1 Sobon yomuna E ni, Bulusu, ni ma yaa jaru ni Yesu Kiristi sobon oku worede kuma Yawudawa ba.

2 Ni shina ku zi nabari yiri de Mirikisi a siki ni aniyeri yi e ba ni anki sobon oku, 3 e shiya ma, mbode ma a boyi su sa ku shina, Mirikisi gye ni asiri dishiyeyi yiride ni rigye rubuta anabari yi piri ba ku. 4 Nde ku karanta daa mu, tuku, kwa gane ni mbode ni shina a kiya gaskye manki Kiristi. 5 Mirikisi gye ntani kwanki daa manki mu ba yiri de e pelesa ba yayamanki yi nsuseki nja nsu anebi nsuseki te anya ni Aworo. 6 Manki mu e shiya ma ta anya nabari kyakyawu ni Yesu Kiristi worede su ma Yawudawa ba su ma yaya de si gado gabada nja mu Yawudawa, de muma nki daa, osu ma su mani lobo a siki ni anikowori de Mirikisi yi mu nshi ta anya ni Yesu Kiristi.

7 Su la ni de ni ma bunwa ni nabari kyakyawu mu te anya ni ANKI ni aniyeri de Mirikisi ba ni anya ni ANKI ni sori yi. 8 Kode nkye E ni Bulusu na ni ma dende a siki ni ntani Mirikisi, e ni la su ba ni aniyeri mu: de ni ba worede su ma Yawudawa ba manki kyakyawu a kiya ni Yesu Kiristi, 9 de ni pelesa gye ntani guru yiri de Mirikisi mayi shiri ni betayi, de ema a boyi tun kwanki ni da anya ni Mirikisi, de yi mbo guru. 10 Nupi yi naka kuzukam, ta anya ni nsubiya Yesu, su pala simi ni Mirikisi gye nsu solota nja nsu sori a siki bisi, 11 da mu ma shiri Mirikisi na a kiya ni mbode de e man shi tun dege pari su sika yi a siki ni Yesu Kiristi Obagizi amu, 12 A siki yi na mu mani sori dishiya de mua te a geba Mirikisi ba womba ta anya beigaskye de mu manshi a siki Yesu Kiristi. 13 Sobon yomu, ni ma yi ologba ku, kede ku butu dishiya sobon Genbeki de ni ma geni sobon ku, Genbeki mu ema aku riba.

14 Sobon ni yomu Ni dure a geba Adaa amu ni bisi, 15 daa de dege anya yi na guru zuriya ni bisi nja ni durinya su samu seni asu. 16 Ni ma yi lepa de Mirikisi dege siki yowa ni girima yi e ba ku sori guyamu nja sori dishiya te anya ni Aworo yi, 17 de Kiristi e mani anya zunwa a siki dishiya aku te anya beigaskye aku. Ni yi lepa de, ku sakisi nsori soseyi a siki ni so aku, 18 sobon de oku nja guru nsubiya Yesu ku mani sori shina, de ku shina yiri so ni Yesu teke de ema nshi ni bure yi nja nyisa yi nja girima yi nja yiri ondum yi. 19 De ku kwa shina so ni Kiristi de pi sori ni shina nsebeki, de ku sika ni guru shina ni Mirikisi.

20 Kuzukam yobo ma nja Mirikisi amu de te anya ni sori yi ema yi mbo teke pi guru mbode mua ologba yi, ko mbode mua yi tunani yi a dishiya mu, 21 yobo ma nja Mirikisi a siki ntani nsubiya yi sa siki Yesu Kiristi ari dege kwanki guru, ari gbogbo nja gbogbo! Ema yomu.