ሲቆ ሳባ 6

ላጌቲ

1 «ማጫሳ ኡባፌ ሎኦዬ!

ኔ ሲቆ ላጌዚ ኣዋ ቢዴ?

ኑኒካ ኔናራ ኢሲፌ ኮያናስ፥

ኢዚ ኣዋ ባጋራ ቢዳኮ

ኑስ ዮታ» ጊዳ።

ጌላኦያ

2 «ታ ሲቆዚ ዶርሳ ዉዴ ሄማናስ

ሎኦ ጪሻታ ማጻናስ

ሺቶስ ጎኢዛ ሳዎ

ማታይ ዲዛሶ

ዱጌ ኣታኪልቴ ጊዶ ዎዴስ።

3 ታኒ ታ ሲቆዛሳ፤

ኢዚካ ታሳ፤

ኢዚ ዉዴዛ ጪሊላ ማታን

ሄሜስ» ጋዱስ።

ፓንዚ

4 «ታ ጎዴ! ኔኒ ቲርጻ ካታማይ

ሎኢዛ ማላ ሎኣሳ፤

ዬሩሳላሜ ማላ ኬሃ ካይሻሳ፤

ባንዲራ ቶኪዲ ቢዛ

ኦላንቻ ማላ

ያሺሲዛ ቴማራ ዳሳ።

5 ዎዜ ኔና ኔ ኣይፌ

ታፔ ዴንርኪ!

ኢስቲ ታና ዲኢዲ

ቃሾ ኣስ ኬሲዳ፤

ኔ ቢናናይ ጋላኣዴ ዙማፔ

ዱጌ ዎዛ

ዴይሻ ዉዴ ሚሳቴስ።

6 ኢስታ ጊዶን ማይኔይ ባይንዳ

ሜንቴ ሜንቴ ዬሊዛ ኢስኬይ

ዲሬቲን ሜጬቲ ኬዚዛ

ቦ ዶርሳ ዉዴታ ማላ

ኔ ኣቻቲ ታና ኡፋይሴቴስ።

7 ኔ ሻጋላቲ ኣይፌሶ ካሚዛ

ቁራጬ ጊዶራ ጼሊዛ ዎዴ

ኦሮማኔ ናምኡ ኬሲ

ጳልቂዳ ሚሳቴቴስ።

8 ኡሱፑን ታሙ ማጫ ካዎቲ፥

ኦስፑን ታሙ

ላጌ ማጫሳቲ፥

ቃሴ ቆዳይ ባይንዳ

ጌላኦቲ ዴቴስ።

9 ታኒ ጊዲኮ

ኢሲኒዮ ጻላ ዶሳይስ፤

ኢዚ ቦላ ኣይ ዎሶይ ዴና፤

ኢዛ ሃራጴ ማላ

ካይሻ ኡታዱስ፤

ኢዛ ባ ኣዬይስካ ሜጺ ኢሲኖ፤

ኢዞ ዬሊዳ ኣያ ኢዞ

ኡባፌ ኣ ሲቃዉስ።

ጌላኦቲካ ኢዞ

ጼሊዲ ጼሊዲ ሳቤቴስ፤

ካዎ ማቼቲኔ

ኢዛ ላጌቲ ኢዞ ናሼቴስ።

ላጌቲ

10 ሃና ማላዶ

ጻልቄ ማላ ሞኪዛራ፥

ኣጊና ማላ ጶሊዛራ፥

ኣዋ ማላ ፖኢዛራ፥

ባንዲራ ቶኪዲ ቢዛ

ኦላንቻ ማላ

ያሺሲዛራ

ኢዛ ኦኔ?» ጌቴስ።

ፓንዚ

11 «ታኒ ሾባን ቶኬቲዳ

ኣታኪልቴታ ቤኣናስ፥

ዎይኔይ ኣጪዳኮ፥

ኦሮማኔይካ ጪዪዳኮ

ጼላናስ

ዱጌ ኦቾሎኔይ

ቶኬቲዛሶ ዎዲስ።

12 ታኒ ቆፖንታ ዲሺን፥

ታ ኣሞይ ታና ኤፊዲ

ካዎ ፓራ-ጋሬታ ቦላ

ኡቲሲዴስ» ጊዴስ።

ላጌቲ

13 «ሃኔ ሹላሜ ማጫሳዬ!

ሃ ሲማ፤

ኔና ኑ ሎኤ ጼላና ማላ

ሃ ሲማ» ጊዳ።

ጌላኦያ

«ዳሮ ኣሳ ሲንን

ዬጺዛ ኣሳ ማላ፥

ታና ሹላሜ ማጫሳዮ

ኣይስ ጼሌቲ?» ጋዱስ።