nyowa de su mayi mbo mumungu su ki de juyi bila mungu mbo asu, lepi ni nungwe nja akusuka nja so zunwa dadi.