1 «ታኒ ላሻሮኔን ሞኪዛ ጪሻ ማላኔ

ጋን ሞኪዛ

ሱፌ ጪሻ ማላ» ጋዱስ።

2 «ታ ሲቆያ ማጫሳታ ጋርሳን

ኣጉን ጊዶን ዲዛ

ሎኦ ጪሽ ሚሳታዉስ» ጊዴስ።

3 «ታ ሲቆዛ ታኒ

ናቴታራ ጋ

ጼሊዛ ዎዴ፥

ዎራ ጊዶን ዲዛ ኣፒሌ ሚሳቴስ፤

ታኒካ ኬሃ ኡፋዬታዲስ፤

ታኒ ኢዛ ኩዋ ጋርሳን ሼምፓዲስ፤

ማልኢዛ ኢዛ ኣይፌዛፔካ

ማ ካላዲስ።

4 ኢዚ ታና ጊቢራስ

ኣሆ ኬን ጌልዴስ፤

ባ ሲቆ ታ ቦላ ባንዲራ ማላ

ቁ ቁ ኦዴስ።

5 ታኒ ኢዛ ሲቆን ኦይኬታዳ ሃርጋዲስ፤

ሄሳ ጊሻስ ታና ዛቢቤ ኣይፌ

ሚዚዲ ጋዚዲሲቴ፤

ኣፒሌ ሚዚዲ ታና ቤጎቴ።

6 ባ ሃዲርሳ ኩሼ ቦላ

ታና ቦርኮቲሲዴስ፤

ባ ኡሻቻ ኩሼን

ታና ኢዲሚዴስ።

7 ኢንቴኖ ዬሩሳላሜ

ዬላጋ ማጫሳቶ!

ሲቆይ ባስ ዶሲዲ

ዴንዳና ጋካናስ

ኢዛ ኢንቴ ቤጎንታ ማላ፥

ታኒ ኢንቴና ጌኔሳታኒኔ

ባዞ ዉሻን ኣማታይስ።

8 ቤኢቴ! ታ ሲቆዛ ጬንጉርሲ

ዙማታ ቦላራ ፒሪሼ፥

ዙምቡላታ ቦላራ ጾንጌቲሼ

ዪዛይሲ ሲዬቴስ።

9 ታ ሲቆዚ ዉሻ ላቃ

ዎይኮ ጌኔሳ

ላቃ ሚሳቴስ።

ቤኢቴ! ኢዚ ኑ ኬ

ዳራንቻን ኤቂዴስ፤

ማስኮቴራ ሶ ጼሌስ፤

ማጋላሻ ጾኤራ

ጹሉንጊ ጼሌስ።

10 ታ ሲቆዚ ታና፥

‹ታ ጎዴ፥ ዴንዳ!

ታ ሎኦዬ! ሃ ያ!

ኣኔ ኢሲፌ ቦስ።

11 ቤያ፥ ባልጎይ ኣዴስ፤

ኢራይካ ኣጊዴስ።

12 ኡባሶን ጪሺ ጪዪዴስ፤

ማዛሙሬ ዬጺዛ

ኣጊናይካ ጋኪዴስ፤

ሃራጴ ዬካ

ኑ ቢታን ሲዬቴስ።

13 ባላሴይ ኣይፌ ኢሞ ዶሚዴስ፤

ዎይኔይ ጪዪዴስ፤

ኢዛ ጪሻ ሳዎይ

ኡባሶን ቱኑ ጌስ።

ሄሳ ጊሻስ ታ ጎዴ፥ ዴንዳ፤

ታ ሎኦዬ! ሃያ፤

ኣኔ ኢሲፌ ቦስ› ጌስ» ጋዱስ።

14 «ኔኒ ኣፎ ዶናን

ዛላ ዛኣ ጊዶን ዲዛ

ሃራጴይ ማላ፤

ኣኔ ኢሲቶ ኔ ኣይፌሶ

ታና ቤሳ፤

ኔ ቃላ ጬንጉርሲካ

ታና ሲሳ።

ኣይስ ጊኮ ኔ ጬንጉርሳይ

ታና ኡፋይሴስ፤

ኔ ኣይፌሶይካ

ታና ሎኤስ» ጊዴስ።

15 ኑ ዎይኔ ኣታኪልቴይ ጪዪዴስ፤

ሄሳ ጊሻስ ኑ ዎይኔ ኣታኪልቴ

ጊዶ ሞሮንታ ማላ

ዎራካናታኔ ኢስታ ቡቱላታ

ዎጺማዴን ኦይኪቴ።

16 «ታ ሲቆዚ ታሳ፤

ታኒካ ኢዛሳ፤

ጪሊላ ማታ ጊዶን

ኢዚ ባ ሜሄ ሄሜስ።

17 ኦማርሳ ማይ ቃሬታናሺን፥

ማላዶ ጫርኮይ ጫርካናሺን፥

ታ ሲቆዞ!

ጌኔሳ ማላ ዎይኮ

ዉሻ ላቃ ማላ

ኣፎቲዛ ዙማ ቦላራ

ዎጻዳ ሃ ሲማ» ጋዱስ።