ሲቆ ሳባ 5

ፓንዚ

1 «ታስ ሲቆ ሚቾ ጊዲዳ ታ ሚሺራዬ!

ታኒ ታ ኣታኪልቴ ጊዶ ጌላዲስ።

ታ ካርቤኔ ታ ሺቶ

ጪሽ ማጻዲስ፤

ኤሳ ኡኬ ኢሊሎዛራ

ጋ ማዲስ፤

ታ ዎይኔ ኡሻ፥

ታ ማ ኡያዲስ» ጊዴስ።

ላጌቲ

«ኢንቴኖ ሲቄቲዛይቶ!

ካላና ጋካናስ ሚቴ፤

ኣላና ጋካናስካ ኡዪቴ» ጊዳ።

ጌላኦያ

2 «ታኒ ኦማርስ ስካዲስ፤

ጊዶ ኣቲን ታ ዎዚናይ ቤጊዴስ፤

ታ ሲቆዚ ካሬ ቆጺሼ፥

‹ታስ ሲቆ ሚቾ

ጊዲዳ ሚሺራዬ!

ኔናን ዎሶይ ባይንዳ

ታ ሃራጴዬ!

ኔና ሾባይስ ታስ ካሬዛ ዶያ፤

ታ ሁኤይ ኬንቾን ዎቂዴስ።

ታ ቢናናይካ ኦማርሳ ፑሴን

ሙሲዴስ› ጊሺን ሲያዲስ።

3 ታኒ ታ ማይኦ ኬሳዲስ፤

ሂስቲን ዛራ ማይኦ?

ታ ቶሆካ ሜጬታዲስ፤

ቃሴ ዛራዳ ኡርቃሶ?

4 ታ ሲቆዚ ፔንጌ ጾኤራ

ኩሼ ዬዲዴስ፤

ሂስቲን ታስ ማራጬን

ፖልኡ ጊዴስ።

5 ሄሳፌ ጉዬ ታ ሲቆዛስ

ካሬ ዶያናስ ዴንዳዲስ፤

ካሬዛ ዶያና ታ ኦይኪሺን

ታ ኩሼፔ ካርቤይ ጾኬቲዴስ፤

ታ ቢራታፔካ

ሺቶይ ጎጊዴስ።

6 ታ ካሬዛ ዶይሺን ታ ሲቆዚ

ሲሚዲ ቢቺዴስ፤

ኢዛ ቃላ ጬንጉርሳ ሲያናስ

ኬሃ ኣሞታዲስ።

ሚንዳካ ኮያዲስ፤

ጊዶ ኣቲን ዴማናስ

ዳንዳያቤኬ፤

ጼይጋዲስ ሺን

ኢዚ ታስ ኮዪቤና።

7 ካታማ ናጊዛይቲ ታና ዴሚ

ዋዲ ማዱንዳ፤

ካታማ ጊምቤ ናጊዛይቲ

ታ ማይኢዳ ሴሎ ማይኦዛ

ቃሪ ኤኪዳ።

8 ኢንቴኖ ዬሩሳላሜ ጌላኦቶ!

ኢንቴ ታ ሲቆዛ

ዴሚዳ ጊዲኮ

ታኒ ኢዛ ሲቆፔ ዴንዲዳይሳን

ሃርጊዳይሳ ሃዳራ

ኢዛስ ዮቲቴ» ጋዱስ።

ላጌቲ

9 «ሃኔ ማጫሳ

ኡባፌ ኣ ሎኦዬ!

ቱሙ ኔ ሲቆ ላጌዚ

ሃራታፔ ዱማቲዜ?

ኔኒ ሃይሳ ማላ

ኑና ሃዳራ ጊዛይ

ኢዚ ሃራታፔ ዋኒኔ?» ጊዳ።

ጌላኦያ

10 «ታ ሲቆይ ዳሮ ሎኦኔ ሚኖ፤

10,000 ኣቱማሳ ጋርሳን

ኢዛ ማላይ ዴና።

11 ኢዛ ሁኤይ ጌሻ

ዎርቃ ሚሳቴስ፤

ኢዛ ቢናናይካ ኦሎሲኔ

ዱምኣ ካሬ ሚሳቴስ።

12 ኢዛ ኣይፌቲ

ሻፋ ላንቄን ዲዛ

ሃራጴታ ማላኔ

ማን ሜጬቲዳ

ኢንቁታ ማላ።

13 ኢዛ ሻጋላቲ ማልኢዛ

ሳዎ ማታታ ማላ፤

ዱማ ዱማ

ቂማሜቲ ቶኬቲዳ

ኣታኪልቴሶ ሚሳቴቴስ፤

ኢዛ ሜቴርሻቲ ካርቤ ሺቶይ

ጾኪዛ ሱፌ ጪሻ ማላ

ሎኤቴስ።

14 ኢዛ ኩሼቲ ኢንቁን ኣሌቄቲዳ

ዎርቃ ጉፌ ማላ ሎኤቴስ፤

ኢዛ ቦላይ ሲምፔሬ ጌቴቲዛ

ኢንቁን ኣሌቄቲዳ ዳንጋርሳ

ዛሌ ማላ ሎኤስ።

15 ኢዛ ቶሆቲ ዎርቃን ቶኬቲዳ፥

ዳልዳቻ ቱሳታ ሚሳቴቴስ፤

ኢዛ ሜይ

ሊባኖሴ ዚጋን ኣሌቄቲዳ

ሊባኖሴ ዙማ ሚሳቴስ።

16 ኢዛ ቃላይ ኤሳ ማላ ማልኤስ፤

ኢዛ ቦላይ ሙሌራ ካይሼስ፤

ኢንቴኖ ዬሩሳላሜ ጌላኦቶ፥

ታ ሲቆዚኔ ታ ላጌዚ

ሃይሳ ሚሳቴስ» ጋዱስ።